Lockdown hi tu rawt ber nge?

Ni 100 chuang kan state khawpui Aizawl lockdown a nih chhan hi medical lam mithiamte rawt ni lovin tlawmngai pawl leh kohhran hruaitute rawt tiin titi a awm ṭhin a, sorkarin chutiang mai maiin thutlukna a siam a rinawm loh laiin tun hnaia Whatsapp lam ka document hmuh hian ka rilru a tina takzet. Aizawl khawpuia miretheite tawrhna thlen tirtu lockdown hi Medical Operation Team (MOT) rawt a lo ni hauh si lo!

MOT hi chuan hri hi a len tawh tho tho avangin lockdown hi awmze nei tawh lovah an lo ngai a, hri leng tawh sia kan lockdown avangin chhungkua kan inkhung bet char char a, a chhungkua kuaa positive an pung thur thur mai a nih hi. Chu mi tluk zeta pawi chu mirethei an rethei tawh lutuk hi a ni; electric bill leh tui bill ngaihdam sak si lovin sorkarin hnathawh a phalsak duh bawk si lova, Aizawla sorkar hnathawk ni ve lo zawng hi sorkarin a hrekin a hrek bet a, chu chu Covid-19 a do dan dik loh vang a ni ta a ni.

Ka document neiha a inziah dan chuan, kumin July ni 13 khan Conference Hall, Assembly Annexe Aizawlah Medical Opera­tion Team (MOT) huaihawtin doctor 33 rualte nen inrawn­khawmna neih a ni a. He Joint Medical Consultation hian Total Lockdown neih ṭul an ti tawh lo a, dul deuh zawka inkhuahkhirh ṭha tawk an ti tawh a nih chu.

An ziah dan chuan, "Total lockdown hi tun dinhmunah chuan local transmission a nasat tawh avangin a solution niin kan hre lo a, a ṭul rih loah kan ngai a, amaherawhchu inthlahdul zel pawh a la hun lovin kan hre bawk. Covid positive te hi a rang lama kan hmuh chhuaha kan dah hran vat theih nan Hotspot area identity vat a, micro containment area puan zung zung a, mass testing tih nghal zel a, a ṭul chuan serial testing tih tel bawk ṭha kan ti," tih a ni a, Dr Thiamsanga, Chairman leh Dr Lalrinawma Hnamte, Member Secretary ten hming an ziak hnan a ni.

Mithiamte berin lockdown hi a ṭul tawh lo an lo tih hi a dikzia chu tunah hian kan hmu chhuak mek a, hri vei an tlem phah lova, mahse lockdown vangin rethei an retheih belh nasa tawh hle. Sorkar tan chuan lockdown hi a heksak lova, mahse mipui an mangang a ni.

Lockdown hi MOT berin a ṭul lo an ti chunga kan lockdown tlut tlut mai hi eng vang nge ni ang? Tute vang nge ni ang? Miretheite retheihnaah hian mawh an phur ngam em ni? Lockdown chhan ber hri a pung zel bawk si a, mithiamte rawtna hi pawm ve mai tawh teh u kan Pute u.