HRIPUI KAN DO HNEH THEIH LOH CHHAN
Mizoramin Covid-19 kan do hneh theih loh chhan hi pahnih leh pahnih belh chu pali (2+2 = 4) tih tluka chiang leh pawm tlan ni si chu a awm thei lo vang. Mahse, ka puh ve dan chu chiang tak a awm. A thawnthu sei tak a awm a, mahse, mipuiin kan hriat vek tawh avangin a tawi zawngin sawi ang.
1. A thawh khatnaah kha chuan kan ti ṭha:
A thawh khatna, kum 2020-ah kha chuan, thi pawh kan tlem a, kan tiṭha hlein a sawi theih. Kan sawrkar hotu lam aṭang pawhin, khawvelah a tiṭha ber kan nih loh pawhin, a tiṭha pawl chu kan nih ngei rinna pawh a awm a nih kha. Kan ram hruaitute pawhin fak an hlawh a, a nuam hle.
2. A thawhhnihna chu kan hneh thei ta lo:
Kumin, 2021-ah a thawhhnihna a lo thlenga kan hneh ta lo. Lockdown dul deuhvin April thla aṭangin bul kan ṭan a, kan hneh loh em avangin hmanraw chak zawk, total lockdown kan hmang leh a. Tlak hniam lam a la pan theih loh avangin, test runpui kan kalpui leh a. Chu pawh chu kan la tlakhniampui theih loh avangin, kan sawrkar hruaituten ṭawngkam hawihhawm takin, lo ngaithiam hram hram tura mipui ngenna nen total lockdown an pawtsei leh ṭhin a ni ta ber. Tihdan thar, hmanraw chak zawk lek tur kan nei tawh lo. Chutih laiin, lockdown rei tawh lutuk chu, mi tam tak dinhmunin a tuar tawh ngang loh thu a lo ri nasa ta a, a dik bawk si. Hetih lai hian hma lamah beiseina eng neih thiam a har, rilruin ar bo a zawng.
Beiseina eng kan neih theih chhun chu:- (1) Pathian hnenah ṭang lehzualin ṭawngṭai ila, a zahngaihna kan dawng mahna tih te, (2) Hetia kan kal zel chung hian vaccine lak lamah tal hma kan sawn ang a, vaccine lak zawh chuan kan chungpikna chu a tla huai ang tih beiseinate an ni.
3. Party mal rilru ṭha lo tak avangin kan intlawhping a ni em?:
Kum 2020-ah Pu Lalduhawma MLA-in, sawrkarin RT-PCR khawl a mamawh chuan a pek theih thu a hrilh a, mamawh lova an insawi avangin a pek tak loh thu vantlang hriatah a sawi. Pu Zodintluanga MLA-in, RT-PCR khawl Lunglei Civil Hospital-ah a pe a, tun thlengin hman lohvin a la awm. (a thawnthu sei tak a awm) Serchhip bial Bye-Election zawh hlima Pu Lalduhawma MLA-in Assembly special session kohva, kan budget pawh Covid-19 dona atana siam rem a duh thu a sawi pawhin ngaihpawimawh a hlawh bawk lovahte hian kan intlawhping niin a lang. Engti zawngin maw?
Kan sawrkar hian ram leh hnam thil pawimawh a nih hre thiamin, party mal rilru zimte pu lovin, rilru inhawng takin khawl ṭha pahnih mi mal pek khi dawngin hmang se. Budget pawh Covid-19 do thei zawng tura siamremin, pawisa pawh tam zawk deuh ruahman ni ta se. Tuna RT-PCR khawl pahnih, kan hman hi pali a lo ni tawh ang a, a la ṭul chuan khawl dang pawh lei belhin, thawktu pawh voluntary ngawt ring lovin chak tawka thawk thei khawp tur lak belhin, total lockdown kan tihtirh aṭang khan test beihpui han thlak ila, tuna kan thlen chin ai hi chuan a sawt zawk ngeiin a rinawm.
Tuna kan dinhmunah chuan, beihpui pawh thlak dawn ila khawl a indaih lo. Peksa pawh hmang duh lo tan lei belh a rem thei bawk lo. Beihpui thlaka thawktu tihtam ngawt thu pawh awm theiin a lang lo. Kan vaia ṭanhona rilru zau pu lova, Party mal rilru zim kan putna avangin Covid-19 dona kawngah kan intlawhping ni ngeiin a lang.
He ka thu ziak hi party mal rilru chawhthawhna ni lo se ka ti hle mai. Ram leh hnam pum issue thilah hian party inlak bingna rilru ṭha lo hian tunah pawh kan ṭan a tihtawp tlat theih avang hian, mahni ṭanghma atan leh party mal atan mai ni lo, kan ram leh hnam pum tana ṭha politics hi i ngaihtuah ṭheuh tawh ang u.