Twitter lar thar thut hi

Kum 2006 khan Twitter hi an lo siam daih tawh a, khawvel hmun hrang hranga news zawnna atan an hmang ṭhin an ti. Ngaihdan puan chhuahna ṭha tak a ni a, rang tak takin khawvel hmun danga mite a thleng thuai thuai thei a ni. He social media chi khat hi Mizoram ramri buainaah a rawn lar thut a, chumi kal chho dan chu mahni chik dan leh thiam dan danin i han chhui ve teh ang.

Mizoram Chief Minister Pu Zoramthanga hian an sorkar hma kha chuan Twitter account hi a nei lova, kum 2019, June thla khan a nei ve chauh tih a twitter accout ah a inziak a ni. Twitter ah hian thu a puang (tweet) ve ṭhin tak nangin Mizoram mipuiah nghawng a nei ngai lem lova, ṭhalai tlem azawng leh Twitter lam leh news ngaihven te lo phei chuan kan Chief Minister Tweet hi an hre ngai lovang. Mahse July 26 ramri buainaah khan Himanta Biswa Sarma Assam Chief Minister nen chuan an pu Amit Shah lakah thiam chang zawk nih inchuhin an in hek tawn tih kan hmu a ni. An inhek dan kha unau intibuaiin, "A Pa, hei A U hian min rawn hnek a nia," tih leh, "Nagmahin min ti hmasa a nih kha," tih ang deuhvin naupang chhia takin Twitter hmangin an in hek kha kan CM Twitter lar chhan a nia, follower a sing tel tak meuh meuhvin a neih phah a ni.

Buaina a chhuak ta a nih kha. Assam Police an thih bawk avangin Vai style chiahin dawt nen Mizoram chu media hmaah thiam lovah min chhuah a, a na kan ti a ni. National media lamin TV-ah min rawn kawm ve a, kan MP te an insawifiah zo si lova, kan Minister an khah a chih tlat a ni. Hetihlai hian min chhanchhuaktu an rawn lang a, chu chu Mizo ṭhalai rual an ni. A hre chiangte sawi dan chuan K POP fans an ni an ti. Inthurualin Twitter ah Assam thiam loh zia an puang ta a ni.

He mi hma hian social media hrang hrangah hashtag #assamshotfirst tih cbhu a lo lar tawh a, Twitter hian #himantaistheproblem #shameonhimanta tihte thil hrang hrang a rawn trending ta a ni. Assam Chief Minister hian mak a tih thu a mi Tweet dang rawn share in a rawn puang a, ram dang mi inrawlh hial in a ring a ni. Kan ṭhalaite hian an bum a, ram dang aṭanga Tweet angin an bum lêt ve a, Himanta an huatna thu hi an au chhuahpui a ni. Hemi hnu lawk hian kan Sports Minister Pu Robert Romawia Royte chuan Mizo ṭhalaite huat rawn Himanta nen an hun hman dun tawh, buaina thil ni si lo, Himanta hi a tlawn ta emaw tih tur a rawn Tweet leh chiah chu a hmaa Himanta beitu ṭhalai te khan kan Minister hi an bei ve leh ta a, a tuk lamah Political Party dangin kan Minister an rawn dem ve bawk. Social media hi chu hman thiam leh hman thiam loh a awm tih kan zir chhuahna ni se, Mizote inpumkhatna hi chu chhiat phah lo se a ṭha ang.

Minister dangte pawh an Tweet ta sup sup a, kan Rajya Sabha MP hi tun hnaiah Twitter ah hian a tui thar bawk. Kumin March-ah account a nei thar a, March 28 & 30-ah a Tweet a, a reh vang vang a, July 28-ah Assam Police thite a tawrh puina a rawn Tweet a, he mi hnu hi chuan ni khatanah vawi hnih vawi thum a Tweet tlut tlut a ni. Khawvelin a lo tleipui em em tawh hnuah tun hnaiah Twitter hi kan tuipui chho tulh tulh dawn tih a lang ta a ni.

Machhandama