SUMDAWNGTE MANGANG AU AW...
Hripui lên tirh aṭanga sawrkarin Lockdown a puan avangin thla 16 zet sumdawnna kalpui mumal thei loin sumdawng ten kan eizawnna zâwnah nasa takin harsatna kan tawk a. Sum lâkluh awm mumal loin dawr luah man, thawktute hlawh, bank interest leh bill neuh neuh kan chawi thlâwn reng a. Hripui lêng kan do tlân a ngai tih hriain sawrkar lama thuneituten ruahmanna an siamin keini a tuar berte min râwnna nei ṭhîn lo mahse sawisel lovin hei leh chen kan ruahpui tawrh ngawt ngawt tawh a ni ber mai.
Sumdawngten hei leh chen kan tawrhna hian rah ṭha a chhuah chuang lo nia a lan avang leh kan state economy-in chhiatrupna a hmachhawn tâk avangin khawvel hmun dangte leh India ram state dangah te pawh sumdawnna leh hnathawhna hmun khârkhip rei lutuk ram economy tân a him lo tih an hriat avanga rei tak tak inkhârkhip lova sumdawnna leh hnathawhna hmun te fîmkhur tak chunga kalpui dân tur sawrkarin an ruahman ṭhin angin, kan sawrkar pawh hian ngun taka ngaihtuah chungin sumdawnna leh hnathawhna hmunte hi khârkhip tawh bik lo se.
Fîmkhur taka kalpui dân tur min ngaihtuah sak turin keini Zarkawt huam chhunga sumdawnna leh hnathawhna hmun intêlkhawm, Zarkawt Entrepreneurs & Traders Association (ZETA) te chuan kan sawrkar kan ngen tak meuh a ni. Kan sawrkar hian kan ngenna min tihhlawhtlin sak thei dawn lo a, Total Lockdown hi a kalpui leh dawn a nih chuan sumdawngte tân chawi belha kal ngaihna a awm tawh loh avangin a hnuaia mite hi min tihhlawhtlin sak turin kan phût tlat a ni:
1. Sumdawnna hmuna Electric bill leh tui bill ngaihhnathiam
2. Bank loan la te interest ngaihhnathiam emaw compensate sak
3. GST Return file theih loh chungchangah late fee awm lo tura ngaihhnathiam. A theih loh chuan sawrkarin kan late fee chawi te min compensate sak.
4. Khârkhip vânga bungraw chhiate min compensate sak.
5. Sumdawnna leh hnathawhna hmuna kan mi chhawrte hlawh min pêk sak.
6. Nitin inhlawhfa Lockdown vanga hnathawk thei lote thla tin sumfai a chhawmdawl.
7. Nitin inhlawhfa te (sumdawnna hmuna chhawrte leh mahni a inhlawhfate tiamin) electric bill leh tui bill ngaihhnathiam.