KA PI TE KHA

Nu huaisen, zonu chhulchhuak zinga pakhat, hmeichhe áwmném leh dawldáng zawk ni si, mah se, a ram leh hnam tana huaisena a dawih lo; a ram chin Mizoram hi inches khat pawn tawlh a duh lo tih hi a lang chiang reng mai a. Ka pi te kha ka Hero a ni.

A khuhhawnna:
Mizo nu chhulchhuak zinga awmnem tak pakhat, hlauh leh han zâm eihna nei map lo, mihlim thei leh ṭhenrual pawl tak tur tih hriat sa fahran tak mai. Vairengte tihmingṭhaa chawisángtu nu duhawm tak pakhat chu a ni phawt mai a.

Amah kha:
Pi Lalrinmawii hi Champhai Zotlâng lam chhuak, nu pakhat nia sawi a ni a, a vanglai chuan motor te pawh khalh thiam, mahni inringtawk tak mi a ni tih a chiang hle. Tuna a chenna huan pakhata thlam (maurap in lian vak lem lo tak mai)-a khawsa niin, mi tlawmngai leh mi fel tak, a khua leh tuite tana nu rintlak tak a ni ngei ang tih hi a chiang a.

YouTube lamah:
Khatia Thawhṭanni tlai, 26.7.2021-a Assam Police leh kan Mizoram Police-te inkahnaah khan, a huaisenna social media kaltlangin ka lo hmu a, Mizoram police bunker-ah a mu a, rem leh rem loin lungawi tak maiin Meizial tui titakin a pak khu laih laih a, hlim leh engto lungkhamna nei map loa a awm thei leh hlim sáng chunga a hmel kan han hmu a, ama ṭawngkam takin Pathian mi awmpuina leh venhimna a ni, a tih kha a dik khawp ang. Ka ngaisang e - ka pi tê kha!

Raltek Video Production lamin an kawmna kha ka lo thlir a, a thusawi ṭhenkhat ṭha tih ka ngah mai a, chung zingah chuan, "Nu leh pa thawhchhuah ringawt mai ring tur kan ni lo, kan intodelh ṭhalaite hi a ngai a ni," a tih te kha, a dik hle. Hei kan hre chho mek zel chu a nih ber hi maw...

Keini Zoram ṭhalai, a fing leh a ngaihna hre zawkte hi, ani nu cher te, a hmel leh pumrua han en mai pawha sawr tur tam nei lo tih hriat reng mai, a ram leh hnam Mizoram tana a huaisennate, thihna hial pawh lo thleng se hlau map lo va, vai tàwnah ka zam mai dawn lo, kan hneh ang, kan hneh sa vaiho hi ti tlat ṭhin nu huaisen ka pi hian, "Ṭhalaite hi nu leh pa thawhchhuah ring mai lo a, harhchhuak turin min chah lawm lawm asin!" Engtin nge kan chhan ve dawn le?!

Eng ang thlah nge kan nih?:
Kan ram hian eng ang thlahtu nge kan neih tih lam aiin, eng ang thlah nge kan nih tih hi a pawimawh hle a, vawiinah chuan pa zaidam, pasalṭha Vanapa iangin a tawp a tawpah chuan kan Khuangchera ta a nih hi, hriat a va nuam em. Kan chhehvel hnam dangte hian Mizote thlahtu hi tu nge a nih tih hi kan hrethiam tawh ngeiin a rinawm a ni.

Kap rawh:
Khatia bunker chhunga an awm lai khan Assam lam aṭangin silai a puak a, ka pi hian, bunker bawk kan sipaite chu, "Kap rawh, kap rawh" a han ti a (kan sipaite lahin order an la hmu mai si lo), "Pawnfen ka pe dawn che mi?" a han tih khum leh ṭhin lah tak a, kap tura thupek an han hmu a, Silai a han puak ta chu, "Mizo sipaite ropuizia a va langchiang em!" tia a thusawite kha hriat a va nuam em.

Hun harsa leh buaina a lo thlen laite leh, Assam Police leh Vairengte mipui innawr laite pawha huaisen taka a hmatawnga ṭang char char ngam, inkah laia police bunker-a lo tawm ve tlat - silai mu sur karah pawh ngaihngam leh hahdam taka meizial a pak khu siai siai theite kha; ka pi tê hi a danglam bik a ni.

Kan ram hi huaisen taka enkawla hnung tawlh lo turin a duh a, chutih rualin a hmeichhe puite pawh fuihin, "Hmeichhia hi kan tlawm lo a ni, kan duai lo khawvelah hian," tih hi hriattir khawvel a tum leh duh ber ṭhin ni hian a hriat a, an tlawm lo chiang a nih hi maw...

Chu mai a ni lo:
Mizoramin Parliament House-a thusawi thei tura kan MP neih tawhte zinga mi, Pu K. Vanlalvena, Rajya Sabha MP, Zirlai Pâwl chhum hmin, pa huaisen leh mi tumruh, India ram leh khawvel hriata Mizote huaisenzia pholangtu kan rawn hmu leh zel a, hriat a va nuam em.

A thusawi dik leh ṭha, khawng tak ni bawk site khan Zofate hi min va thlamuan em. Vanapa ianga zaidam leh a ṭul huna Khuangchera anga huaisen a nihnate hian, he a ram leh hnam hi a thlamuanin a va chawimawi em. Huaisenna dika huaisen ngamte, a ṭulnain min nan miau chuan kan chen rangte hial pawh kan lek fahmiang i. Hei lo hi ram dang duh mah i langin, ram dang kan nei chuang si lo...

I ramin a ko che asin, ding nghet tlat a, huaisenna leh rinawmna vawng nung zel turin - Mizoram hi kan Ram a ni.