RAMRI BUAI - POLITICAL DRAMA
MNF sorkar minister-ten Chief Minister hova hman deuhva 1875 ramri an pawm thu an puan ang deuh tho khan Boundary Committee thukhawm chuan July 30 khan Dy Chief Minister hovin resolution an siam a, 1875 ramri bawk an pawm thu an nemnghet leh a. Amaherawhchu, vawiin thleng pawha Mizoram sorkarin kan state boundary-a a hman chu Forest Department website-a kan hmuh hi a la ni a. Hei hi Mizoram sorkar-in official-a Mizoram state ramri a ni tia a taka a hman a ni, lehkhaah tal. Chuvang chuan a taka hma kan la dawn lo a nih chuan resolution hi vawi 3 pawh pass mah se awmzia a nei lo va, lehkha ah tal pawh kan hauh chin kan tih ang kan hmang ngam lo a nih phei chuan a tak taka bawhzui tur hian anni lo hruaitu dang kan mamawh dawn tihna a ni.
Mizo tlangval lehkhathiam, science lama thiamna sang tak nei Dr Krista Roluahpuia hi vawi khat chu an zirna leh hnathawhna lama conference-ah China ramah a han zin a. A powerpoint presentation ah ngaihtuah chiang lem lovin India ram map kan hman lai hi a tilang zeuhva. China lam chuan an lo duh der lo. A chhan chu China khian Arunachal Pradesh pumpui hi an ramah a hauh a. A tak takin rawn hnehchuh rih lo mah se map ah te phei chuan a rin lut vek a ni. Ramri-ah khian kawngpuite ṭha tak tak a siam nghe nghe a. Indo thut ta ila sipai chak tawk tak nen a tak taka rawn lak mai pawh hi an la tum lo vang tih sawi theih a ni lo a ni.
Dr Krista Roluahpuia sawi dan chuan khatia China hovin an ram ngeia an sawi (Arunachal Pradesh) telna India/Northeast India map a han tilang kha duh loh tak tein an duh lo va. Harsatna a tawk ṭep nghe nghe a ni.
Mizoram sorkarin, a bikin MNF sorkarin, hetianga kan ram china kan pawm chu 1875 ramri kha a ni, a han tih hian map-ah em pawh a hauh ngam loh chuan thu awmze nei lo, thupuarpawleng, mipui bumna emaw tihlungawina mai mai a ni tih kan hriat a ṭha hle.
Sawi tawh ang khan 1986-a inremna kan neihna tura an inbiak khan Home Secretary S.Pradhan-a te lam khan Pu Laldenga kha India constitution Article 3 hmanga ramri tihdanglam theih dan an lo sawi hmuh a. Sawi hmuha lo kawhhmuh mai pawh ni lovin Mizoram Accord ah khan ziakin an dah tel nghe nghe a ni:
"The question of Unification of Mizo inhabited areas of other States to form one administrative unit was raised by the MNF delegation. It was pointed out to them, on behalf of the Government of India, that Article 3 of the Constitution of India describes the procedure in this regard but that the Government cannot make any commitment in this respect."
An sawina ki tak chu Mizofate chenna chin ram suihfin a ni a, mahse an lo kawhhmuh Article 3 hi kan en chuan heti hian kan hmu:
Formation of new States and alteration of areas, boundaries or names of existing States: Parliament may by law
(a) form a new State by separation of territory from any State or by uniting two or more States or parts of States or by uniting any territory to a part of any State;
(b) increase the area of any State;
(c) diminish the area of any State;
(d) alter the boundaries of any State;
(e) alter the name of any State
He danpui bung leh chang hi 1986 hnuah pawh vawi 2 aia tlem lo hman a ni tawh awm e. A nihna takah chuan hemi hmang hian Mizo hlang awmna Zampui tlangdungte leh Zofate chenna chin Manipur-a tlangramte pawh khi dan ang thlapin Mizoramah a suihfin vek theih a ni. Chutianga tih dawn erawh chuan remhriatna te, midang biak thiamna (diplomacy) te a ngai hle thung ang. Tin, state 2 dang sah hek a ni dawn ang a, tuna kan pute ho aia ṭawngkam thiam hruaitute kan mamawh ngei bawk ang, Mizo ṭawng lo lehnghalin. MNF party office ah hian han kal ta ila, an thurel zawng zawng hi hai chhuak vek ila Article 3 hi an lehkha pawimawhah vawi 1 tal a lan chuan thil lawmawm tak a ni ang.
Pastor Thansiama'n Mizo te chu kan pawn lànzia thuk a ni a lo tih ṭhin khan kan nihna hi vawiin thleng pawh hian a la sawifiah viau a. Thuk taka ngaihtuahte hi kan peih lo va, thil harsa a nih phei chuan hetiang ram leh hnam thilah te hian awmze neia han ngaihtuah tluan peih leh bawhzui peih hi kan ram hruaitute zingah hian an vang em em a ni. Amaherawhchu, kan nihna hi kan duh phawt chuan kan thlak thei.
Hmanni-a Mizoram police te leh Assam police te inkahnaah khan Mizo zawng zawng tan lam chu kan chiang vek a. Kan police te pawh an chhuanawm a. Amaherawhchu, han ngaihtuah chiang ta la, Mizoram sorkarin official-a map a hman mek hi I en chuan kan police te inkahna kha Mizoram sorkarin map/ramri-a kan hman mek chhungah pawh a ni lo va. Map-ah hian 306 tih inziahna lai vel hi CRPF camp kha a ni a, a sena "X" tih awmna hi Mizoram police camp kha a ni. Vaiho kha an dik hauh lova, amaherawhchu kan Mizoram sorkar ngei ngeiin official-a map/ramri a hman, forest department leh department dang pawhin an hman hi I en chuan kan inkahna hmun kha Assam state chhunga kan ngaih chu a ni reng si a ni.
Tunah phei chuan kan nem leh vek tawh a, a ṭawng huai ber kan Rajya Sabha MP pawhin Himanta Sarma-a'n dik lo taka a police-te thil ti tura a rawn tirh avanga thupha chawi tura phut pawh a nei zui ta chuang lova, kan Chief Minister ber pawh'n thu mawihnai nem deuh deuh twitter ah leh instagram-ah te a post leh tawh a. Sports Minister phei chuan vai tlawnna ṭhing ang reng deuh twitter-ah a post nghe nghe a ni. Hetiang vel mai mai avang hian kan ram hian hma kan sawn thei lo a ni e.
Himanta pawh nikhua lo, kan State "Himanta" pawh chuti bawk!