Vairengte Daia inkahna

July ni 26, 2021 tlai lama Assam police-in buaina awm lova ramri vengtu Central Forces Camp pahnih paltlanga Mizoram chhunga lo luta Mizoram police outpost an nawr chhuah thu leh silai an hmehpuah hnua Mizoram police nen an inkah tâk chungchang chuan ram pumah boruak a siam a ni. He inkahna hi ramria inepa inkahna a ni lo va, Mizoram chhunga inkahna a ni a, ramri buai nghawng erawh chu a ni awm e.

Nikum lamah ramri bula Mizo lo leh an thil chin Assam police-in an tihchhiatsak a. Civil miin kut an tuar a. Mahse, he ramri buai hian inkahna a thlen lo. Ramri buaiah hian tunhma aṭangin inkahna a thleng ngai lo niin a lang. Ramri pela lo luta kan ram chhunga min rawn kah chilh avangin tun ṭumah hian inkahna a thleng ta a ni. July ni 26 hi ram dang miin kan ram min luhkhunga min rawn kah hmasak berna a nih chuan Mizoram History-ah he ni hi chhinchhiah tlak tak a ni ngei ang.

He thil ngaihven hian ram pawn aṭangin chanchinbu mi ṭhahnem tak an lo lut a, An rawn buaipui chu Vairengte daia inkahna hi a ni. Inkahna chungchanga thu kan lo fah dan hi tunhnu zel atan ṭha tawkin kan hria em? Vairengte daia inkahnaa Assam police chetdan dik lo chu thupui hlapui ber a nih laiin, ramri buai chungchang kan sawi tam mah mah em? Assam sawrkarin ramria buaina an chawhchhuah ṭhin dan erawh chu sawi chhuahna remchang tak a ni. Assam Chief Minister chuan Mizo rîkrâp zawngin commando sangli emaw lai rawn tirh a tum thu a sawi a, chutih lai chuan Mizoram Chief Minister chuan inrem a duh thu a sawi ve thung a ni.

He inkahnaah hian Mizo lamin ralthuam changtlung tak an neih leh neih loh chungchanga boruak siam an awm laiin, Assam police zahnih zingah hian commando an awm leh awm loh chungchang thua boruak siam erawh chu an awm lo thung. Ramri buaia inepna ni si lova Assam police hi SP ni lova IGP meuhvin police zahnih a rawn hruai thu leh, Cachar DC thupek ni mai lova Assam CM thupek meuhva silai an hmet puak hi a thu a len ngaihtuahin kan sawidan hi a lian tawk meuh em?

Vairengte Auto Rickshaw stand vela Assam police leh mipui an intihbuai chungchang a lar viau laiin Assam police rawn zuitu emaw, Assam police rawn hruai emaw, civil mi Vai tam tak an rawn kal thu chuan sawi a hlawh nep viau a ni. Mizo motor tihchhiat a nih thu leh Assam Police-in mi pakhat an kah hliam chanchin leh thlalakte chu National paper-ah a lang pha meuh lo. Mizo an kah hliam chhawmdawlna emaw, zangnadawmna emaw, Assam sawrkarah phût a nih leh nih loh chu dan hremi leh sawrkar hmalak dan azir a ni.

Assam police thi leh hliam eng emaw zat an awm laia Mizoram police thi an awm loh chhan chu zawhna langsar tak a ni. He zawhna hi kawng hrang hrangin a chhan theih. An tam avangin Assam police hian Mizoram police an zuam sual deuh a ni thei. Mizoram police angin Assam police an fimkhur tawk lo a ni thei bawk. An inkah hnu rei lo tea puan var zar a nih vangin Mizoram police-te chuan an kap zui ta lo niin a lang. Inkap rei deuh chu ni se, thil pawi leh zual a thlen hlauhawm tak a ni.

Hetiang thil lian tham a lo thlen hian chanchinbu miten tutu emaw interview an tum ṭhin. Amahreawhchu interview hi duh loh theih a ni a, ṭawng thiam tak tute emaw nena lo dawnsawn theih a ni bawk. Chanchinbu mite hmachhawn tur sawrkar aiawh tu emaw inruat nachang kan hre ta niin a lang a, hmasawnna chi khat a ni. Chief Minister leh Minister tu pawhin a sarhu laia thusawi dan tawk an thiam a pawimawh. Media hman ṭangkai dan kan hriat phah sawt a beiseiawm bawk.

India rama British Lalnu lo kal chungchang magazine-a an chhuah dan chuan chanchinbu kalphung a hril thui hle a ni. Bombay khawpui mawi leh thianghlim lai Marina Drive vela a kal thlalak tilang lovin bazar chep leh ṭawp Bhendi bazar-a a kal lai thlalak an tilang a. New Delhi hmun ropui laia a kal thlalak tilang lovin Old Delhi hmun changkang loa Sai chunga a chuang thlalak erawh chu an tilang thung. Dawt ni si lo vin, thudik ni tho siin chanchinbu mite hian boruak eng emaw an siam theih avangin chanchinbu mite hmachhawn dan chungchangah fimkhur thiam a ngai hle a ni.

Mizoram buai lai aṭang tawhin phai lam aṭanga bungrua kan lak luhna kawng danchah a ni fo ṭhin. National Highway dangchata ṭhenawm state inhrek chungchang hi ngaihtuah chian a ṭul khawp mai. State pakhatin an nawm an maka National Highway danchah chungchangah sawrkar laipuiin dan mumal a neih loh chuan siam a ngai tihna a ni a, dan a neiha palzut a nih erawh chuan dan hmangin hmalak a pawimawh a ni. Tun thlenga National Highway danchah a nih thuah Central sawrkar chuan hma a la la rih lo va. Eng chen tak ngawi dawh

ang maw?

Tun ṭuma National Highway danchah a nih chhan hi Assam police thi leh hliam ṭhahnem tak an awm vang nia sawi an awm a. Chu chu thu dik ni ta ang se, he vanduainaa mawhphurtu chu Assam sawrkar an ni. Chumi ahnu, hmana kawngpui an dangchat lehzel hi chu an tan thiam thu sawi tur awmin a lang lo. Mipui thinrimin kawngpui an dangchat niawma sawi hi a dik chuan Assam sawrkar leh Sawrkar laipui an inrawlh duh chuan harsa lo taka chinfel mai theih a ni.

Tunhma chuan kan ram hruaitute'n phai Vai nen kan intihbuai chuan kawngpui dangchatin min hrek anga nasa takin kan tuar dawn tiin mipui min sawiṭhaih ṭhin a. Tunah chuan rambuai lai hre pha lo ṭhalai rual chuan phai Vaiin kawngpui an danchaha min hrek hlauhna an nei ta meuh lo. Amaherawhchu, National Highway dangchata ṭhenawm state-in min tihbuai fo hnu pawha kan ṭhenawm state Tripura leh Manipur nena indawr tawnna leh inkalpawhna kawng ṭha hlamchhiah a la ni ta reng mai hi chu inthlanpui lo awm leh tur atan political party hrang hrangten au hlaah hmang ta ang sela chu hmasawnna duhawm tak a ni ngei ang.