ZIRNA SENSO

Zirna kan ngai pawimawh a, engzat chiah nge zirna atan hian kan insenso in chhût teh ang. 

Admission Fee    - Rs 400- Rs 5000

Monthly Fee    - Rs 350 - Rs 1500/-

    (Hostel)

Uniform    - Rs 500 - Rs 4000/-

Chawfun man    - Rs 20 - Rs 50/-

Taxi/ bus chuanman    - Rs 20 - Rs 50/-

Chhungte chawm hlawm man:-

Zing leh zan Chaw eina    - Rs 300/-

Zan riah man    - Rs 150/-

(Thawmhnaw dang man kan chhut tel lo)

A tlem thei ang bera chhutin:-

Sikula inziahluhna man khi    - Rs 1250/-

Senso dang khi Total    - Rs 9800/-

(Hei hi a senso tlem thei ang bera chhutin thla khata ni 20 Sikul kai anga chhut a ni. Session khat tur chuan han chhut chhin ila thla 9 vel sikul kai nan hun an hmang turah han ngai ila. 9800x9 = 88200 lai a ni.) Hetiang khawp hian zirna kawngah kan insengso a ni a. Kan tu leh fate hian kan senso phu tawk hian thiamna an pawchhuak meuh em? 

Zirlaite pawh hian hetiang zat emaw, a aia tam fê mai hi kan chhungte hian kan zirna senso-ah hian kum tin an seng tih kan hre chiah em? Theihtawp chhuaha kan zir theih nan heng a chunga kan sawite hi min tihsak tih hre lo hian sikul kan kai liam mai mai em? 

Zirtirtute pawhin a chunga ka han draft ang deuh (a aia changtlung pawh) khi zirlai naupangte leh an chhungte dah khat tirin an zirna senso hi a namai lohzia kan hrilh hre tawn tawh em aw? Kan ti lo a nih chuan han ti chhin teh ang. 

Han dahkhah tir ula, tichuan Middle Sikul kai chin chu ni 2/3 vel mi 3/4 vel in hlawm khawm (group) tira kaihruaiin inhlawhna tur zawnsak ila. Entirnan: Zirtirtute leh mi fel awm thei deuhte in leh lo tifaiin emaw, hralhna awm reng hna awlsam bawk si ‘rora’ chhut emaw, anhnah zuar emaw ten inhlawh tir ila, chumi an hlawh chhuah aṭang chuan an thla tin senso khi a pawisa ngatin a la daih lohna te han chhûtpui vel ta ila. An zirna senso hautakzia hi a tak taka an chhungte nen ṭang ruala kan hriattir a hun tawh lo maw? 

Chuti lo zawngin, Canteen leh thingpui dawr changkang deuh deuhah Uniform ha in a tui ṭha ṭha an lam nulh nulh ang a, tawite pawh ke a kal peih lo hian chhungte thawh chhuahin taxi an la ham ham ang a, chhungten thifa-hnuk chatin kan lo thawk ang a, hnathawk tlak lo hian an lo zirchhuak leh lawi si ang e? Fel tak tak leh taima tak tak an awm ṭeuh tih erawh kan hria. Chutiang chi chu an hlawhtling ngei bawk ṭhin. 

A lera ṭhuai kan tum leh ngawt zel a, thu hmanga kan in zilh nghek nghek a, kan lungawi loh huna kan in vin leh vak vak hian naupang a tichawlawl mai mai thei a. A tak ngeiin zirnaah hian kan insengso a, kan thiam lo leh tlin lo chung chungin kan bei ve tih hi kan tu leh fate ngei hian min hriatpui sela. Chutiang taka an han ṭan let chuan keini pawh min tiṭang lehzual ngei ang. Chuti lova, spoon feed ringawt maia inzir tir hi a dik lo a ni. 

A tir aṭanga ṭanna chang an hriat miau loh avangin pa leh fa University zir chhuak uai tawh hi vawk in sa mai mai hian kan in vin phar nek mai zel a, hei hi a fel lo. Nau chaw hraia hrai kan tum reng a, in chhung khura an tih theih tawk tihtir nachang kan hriat loh zel chuan an tlaw em em ang a, Vai thil thiam ang deuh chauhin an zirlai bak nunphung leh hmang châng reng reng hre lo hian an in la changkang ve hle ringawt thei a nia. A tawpa ṭhenawmte'n "Anni fanu/ fapa te zawng, a ni ai chuan, an kawmthlang Zawngṭah kung pawh khuan a thawh hlawk fê zawk" an ti ang a, kan na leh hle mai tur a nia. 

Zirlaite pawhin lehkhabu a mi chauh hi zirlai a ni lo tih kan hriat a ngai. Thil engkim tihsak ngai veka awm reng bik tur a ni lo. Lehkha kan zir theih nan ka chhungte hi an thawk rim a, tiin in chhungkhur leh thil dangah pawh ṭanpui theihna lo zawn ve ngar ngar tur a ni. 

YMA-in ‘Zirna uar kum’ atana puang hi hlâwk takin hmang ang u. Seminar leh kumpuan hawn mai te, refreshment etc 'cial viau ringawt lama inhmang lo hian a tak takin a bul lamah i bei teh ang u. Sorkar sikul te khalh ngila vilzuitu, SEC leh VEC din tura sorkarin a ruahmante pawh hi khua/ veng tinah nung takin din ila. Sorkar zirna in hi siamṭhat hna in thawk tak tak teh ang u. Mi tihdan sawi chhawng reng rengin "Na-a chu nise, ti hian a ti awm sia" ti ti chung hian kum kan tluan leh palh hlauh ang e.