Lockdown Forever

Mizoramin lockdown kan kalpui hun chhung hi inngaizawngte kum chhiarah chuan kum za tluk hialin a rei tawh awm e. An tan chuan darkar khat pawh hi kum za tluk hialin a rei ṭhin si, ṭhenkhat ngaihzawng neih hun lah kar hnih khat leh thla hnih khat dan lek leka rei a lo ni vei bawk nen.

Lockdown hi thlabia hlawh la an pawisa ipa a hun tea rah ṭhin tangka lut dar inkhawng ri reng thei tan chuan buaina a awm lemin a lang lo awm e. Mahse, mirethei, eichawp dap; in luah man pek ngai, fate zirna fee pek ngai bawk, zing chhun zana ei loa awm thei bik lo, ṭam ve thei tho te, motor loan rulh ngai leh eng eng emaw loan rulh ngai thawh loh hlawh aṭanga rulhna tur nei ve lote tan phei chuan mautam ṭam ṭum hnih tuar zawn ai paw'n a runthlak ta ve ang.

An tan chuan sawrkaraṭanga man chawia kan neih thilte hi lawmawm ni ve bawk mah, se thlabiaa man an chawi, tui leh eng chhit mante hi phurrit a ni ru fo ṭhin a. A loa an awm theih bik loh avangin zalen taka kan awmho lai pawh khan chu'ng man tur tuak chuan tuk chhuakin chawnpuar ping keh lo chauha thawkin an ni tin eikhawp bakah an thla chawi sawrkar sum tur an tuak daih hram hram ṭhin a nih si kha. Chu achhapah thiamna leh sanna uma khawvel pian ken chi khat an fate zirna man a lo ngai bawk nen. Chuti chung chuan lockdown tawp chin nei hleithei loin mipui min han hrut ta a ni a, an lu a haiin pa chang leh nu chang fate hmuh loh phenah rilru hah leh rilru hah an inhnem tawn ru fo a, a ngaihna hre bik lo ve vete chu zawhna chhan theih loh inzawt tawnin zanlai leh zing leh chhun sawi lovin an pawisa ip tuihawk ang maia hnar nei lo, vawi khata haw ngheka luangliam zo leh mai ṭhin luang zo tawh chu keuin a tuka mi tur leh a tlaia mi tur mangang takin an suangtuah ru fo ṭhin.

An fate tana Hero; an engkim ngaihtuahsak fotu an nu leh pate mangang leh hrilhhai hmel tur chu sawrkar hian mitthlapui se, lockdown ti bur reng lo hian nau sawngnawi kal tala kal dan hi a awm lo em ni le? An fate mita beiseina chuai lo hmu rengtu chaw ei tur an neih lo theih pawh ring ngai lo naupangte'n beisei nei tih hriat taka an nu leh pate an melh laia an fate mitmeng chu fa tinte Hero nu leh pate hian an hmuh hmaih dawn si lo. Sawrkar dan zawm a ṭul luatah fate lawm nan nu leh pate tan dawt sawi a lo ṭul leh ang a, hruaitu lu aṭanga dawta inhraiin thlahte thleng dawt awihawm tak tak kan inbarh leh reng mai dawn em ni ang?

Eichawp dap chhungkaw nu leh pa thawhrim avanga thlanfim far zawih zawih khawpa thawk ṭhin hmaiah khan tunah chuan fate ṭam hmel hmuh avangin mittui a far ta tih tal hi min hriatpui ve hram se la, wheel chair-a inṭhuttir reng lo hian nau sawngnawi kal tala kal min zirpui hram se. Kan sawrkar hian tlan kan dil lo a, nau sawngnawi kal tala kal kan dil tih hi min hriatpui hram ve se, an ti vawng vawng mek a nih si hi.

