Media-ah chak zawk a awm theih em?

Tun hnaiah ramri buai chung­changah Assam leh Mizoram chu media war nei angin kan sawi nasa khawp mai. Kan sawi zui danah pawh Mizoram chu tun ṭum chu media war-ah chak zawk angah kan indah deuh niin a lang. Nimahsela hei hi chu mahni lungawina mai mai a ni, media inelnaah chak zawk a awm theih tak tak loh a ni.

Chakma nen kan buai nikhua hian media ah chak lo zawk em emin kan in chhuah ṭhin tih kan la hre awm e. Hei hi Chakma lam version national media lamah kan hmuh ṭhin vang a ni. Mizoram lam version hi chu national media-in min ziah sak duh vak lova, a chhan ber pawh a tisualtu angah min dah a ni Chakma lam hi a tuartu (victim) angah an ngaih avangin media chu a chak lo zawkte lam ṭang ngang hi a ni ṭhin a, Chakma lam hi an chhan angin kan hre ṭhin a ni.

Assam-in kan ram min chuhpui chungchangah pawh hian a tirah Assam chu a tuartu zawk angin an lang a, mi paruk lai an thih avangin Mizoram lam demna talk show leh news report tlem a rawn lang a, kan phu nghal suau mai a. Media lama chak lo bik, national media lama chak lo bik angah kan inngai nasa hman hle. Tlai lam thil thleng zan lama report a nih vangin finfiahna leh chhui zauna a awm hman lo a ni.

A hnu lamah media lamin an han kawm kual a, Mizoram lam thu (version) an dawn hnuah chuan a dang leh ta daih mai.

National media kan tihte hi ṭan lam nei sa leh ṭan loh lam nei sa an ni bik lo a, an ziah tur leh an sawi lan tur kan châwm thiam phawt chuan an chhuah ve leh mai ṭhin a, Assam an ṭan bik viauna emaw, Mizoram min ṭan loh bik chhan tur pawh a awm lem lo.

Chutih rualin Mizoram media-te'n engti kawng pawha Mizoram kan ṭan ang hian Assam aṭanga chhuak TV news channel leh English chanchinbu leh website-te hi chuan Assam lam an ṭan zel ang, hei hi chu khawvelah pawh a thlen dan a ni ve fo.

Media-ah chak niin inngai mah ila chak lawmman min petu an awm lo a, kan chak avangin ram kan neih zau phah sawt chuang lova, media-a kan chak loh avanga ram kan chân ṭhen tur lah a awm hek lo.

A pawimawh zawk chu kan ram inchuh hi kan chan tam a ngai a ni.

Zosangi Pa