COVID-19 KARAH PUITLING TAKIN AW

Ram hruai hna te, khaw­tlang leh pâwl hruai hna te hi a hautak hle. Kan hotute hian an tlin ṭhin zâwk ngawt mai. Tam tak hi ni ve dawn ta ila, chhuanmang rorel hi a tamin rinawm e. Kum 2020 kum tir lamah, Covid-19 hri lêngin min tuam tirh lai khan ramria lût rû tur te veng tûra mahni puanthuah têl a. Thosi leh vangvat kara riak chhuak te leh an awm hmuna vilzuitu mimal leh tlawmngai pawl hrang hrangte kan theihnghilh love.

Kan hotu te, LLTF/VLTF te pawh an hah ta. Thuawih lo leh mi phawsawlh te vânga pawisawi lo te tawrhna zozai hi engtiang taka runthlâk ni ang maw! Mawi lo ni lo sela; chung lam hian heng mi tihmawh te, thuawih duh hauh lo; hrilh hrilh pawha zawm tum chuang lo te chungah hian eng emaw tak chu a la tih kan ring a nih pawhin rinthu mai zawng a sual lo vang e.

Mi puitling lan chhuah hun a ni: Kan himna tûra hmalatu, roreltute bakah task force lam te, damdawi lam mite; a kul a taia ṭangte phei chu an hah zual tih kan hria. Mipuiten thuawihna leh ṭawngtaipui lamah ṭan lo lakpui ve zel ila. Ram leh hnam tana ṭha tur a nih dawn phawt chuan sawiselna karah pawh thawk ngar ngar peih; a hruai thlen tuma chiang, ṭhenkhatte sêlna karah pawh tuang tichhah thiam, mahni inphata ram leh hnam tana thawk ṭhinte hi an hlu a.

Chutiang nun tlang (integrity) chu mi zawng zawng neih theih a ni lêm lo; zir theih leh chutiang tura inbuatsaih theih erawh a ni ang a, ram leh hnam tân huai takin kal zel rawh se. A hun lova tuang tih chhah erawh chu inchhirna zakhua thlentu a chang thei thung.

Roreltute pawhin hei hi hria sela: Midangten min sawisel hi huat tur a ni lova, huat loh ngawt tur pawh a ni bawk hek lo. An sawisel lai chu a thlir ang a, tihsual lai deuh nia lang chu a inpawt lêt vat ang a, insiamṭhat nân a hmang hlauh tur a ni a. A huna tlâwm ngam thei khawpa mi huaisen hi an hlu lehzual a, an ding chang ṭhin.

Mipui lamin kawng eng­kimah lang tlang (tran­sparency) sawrkar kan bei­sei­na a lian tulh tulh tih hai rual a ni lova, chu chhung­ril nun ṭhatna (moral reform) inmûn mêk chu a par chhuak dawn a nih ngai chuan tûn hi hun ṭha a ni ang a, ram leh hnam tân pawh ro hlu tak tur a ni ang. He hun ṭha hi kan bawhpelh a; kan insawi pial emaw, kan inchhang liam mai mai emaw a nih chuan hmalam êng tak a la hla deuh tihna pawh a ni thei ang.

Diknain a hneh ṭhin: Patling chuan ram dinhmun a thlir ang a, insêl hun nge ṭanrual hun tih a hrethiam tur a ni. A vei zawngte puak chhuah hun nge tawmim rih hun tih pawh a man thiam tur a ni bawk a. Mi chhiat lai taka thang ṭhat lak lo tum te hi kan hnam nun atâna kan duh leh duh loh tilangtu chu keimahni tho kan ni ang a. Ṭhangthar leh zelten, “hetiang hian kan ti ngai lo” an tih tur erawh kan siam thiam tûr a ni ang.

Inbeihna mualah hman­raw hrang hrang awm bawk ṭhin mah se, ni leh thla kara lêng; “zangkhua pawhin bungbut hun a la nei chêk ang” tia dikna duh leh thlir tlat hnam kan ni tih kan hriat reng a pawimawh a. Dikna hian a hneh ṭhin tih hi a thunawn ni reng rawh se.

Beiseina i nei tlat ang u aw: Hnam huaisen, râl leh sa hrâng hmaa zâm ngai lo, chem tum nen chauh pawha he ram lo hûm ṭhin te rorêlah; tuikhûr ral pawh kai lo te thu leh hla ang deuhva ṭial a lo awm châng te hian ram veitu chuan hrehawm a ti ang a, “heti lo deuh hian nise aw” han tih ve rauh rauh tûr a nei ve maithei e; nimahsela thuawih hi inthawi­na aiin a pawimawh a, a zawm kawngah kan ngal tha tichak sauh sauh ila.

Pu Rokunga’n, “Tunah doral lian chhum ang zing mah se, a la kiang ang hnam tin rûmna hi; hnam tin lung­rual dar ang kan lenna tur ni, a her chhuak ang chung Pathian zarah” a lo tih leh Pu C Zoramliana’n, “Lungngaih chhum zing buaina thleng ṭhin mah se, kianni a awm ngai e, hliampui tuarin ral lian tawng ṭhin mah la, ṭang fan fan la aw, lungphang suh la” an lo tih angin he hun harsa hi Pathian zarah kan la pel ngei ang.

Engpawhnisela, kan dam ang a, ‘dam leh tlang khatah; thih leh ruam khatah’ ti ṭhin hnam hian a ngho var ṭha ṭha kan la kap mawlh ang a, chawng ṭha mi pawh chung Pathian zarah amah nen kan la chên ngei tur lah ni!

Beiseina a nun reng theih nân lungrualna nen ṭan la ila, kan ram leh hnam min petu Pathian hnenah i tlu lut zel ang u.

Zonunsanga