Kan buaina chu ram inchuh a nih kha aw

Mizoram leh Assam kan buai chhan chu Himanta sual vang kan ti ringawt a, a dik lohzia sawi tam a ngai.

Kan buaina hi chu ram inchuh thil a ni a, kawng dan issue-ah a chhuak leh mai dawn. Nikumah ramri kan chai kan chai a, a tawpah Lailapur-a Raju pawlte kawng dan tih mai maiah thu a tawp zuih ṭut tawh tih i hre thar ang u.

Nikumah Assam an inthlan dawn avangin boruak siamna atan Assam BJP sorkar chuan ramriah thawm an rawn nei a ni. An hlawhtling ta renga BJP MLA pawh ramri kiangah an rawn nei ta reng a ni. Mahse nikuma an buai pawh khan a tirah ram kan inchuh a, mahse a hnuah kawngpui dan issue-ah a chhuak daih. Kan MLA leh Minister te pawh kan Police te bulah Vairengte daiah silaite thla an zuk lak pui sup sup tawh a, a thlanga Raju te kawngpui dan kha chu an hawn tir thei der si lo tiin kan sel tawh, kan la hria ang.

Assam Police-in July 26 khan kawngpui an rawn dang lo tih i hre thar ang u khai, kha tah khan kan ram min chuh a ni. Assam Police khan Mizoram Police Duty Post ngei an rawn la a ni. Silai nei ve ve, mahni Duty Post inchhuhsak tir hi chu kah let ve nghal rup loh chi a ni lo.

Vairengte mipui huaisenin silai an rawn hmachhawn a, Assam Police an zuk vawm ngam a, kan thang lamah Assam zawkin silai an rawn hmet puak ta chiah chu Duty Post chhuhsak tawh Mizoram Police te chu a hma aia remah awmin an chhuk sai ta siah siah tih pawh kan hria, Duty Post pawh kan la let leh a ni. Hetah hian hriatreng tur chu inkah hmaa kan dinhmun ngai kan awh a, ram kan lak belh miah lo.

Mizoram sorkar chuan 1875 ramri chu kan ramria a pawm a ni a, tunah hian Vairengte daiah kan inkap chauh a la ni a, kan ram lak let tur a la tam a ni. Chulai karah chuan kawng dan leh kawngpui hawn issue-ah kan ram inchuh issue hi kan tawp tir palh chuan a uihawm dawn lutuk a ni.

Lalremruata