Kan hriatreng thil ṭhenkhatte

Hripui leng mup mup leh ramri buaina leh inkahna thleng karah hian kan sorkar chak takin inthlan hmaa a intiam ṭhenkhat kha mipuite hian kan la theihnghilh lo a nia.

Sorkarna an siam hnua an chet dan ṭhenkhat pawh kan la hriat reng bawk avangin tlem azawng chu han thur chhuak leh dawn ila. Vairengte daia inkahna a thlen hnu pawh hian Mizo mipui hian hriat reng chu tlem azawng kan la nei a ni.

Mizoram mipuiin kan beisei ṭhup chu cheng nuai thum kha a ni. Hei hi MNF President sawi dan phei chuan cheng nuai thum aia tlem lo dawn tur a ni. MNF Minister pakhat Hnam Runa a thusawi video-ah phei chuan hetiang sem thei lo tura ngaitu chu an mawl ngawt ang, tiin pawisa awm theih dan hi a sawi a, kha cheng nuai thum kha mipui hian kan la nghak reng a ni.

Mipui hian cheng nuai thum mai bakah hian Traffic Jam awm lohna State Capital neih pawh hi kan la beisei tlat a, hengte hi mipuiin kan phût pawh ni lova kan hotute ngeiin min tiam a nih vangin min pek ngei i beisei tlat ang ule.

Serchhip mipuite kha By-Election dawnah khan MNF candidate an thlan tlin loh chuan Rangvamual mipui ang khan tehkhin an ni a, kha pawh kha engtin nge a kal tak zel tih hi kan lo thlir ve a ni.

Serchhip mipuite hi midangte hian kan zuk dah hniam lem lovin a lang a, MNF candidate an thlan tlin loh avangin kan hmusit lova, rilru ZPM deuh phei chuan Serchhip mipuite hi ZPM an thlan tlin avangin an dah sang a, chuvangin hetiang thil hi kan lo la theihnghilh lo tih hi sawi chhuah ve hrim hrim a ṭha a ni.

Budget chungchanga kan state enkawl tura kan thlan tlinte thu em em zia kan hotupa sawi, "Budget chu kan duh leh kan kang thei a, kan duh leh kan bai thei," tih kha kan budget neih mek aṭang hian CMRF lama innghat lo hian total lockdown karah hian mirethei zawkte hi pawisa sem dan a awm thei lom ni aw? tih hi mimawl zawhna angin han sawi chhuak ve ila.

Kan hotupa berin budget hman theih dan a sawi ang khan pawisa awm ang ang hi lockdown vanga mirethei ṭanpuina atan hman theih ni se party tan pawh hlawkna nasa tak a nih theih a rinawm.

Thil kan la hriatreng zinga mi pakhat leh chu sangha bomb chungchang kha a ni. Kha kha an tihsual pawh in puangin pawisa an chawi thlap a ni. MLA aṭanga ban tura mahni MLA pui pawh hek duh khawpa dikna duhtu MLA rual kan ngahna ramah hian sangha bomb tute hremna kha kan la ngaichang a, an hrem loh chuan sangha kan bomb ve sup sup ang tih riau riau a hlauhawm a ni.

Zirtirtu lak dawna, "Iptepui Banna" tih ziak pawh kha theihnghilh a har. Hripui len hnu pawh hian kan la hre reng a ni.