SILAI RI NGAIHNAWM

Assam Police lam 7 in nunna an chan a, mi 50 chuangin hliam an tuar bawk a, a pawi khawp mai. National Integration Programme & Policy letling thawk a ni. State ṭhenawm ramri buai inkarah Police leh Police silai hmanga inkahna a thleng a, Mizo mipuite tan chuan 'silai ri ngaihnawm' a ni.

US Sipaite chetna Osama Bin Laden an beih laite kha White House aṭangin, live visual-in President leh mi pawimawhten an lo thlir an ti a. Tun ṭuma Vairengte hmuna Assam Police lo lutin, Civil mite tiang, tear gas, silai leh bomb hmangin an rawn bei a. Mizoram Police-ten civil mite chhana silai an chelek lai hi phone live-in Mizoram mipui leh state pawna Mizote chuan thinrim tawt ṭeuhin kan thlir ṭhup a. Silai puak ri phauh phauh, puak ri cher cher, Mizoram Police silai kap lai chevel, police bula civil mi bawkkhup nui vur, civil mi hmeichhia police bula Mizo meizial pak khu chunga "Saw saw an tlanchhia, an lokal leh" tia kawk a, Civil miten police mamawh tui leh thil dang an lo supply lai te a lo lang a.

Thil danglam tak "Saw saw - Vai pakhatin flag var a rawn vai e, (in hmu thei em?) Assam lam an tlawm tihna a ni e" Assam tlawm tawh hnua kan Mizoram police kawrṭial, kekawrṭial ha, silai kap zo, lei hnim chunga ṭhenkhat ṭhukhawm hahchawl, fiamthu ṭawngkam thawh nghal a, an kut zungpui (thump up) laite thlengin mipuiten kan lo hmu thei a ni.

US sipai indona hmuna zamna reng nei lo chevel ang mai an ni. Mizo civil mi leh Mizoram police te ah khan zamna leh hlauhna reng hmuh tur a awm lo. He thil thleng leh thlalak te hian 'Mizote hi pi leh pu aṭanga indo ṭhang, ralthuam chelek thiam, hnam huaisen, hnam ṭangrual, ram - khua leh tui tana ral hmaa ṭhian chhan thih ngam" kan ni tih a lan chhuah tir hle. Poster lian pui puia print a, Aizawl khawpui leh hmun danga tar vak chi hial a ni.

Agressor - Tunge runtu? Khawvel pum indona, ram leh ram, state leh state, khua leh khua eng ralthuam pawh hmanga tharuma inbeihna a thlen a, zawhna leh thiamchanna kawnga thu inchuh pawimawh a ni. Assam Police 200 zet, IGP, SP te kaihhruainain Ambulance motor (doctor & nurses) Prison van, tiang, tear gas, silai leh bomb rawn kengin Mizoram chhung National Highway 306 ah min rawn run a, Mizoram chhung Police camp an rawn luah a. Tunge runtu, tunge tharum leh ralthuam thawhtu chu? Mizoram chhungah tharum thawh a, silai rawn hmetpuak a, silai chu silai veka chhanglet lo thei lo dinhmunah min nawr lut a ni.

Video thlalak, photo hrang hrangah a chiang khawp mai. India ram pum leh khawvel tan hmuh hmaih tur a awm lo. Prison van an rawn ken hi, miscreants - Mizote dan bawhchhia, dan pawisa lo tia min mana an phurh thlakna tur, (CM Himanta hian statement a siamah Mizote hi miscreants min ti deuh zel) Ambulance hi Assam Police hliam tuar an awma bawihsawm a, hliamna zualte an phurh hawna tur a ni. Mizote min zahlohna, min hnuaichhiah dan hi nasa tak a ni. (Helai aggressor lai hi Mizoten news interview statement kan siamin tarlan tam a dik ang.)

Politics chhungah - Kum 2014 Lok Sabha General Election khan BJP PM candidate Narendra Modi campaign Silchar thusawiah "Refugees te chu an lokalna ramah kan thawn kir ang, Assam buaina leh hmasawn theih lohna hi refugees vang a ni" a ti a. Tun 2019 Lok Sabha Election, PM Narendra Modi campaign bawk Silchar thusawiah tho "Hindu migrants from Bangladesh will be accommodated" tiin a sawi ta daih a. Muslim te vote tura thlem chungin "Muslim Party vote nghet nei sate chu ram pek turin a huam lo ang" tiin Bangladesh refugees ṭheuh ṭheuh sakhua - sakhua zawngin, Party dang lo vote ṭhinte chu vauin, a thliar hrang a. Refugees (illegal migrants) vanga Assam state population tawt lutuk hi Political Party ten election vote zawn nan an hmang rei ta. Tuna silai a puah chhan bulah pawh CM Himanta Biswa Sarma bakah, PM Modi, HM Shah te chalah phung a tawpin a lang.

Inkahna leh buaina dang thleng tawh lovin awm chho mah ila, nakum kum tir state 5 Assembly election, kum tawp state 2 election leh Lok Sabha election 2024 thleng hian Mizoram leh Assam Police te inkahna hi Politics in mawhpuh chhiatna National Politics issue/ agenda lian pakhat a la ni turah ngai ang.

NDA, NEDA chhunga thawkho State sawrkarna chelhlai ve ve, nimin maia Home Minister Shah a hoa Shillong khawpuia meeting tlang an ni nghe nghe. Silai hmanga inkahna hi central sawrkar thlengin mawhphurtu an ni, Parlia­ment chhung leh pawn Platform hrang hrangah sawi a hlawh fo ang, a namai lo.

Tuna Assam BJP sawrkar hmasa hian 4th October 2020 thleng khan ram nei lo chhungkaw 55,000 hnenah boundaries bawr leh hmun ṭhenkhatah ram pass a pe chiam tawh a, thla hmasa lawk Assam election hma khan chhungkaw 1,00,000 pe tling turin an intiam bawk a, mahse, Assam area 78,438 Sq Kms hian a daih ngang lo. Hmanni lawk Assembly election neiha Cachar, Hailakandi leh Karimganj bial vela campaign an auhla chu pem tharte ram peka accommodates tir a ni leh bawk.

Tichuan, Mizoram lam chang ni lo, NE state ṭhenawm dangte pawh a nek/ nawr ta vak mai a. Mizoram chu Assam nena ramri 165 Kms a thui, Mizoram chhung hmun hrang hrang - Zophai, Thinghlun, Phaisen, Vairengte, V.Saihapui ramte min rawn chuhpui a, Assam Official ten tharum hmanga buaina an rawn siam evidences tam tak a awm tawh a ni.

Tunah India ram pum news zawng zawng deuh­thaw-a lang tham khawpin kan inkap ta. Chumiin a hrinchhuah National print media hrang hrangah Mizoram leh Assam ramri buaina an ziak lang ta sup sup a. British rorelna hnuaia Mizote ram chin 1875 bawr pawh an ziak lang ṭha hlawm viau, a lawmawm lam a ni.

Hetah tak hian Mizoram chuan dawhkan khata ramri chinfel kan duh rualin 'historical fact boundary' anga Assam nena ramri chinfel kan phut nghal a hun awm e.