Sawrkar aṭanga man kan chawi tal hi zawng heng hun chhung hian min free thei se tiin duhthu an sam ru fo a. Ni e, heng hun chhungtal hi zawngin han free thei se. Mahse, keini ang bawka ṭam leh leiba ngah ve tho, ba rulh tur inchhek vum ṭèn ṭùn sawrkar hnuaiah hian phur inchhawk tur bik kan awm lem si lo. Mirethei eichawp dap kut a chawl a, an bel a ruak a, an dang a roin a chár bár tawh a, thlabi hlawh neite erawh ṭam lovin an bel a mawmin an no a khat liam reng a, an tan erawh buaina a awm lem loin a lang.

Mirethei an ṭam si chuan man chawia an in luah hlawhtir aṭanga ei hmu ve ṭhinte tan pawh thla hnih khat in-free chu harsa lem lo mah se, an thawh loh chhung zawng in-free erawh an chawbel a keh a ni ve ngawt dawn si. Keimah ni ang thoa thla tin lut tur nei ve lo thingtlang lama kan unaute hian kan ei tur min hlui reng theih loh hun a la thleng ve bawk ang. A chhan chu an eitur dap a lo ngai ve ang a, an ei ai kan eisak reng thei bik dawn si lo. Ṭam leh ṭam kan inṭam chhuah chuan Mizo mipui kaihhruai nuam leh hotute thuawih em em ṭhinte hian kan awih reng theih loh hun a la thleng mahna.

Heti khawpa rei lockdown chung hian hri a kiam lo a, sawrkar hian hri hi a do nge LLTF/ VLTF-te hian an do zawk tih hi hriat a har tawh khawp mai. A do erawh an do ve ve niin a lang. Lockdown chhung hian mihring pawn chhuak an tam chuang lo, mahse kan pung tual tual si, mipui pawh kan ṭam tual tual a, hnathawk hlawh pe thei lo leh hunbia loan rulh ngai rul thei lo an awm ta zauh zauh bawk. Thla kip hlawh la tan buaina a awm loh lai hian ni tina eichawp hlawh ve hram ṭhin tan erawh mamawh a kiam chuang si lo va, a luhaithlak ta viau.

Chhuanchham avanga LLTF hnena pachanga pumpa in-report reng lah thil nuam ni bik dawn hek lo, Mizo mizia a lo ni lo bawk nen kan hriat loh hian khawi khawiah emaw chuan zing leh tlaia buh leh buh hmeh tluk tluk hi an awm ngei ang a, buh hmeh tur nei pha tawh lo pawh an awm fe tawh ngei ang. An fate school fee pek a lo ngai ang a, tui bill leh electirc bill lah tun ṭum chu a pung hlauh - an ti reng zel si. Chu achhapah gas a lo ngai leh ṭhin bawk nen, pawnpui hnuaia pa chang thlan tla phunga a vial zankhua zak zak hi a tam tawh viau ang le.

Lockdown hian hri a um bo lem lo niin a lang a, mahse, lockdown chauh hi hri dan na hmanrua kan hriat em ni zawk? Awmzia a nei lo a nih chuan lockdown loa mipui ṭam lo tur zawnga hmalak a ngai ve tawh tihna em ni ang?

Dawr luah man ba leh hnathawk hlawh pek ngai, pek tur nei tawh lo khawpa ṭam leh tlachhia dawr khar phah hi khawi khawiah emaw chuan an awm nual tawh ngei ang. Rilṭam avanga mihausa leh thlabi hlawh late chaw nawi paih leh an fate ei duh loh paih pawh it ngawih ngawih khawpa pachhia covid aia ṭamna thihpui hi kan hriat loh hian an awm tawh reng lo maw?

Lockdown avang hian mi tam tak hnuk a inchhat mek a, pa ṭheuh ṭheuh thawh loh hlawh la leh thawh loh hlawh avanga ṭam dinhmun rel dan a lai lovin rel sual a tam ta e.

Khawpui lockdown kara keimahni ang bawka harsa ve thote dinhmun thlirpuitu.