ARTICLE 3 HNUAIAH RAMRI CHINFEL THEIH A NI EM?
Part 1 of the Indian Constitution kan en chuan Article 1-4 kan hmu a, chu chu The Union and its Territory tia sawi a ni. Tun ṭumah hian Assam nena kan ramri buaina hi he part aṭang hian a chinfel theih mai ang em tih kan zirchiang dawn a ni.
Article 3 kan zirchian hmain Article 2 hi sawi hmasa phawt ila a ṭha awm e. Article 2 hian Indian Parliament chu dan hmangin ṭul a ti a nih chuan Union of India chhungah state lakluh leh siam thar theihna thuneihna sang tak a pe a. Hemi hmang hian Sikkim state pawh kum 1975 khan Union of India chhungah lakluh a ni a. Tin, kum 2015 khan India leh Bangladesh-in Enclave Exchange kan neih khan, khaw 51 lai mai India ramah kan lo seng lut tawh bawk a ni.
India danpuia Article 3 hi chuan state awmsa aṭanga state thar siam, state ram zau zawng leh ramri (boundary) tih danglam mai bakah state hming thlak theihna Parliament-ah a pe a ni. Parliament in Article 3 hnuaia thuneihna hrang hrang a neihte:-
Art. 3 (a): state thar siam chungchanga thuhneihna.
Art. 3 (b): state ram zau zawng tih len (increase) theihna.
Art. 3 (c): state ram tih zim (diminish) theihna.
Art. 3 (d): eng state pawh ramri tih danglam theihna a ni (it is the power of the parliament to alter the boundaries of any state).
Art. 3 (e): eng state pawh an hming thlak sak theihna a ni.
DANPUI SIAMTHATNA (CONSTITUTIONAL AMENDMENT) A NI LO
Article 2 leh 3 hmanga Parliament-in thuneihna a hman hi constitutional amendment a ni lo tih kan chian a pawimawh awm e. Part 1 of the Indian Constitution a Article tawp ber, Article 4 (2) ah chuan, “no such law as aforesaid shall be deemed to be an amendment of this Constitution for the purpose of article 368” tih kan hmu a. Hemi awmzia chu article 2 leh 3 hnuaia Parliament-in dan a siam reng reng te chu constitution siamṭhatna dan article 368 in a sawi ang a ni lo va, chuvang chuan constitutional amendment a ni lo, a tihna a ni.
Heta kan hriat chian ngai lai chu, article 3 (b) - (e) hnuai ami hi khawi emaw ber pawh hi parliament hian Assam-Mizoram ramri chingfel tur hian hmang dawn sela, constitutional amendment a ni thei lo va. Chuvang chuan simple majority in a pass theih tihna a ni. Tih dan phung turah chuan President remtihna (recommendation) la hmasaa khawi emaw House (Rajya Sabha/ Lok Sabha) berah bill thehluh tur a ni. President remtihna (recommendation) la hmasa lova bill thehluh a, pass hnan a nih chuan judiciary-in “doctrine of due process of law” hmangin dan awmze nei lo, dan thi (null and void/ invalid) tiin a hnawl thei a ni.
Tin, bill thehluh reng rengte chu a concern state te hnenah an ngaihdan (recommendation/views) la turin Parliament chu a phut a. Nimahsela, state ina ngaihdan leh duh dan Parliament-a an thehluh kha Parliament-in a pawm ngei ngei tur a ni, tih dan a awm chuang lo.
India danpuia Part-1 (article 2, 3 & 4) te hian Indian constitution chu siamṭhat awl tak (flexible) a ni tih leh Qausi-federal state kan ni tih a entir bawk a ni. Tin, helai part bik hian Union of India chu ṭhiah darh theih loh a nih laiin state te chu thiah darh theih kan ni, tih a ti chiang hle. Constitutional experts leh political scientist ho chuan “India is indestructible union of destructible states” tiin an lo sawi ṭhin reng a ni. India rama state zawng zawngte kan awm ve reng theihna hi Centre sawrkar duhsaknaah a in nghat thui hle tihna a ni. Chuvang chuan ṭawngkam thiam deuhte chuan “the very existence of a state depends upon the sweet will of the Centre” tiin centre-state inlaichinna thuhlaah hian ngaihdan an sawi chhuak fo ṭhin a ni.
A tawp berah chuan India danpui hnuaia ramri tih danglam theih a nih leh nih loh chu ngaihdan kan siam thiam maiin ka ring a. Nimahsela, chutiang anga kalkawng zawh nuam leh awl a ni kher dawn lo tih erawh kan chian tlan a pawimawh awm e. Ti hlawhtling tur chuan centre lamah diplomacy thiam taka hmalak a ngai dawn a ni.
Kan lo zuk sawi ri ve ro ro a nih erawh chuan kan Mizo unau, state danga awm, kan state boundary bul hnaia awm si te hi rinluh hram dan awm se ava duhawm dawn tak em...
Benjamin Lalrinawma