Engkim hretu hnenah dawt sawi suh

“Lalpa ka hma­ngaih che a, I duhdan angin nun ka hmang tawh ang” tiin Pathian rinchhana nun neitu nia inchhalten Pathian kan be ṭhin a, a thu hi a mawiin a nalh a, kan Pathian duhdan pawh a ni. Mahse, ringtute hian dawt mawi takin kan sawi ve fo ṭhin. 

Engkim hretu Pathian chuan nang leh kei hi min en chhin a duh ṭhin. Amah kan ring ngam tak tak em? tih hi. Keimahni zawl tawk ni awm taka kan biak hi tam tak a awm ṭhin a, a chang leh thupek ang reng deuhin Pathian chu kan be 

ṭhin a, kan thil duh kar nan tiin kan duh dan te kan thlen ṭhin. Kan duh ang a lo thlen lohvin kan vui a, kan titau a, tlanchhiatna tur kan zawng a, he khawvelah hian tlanchhiatna tur a awm lo; setana ang­chhungah bak. 

Kaina khan a nau a thah khan a nau thisen aw chuan Pathian beng a thleng a ni. Pathian chuan kaina hnenah “I nau Abela kha khawiah nge a awm tak?” tiin a zawt a, hre reng chungin a zawt a ni. 

I nuna thil ṭha lo i tih khan Pathian-in a zawt ṭhin che tih i hria em? In ngaihtuah chiang rawh le. Kaina chuan, “Ka hre lo. Ka nau vengtu ka ni em ni?” tiin a chhang ve fak mai. 

Pathian chuan, “Engnge i tih tak ni? I nau thisen aw chuan lei aṭangin mi au asin...” a ti ta dawt mai. Abela kha Kaina nau a ni a, a vengtu tur chu a u Kaina kha a ni. A vengtu tur berin a nau a that ta si a, leia thisen bua chuan Pathian beng a thleng a, Pathian a rawn inrawlh ta. 

Adam leh Evi khan Pathian thu an zawm lo va, Pathianin a zawh khan an thiltihsual dan kha zak takin an lo dawngsawng a nih kha. A aia sualna zawk tualthahna a lo thleng leh a, Kaina chuan Pathian a chhan danah a sual a zep a, chaltlai takin Pathian a chhang a ni. Kaina’n sual rapthlak tak a ti a ni. Kaina hun aṭang hian sual chu nasa takin a pung ta a ni. 

Kawng hrang hrangin kan inenfiah a ngai. Kan politics tualzawl bawlhhlawh dan em emte hi! A lemin kan nung a, Pathian kan hlau bawk si lo a, Pathian hmaah dawt kan sawi fo te hi zep thei turah kan inngai em ni? 

Kan fate tihchang­kang kan tum luatah sualna khurah kan tla lut fo ṭhin a nih hi. Dawt sawi loh hi a him ber a, thil kan tihsual chuan sual sima Lalpa hnen kan pan chuan a nin min lo kuangkuah dawn a ni.