I DÀWT NGAM LEH DÁWT RAWH

Mizo ṭhalaite'n inzirtir kan mamawh nia lang ṭhenkhat han tarlang ve leh ngawt mai teh ang. A ngaihnawm dawn lo, i dàwt ngam leh dáwt rawh!

Social Media kal­tlanga ka thil hmuh ṭhenkhat aṭangin -

1) Mi aia thil post hmasa nih kan chak a, thil hrechiang mang loa thu suan chhawn (copy/paste) lamah kan ṭuan ṭha.

2) Làr kan chak a, mi lar tih dan zir emaw, uchuák (over) taka mi troll a, social media-a thehdarh kan ching. (Fiamthu àwm chin chu a awm)

3) Thil engemaw thleng hlek se, kan ri hlut a, zirtirna dik lo hawi záwnga thil sawi chhawn kan ching.

4) Ṭhalaite'n kan value kan hrechiang tawk lo a, vei tùr dik vei lo kan tam. Personality develop aiin, thawmhnaw branded kan lawm zawk.

5) Mi sáp ṭawng aw phawi (accent) kan nuihzat a, sáp ṭawng hmang ṭha ngam lo erawh kan tam.

6) Mizo thlai thar aiin, hnam dang chawhmeh kan ngaisang zawk.

7) Mahni inpe a, pènchhuak ngam si lo; awm hmun aṭanga mi dem kan ching.

8) Sorkar thu­chhuak a ṭha dawn nge dawn lo enchhin hmaa sawisel ching kan tam.

9) Mi chanchin ṭha aia an daipelh lai sawi rin sak ching kan tam. (Mahni tana hlawkna awm lo sawi ching)

10) Mi chanchin ṭha lai sawi tùr hria, sawi ngam lo khawpa dawih leh inhmuam úp kan tam leh thung si.

A táwp lam hnaih ila -

Social Media hi kan mize lan chianna ṭha tak a ni a, kan thusawi chhawn duh dan aṭangin miin min teh fo ṭhin tih hria ila, a hman dan tawk thiam ang u.

Kan hmelṭha emaw, hmelchhia emaw, rilru hi ṭha phawt mai se. Mi pawisawi si lovin hlim takin a awm theih a nia!

Mihring hi kan damchhungin zirlai kan ni tih inhre reng ila, nitin hian hmasawn tùrin inbuatsaih deuh deuh zel ang u.

A hmáwr bàwkna -

Mizo thufingin, 'Ṭhenawmte do aiin khawsarih do a thlanawm zawk,' a lo tih angin, he thuin a kawh tum hre reng chungin heti hian a tawpna khar daih ang.

"Thinlunga thiang­hlimte chu an eng a thawl e; Pathian an la hmu dawn si a. Remna siamtute chu an eng a thawl e; Pathian faa vuahin an la awm dawn si a." (Matthaia 5: 8, 9)

David Zochhuanmawia (Vida Hrahsel Saza)