KAN BUAIPUI HI LAILAPUR RAJU-A AIA LIAN A NI

Ningani khan Mizoram sawrkar thuneitute tirh ni lo, an hriatpuina-in Assam ram lamah kan zuk kal. Kan kal dawn hian Lailapur lama an BJP hruaitu Raju-a te kan bia a, "Rawn kal rawh u, engmah harsatna in tawk lovang" tiin min hrilh thlap. Min bum theih avangin nuam ti vak lovin kan kal a, kan han thleng thla ta chu Guwahati pum khu tlan chhuak vek mah ila harsatna kan tawh a rinawm lo a ni!

Lailapur kan awm chhung hian a tam thei ang ber mi ka kawm a, motor a tlang loh chhan hi nangmahni em ni? tiin zawhna ka zawt kual hlawm. Fimkhur a ngaih avang leh silai inkahna a thlen hnu Mizo civilian kal chhuk hmasa ber ka nih avangin, fimkhur a ngai zual, a dai kil ngam vak loh.

Zawhna an chhan dan tlangpui-ah Lailapur emaw Bagha mipuiin emaw kawng an dang lo a, Assam sawrkar-in Mizoram a Assam mipuite lut lo tura an tih avanga kal ngam lo an nih thu an sawi zel. Mizorama motor luh leh luh loh chu "Assam CM thu thu a ni mai" tih hi chhanna khaikhawmna ani. Video a thusawi tir ka tum hlawm a, an han ngaihtuah vel a sawi ngam an awm ta lo. Tu vanga economic blocked hi thleng nge a nih tih a lang ta kuk mai.

Inrinni khan Assam Minister pahnih te kawng a tlang theih nan Lailapur-ah tirh an nih thu kan hria. Aizawl lam Journalist te Assam a luh a, lirthei tang­khangho kawm an duh leh ta a. Khulam ho zuk be tura min tih angin ka zuk biak sak a, kan himna atan engmah min tiam thei ta tlat lo. "Kal loh a ṭha mai lo maw" tiin rawtna ka siam nghe nghe.

Amaherawhchu, an rawn kal laklawh si a, nuam ti lo zetin kan zuk kal ta tho a. Assam Minister pahnih hi tlailam dar 6:00 vela rawn thleng tur anga min hrilh avangin, nghah chhuah chi-ah kan ngai ta lo a, dar 3:00 velah kan haw leh ta a ni.

Assam ṭanfung chu "Sawrkar-in kawng a dang lo, mipui dan a ni" tih a ni. Chuvangin, mipuiin motor tlang tur an dan a ngai a, mipuiin kawng nizan khan an dang ta ngei a ni. Assam sawrkar drama chan hi 2020 kum khan kan hmu tawh a, 2021 hian kan hmu leh ta a. Hetiang thil an ti ṭhin hi a pawi hle. State pahnih mipui min in huat tir hi Assam sawrkar hian a tum em ni? tih hi ngaihtuahtham tak a ni.

Inrinnia mipui an tihten lirthei an khawih driver-te chu an mipuite zawkin an lo hum him a, chaw te an lo pe ve leh lawi a. Zanah te an inah riahtirin humhimna an lo pe ta zawk a! An kawng dan mipuite puh tuma an drama chan tuartute hi Assam hian zangnadawmna a pe ngei tur a ni ang.

Assam-in Mizoram chak lakna kawngpui an dan hian Mizoram hian kan tuar fal nalh bik lo. Lailapur aṭanga Silchar thlengin an tuar ve vek. Khung laia tuar nasa ber chu lirthei lian hmanga eizawngtute khu an ni. Loan a an lirthei lak te chu a ding ṭhuap a, Mizorama an rawn luh theih hun an nghak ṭhuap mai a ni. Sumdawng lian zingah chuan Lailapur khu a tuar nasa ber an ni thung.

Lailapur hnai lamah bungraw phur lirthei tangkhang an awm meuh lo, Bagha bul aṭangin an awm phei ṭan. Dholai bulah a ding tam ber a, bungraw phur zingah eichawp phur an vanduai a zual. Alu leh Purun a ṭawih nasa a, kawngsira paih te pawh a awm nual. Rod phur erawh an vannei viau thung.

Tarlan tawh angin motor lian hi loan a an lak a ni deuh zel. Khuatia an din reng khu chuan loan rulh a hun ang a, an loan lakna te an buai ang a, anmahni pawh an buai hle dawn a ni. Mizoram mihring nuai 13 vel awmna hisapa an motor te hi loan a la an ni hlawm nghe nghe.

Ramri hnaih khuaa a bengchheng ber Lailapur khu economic blocked tuar nasa ber an ni. An brick siam dawrtu an nei tlem hle a, Hmarveng rod zawrh leh chhim veng rod zawrh inthleng bak tihtur nei pawhin an lang lo. An bungrua te khu a baa an lak a ni ve tho a, kawng hi thla khat dan a nih vaih chuan anmahni dawrtu hmel aiin ba ṭhing hmel an hmuh zin zawk a rinawm.

Han ngaihtuah vang vang hian khunglai mipui khuan engemaw chang a road block ni hnih khat an neih bak hi chu, tuemaw an ngam loh a chet vel avanga thleng ṭhin a ni tih a hriat hle. Nikuma hun rei tak kawng min dan sak ṭuma Dholai OC hnena Mizoram a lut tur motor dang vek tura hrilhtu pawh Cachar DC a nih thu Dholai OC ngeiin a sawi palh tawh a ni.

Lailapur sumdawng pakhat Politics lama zuanglut ta in a thawh fuh loh tuka Mizoram kawng a dang mai ṭhina kan ngai hi ngaihdan dik lo a ni.