A thawh thumna (3rd Wave)

March 2020 hnu lama a vawi khat nan, boruak muanawm leh chanchin hriat nuam tak takin min nangching chho ve ta zel a. Kan ṭawngṭaina hlaah pawh Pathian hnena lawmthu sawina chuan hmun thuma ṭhena hmun hnih lai chu a awh chho hman hial awm e. Kohhran inkhawmte pawh khuahkhirhna hnuaiah kalpui theih a ni leh ta a, ava lawmawm em! Tin, sawrkar hotute lam aṭanga thuchhuak angin zirna in tam zawkte pawh an hawng ve leh ta sap sap a.

Bible kan thlir chuan Exodus saltanna ata Isarel fate chhuah zalentir an nih laia an lawm dan/an hlim dante kha kan thinlung hian a pawh pha hman hial ang! Khuahkhirh nih hnua zalenna hlutzia chu a takin kan tem a ni ber. Kan hripui pawh hian a tlin ta reng dawn bik lo a ang ta hle mai, tih thu chu chhungkhat paho titi tual leng a ni. Beiseina chuan mitin nunah bu a khuar ṭan a, khawvel hnim ruih tawh pawh a rawn par chhuak leh ta chhap mai! Ekhai! Dam man a va awm ṭhin em!

Amaherawhchu, kan chan loh khanah kan ti dawn nge? Boxing-a one-two chauh zir, three-four dawng thlawn ta char char kan tih pa-in three-four a lo zir tel ve lova, a dawng thlawn char char ang mai khan, hripui thawh khatna, one-two chu Pathian hruaina in kan paltlang thei mai a, mahse three-four a la awm tlat. One-two paltlang tak avanga hnehna changtu emaw inti ta, zalen ta riauva inhria, hmai tuamna leh sawrkar thu lo anga awm pawisa lo kan tam ta tial tial mai.

Hrehawm tuar rei, inkhuah­khirh rei tawh tih atan chuan a mawi lo kan ti ngawt thei chuang lo, mihring ve tho, khuahkhirh reng ngeih lo vek kan ni si a. Mahse, three-four hmachhawn tur kan la nei a nia! 2nd wave, hripui thawh hnihna chuan kan kawngka a rawn kik leh tak dawt dawt saw aw... ṭhenkhat phei chu a luhchhuah hneh leh pek tawh hle.

Three-Four
He kan khawvel pum huap hripui thawh hnihna, 2nd wave hi Europe ram lian ho, France, Germany leh South America lama Brazil-ah te khuan a nasa a, a tuar hmasa an ni. Uluk taka vui sen loh mihring ruang an tihral zung zung a ngai hial. One-two a lungawi, three-four laka inven tum lo an ni ti ila kan sawi sual awm love. A thawhkhatna dona kawng, one-two lakah India pawhin ṭan kan la nasa in hma kan sawn viau a, kai zat pawh kan tlem sawt hle.

Mahse inthlan boruakin min han nangching a, rilru leh ngaihtuahna fim hman theih lohna politics-in min chiah chhova. Kan P.M hovin election rally-te an nei ta mup mup a, three-four lo thleng tur, hripui thawh hnihna laka inven chu pawisa lovin thlamuang takin kan nung chho ta mawp mawp a.

Kan mithiamte rin lawk ang ngeiin a thawh hnihna, 2nd wave chuan min han nuai leh ta a, khawvel pum thlira hri kai tamna ber nihna duhawm lo tak chu kan thleng chho hial! A thlawnin three-four kan dawng mawlh mawlh mai zawng a nih tak hi! Inenkawlna hmunhma kan neih leh hmanruaten min daih lova, ram dangte puih ngai hial khawpin kan tuar chho ta.

Mizoram pawh kan bang bik lo, ngaihzam rilrukna nei deuh chung si, mahni aia midangte tana hlau zawk awma kan awm laiin sawrkarin inkhuahkhirhna dan, hreh tak chungin a zam a ngai leh ta a. A tam zawk chu kan tawm leh ta ṭhap mai.

3rd Wave
He hripui thawhkhatna leh thawhhnihna hian kan taksa mai bakah kan rilru leh mihringte kan nun hona kawngah harsatna tam tak min siam a. Indonaah chuan “united we stand, divided we fall” an lo ti ṭhin a. Amaherawhchu, tun ṭum kan boruak zet zawng, “united we fall, divided we stand” tih a lo ngai ta.

Hri a lo len tirh lai ai khan kan fimkhur ṭha peih tawh lova, hri kai kan pawisa ta lo tial tial mai hi thil buaithlak tak a ni. Chu chuan hri a tidarh nasa viau. Total lockdown a ni chung pawhin ṭul lova pawn chhuah leh inlenpawh kan la ching hle. Lockdown puan kher nghak, sawrkarin SOP a tihchhuah hnu chauha fimkhur tum, mind set dik lo pu kan la awm nawk niin a lang.

Sawrkar thuchhuah hunah chauh lo pawh, theihtawpin fimkhur takin nung ila, kan dinhmun pawh hian zual lam a pan lo zawk ang em? tih chu ngaihtuah tham a ni. Tin, pawn kan chhuak a nih pawhin a fimkhur theih tih kan hriat a ngai, fimkhur leh fimkhur inkarah chuan hri inkaichhawn a tlem zawk ngei ang. Kan chenpuite bulah lo chuan kan hmai tuamna hi han lathla lo tawp thei ila.

A thawh thumna lo thleng leh tur pawh hi kan kutah a innghat a, a hri hi amahin a darh mai thei lo, a pu darhtu chu a mihringa te kan ni. Ngun taka ngaihtuah chuan, a hri hi ni tawh lovin, 3rd wave chu keimahni hi kan ni. Hlau ni lovin fimkhur taka nun kan hman a, theihtawp kan chhuah a ngai tak zet a ni.