COOPERATIVE HMANGIN RAM ECONOMY SIAM A HUN TA...

Tun hnaia Mizoram leh Assam ramri buaina hian ei leh barah sorkar leh mipui te hi min beng harh mawlh tehse la aw!

Engtin maw...

Sawi sen loh a awm, a tawi zawngin kan ramah hian kut hnathawka eizawng hi tam zawk kan awm awm e. Thil tum leh duh dan inang tlang, mahnia tih theih si loh, huho a tih theih ni si, in telkhawmna pawl Cooperative Department hnuaiah Aizawl daifem leh Zokhua-ah Agri/ Farming Cooperative Society Ltd dinin, Farming Cooperative Society tam tak kan nei mek a ni.

Heng Cooperative So­ciety te hmang hian Agricul­ture, Horticulture leh Coop Deptt te ṭang tlangin Mizo nu leh pa, ṭhalai lehkha thiam taima tak takte tan, buh thar hlawk dan, thlai thar hlawk dan, thei lamte leh, nitin chhungkaw tinte mamawh tam tak hi kan ramah ngei thar chhuah kan tum leh kanin zirtir ava hun tawh em!

Society te hian an thiam ang ang leh, an remhriat dan ang ang chuan hmala ve bawk mahse awmzia a nei teh vak rih lo zawng a nih hi.

Hlawk zawka thar tur chuan mithiam zawkte zirtirna (Coop Education & Traning te nen) an mamawh hle a, an thar chhuah chu kan ram chhungah a hralhna (marketing) leh rate mumal tak nen ruahman sak nise. Phai lam aṭanga thlai leh thil dang kan lakluh hi zawi zawi chuan kan ti tlem ngei ang le.

A bik takin thlai thar/ thlai rah etc Aizawl bazar puia kan lei ṭhinte hi kan thar chhuah tharlam si, hrisel bawk si kan lo ei tawh dawn a ni.

Engemaw hlekah vaiho in kawngpui kan dang....an tih a, min hrek fo na hi a ninawm ta lua lawm ni?

Cooperative Department hi kan hre chiang lo/ kan zirchiang lo nge ni aw ka ti ṭhin. Deptt pawimawh ém ém a ni a, CM Portfolio tur chi ni ah ka dah, mahse kan la hlat khawp si a le!

Farming lam bakah Coop Deptt hian heng- Vety lam rimnam bawng vulh leh a hnute hralh te, vawksa a intodelh te, arsa a intodelh te, Artuia intodelh te, nitin mamawh consumer's items te, handloom te, forest leh horti te, fish farming te a enkawl vek a. Deptt lian leh budget pawh nei tam tur a ni asin. Kan ram tana a pawimawhzia hi i hre thar leh mawlh teh ang u khai.

Kan rama kan lakluh tam tak zingah hian, Amul product te hi Gujarat leh Haryana State aṭangin a ni a, Coop sector aṭanga thar chhuah te an ni. An tui bawk a, an thawk bawk a, an state economy an chawi kang hle.

Heng hi kan la hlat deuh a nih pawhin tuna kan tih theih lang chiang tak chu, thlai thar, thlai rah, chawhmeh tur thlasik thlai etc te a kan intodelh a hun takzet ta. Vegitable Supply Chain sorkarin a kalpuiah hian a chiang khawp mai.

Collection centre leh thlai, sa, sangha etc dah ṭhatna a keng tel nghal ang Ram intodelh lo chuan zah an hlawh ngai lo, mi dang thar sa ringa in chawmtir reng hi kan kalsan a hun.

Kan ram chhung ngeiah pawisa vir vel a lo tam ang a, Vai ramah pawisa thawn a ngai tawh lo ang.

Tichuan, Cooperative Society tam tak kan neih mekte hi hmang ṭangkai ila, kan ram economy hi zawi zawiin kan siam ṭha ang a, mipui kan phur thar ang a, vaiho chu an buai tulh tulh tawh mai ang. Buh leh thlai tharna tur ram awl kan la ngah viau bawk hi maw. A bik takin Zokhua lama kan unau ten an thar chhuah leh an thawh chhuah phu anga hlawkna an tel ve hi a ṭha.

Cooperative movement hmang hian ram economy a chawikan theihzia a chiang viau mai. State Level Coop Federation pawh kan nei nual a, hman ṭangkai thiam a ṭul bawk ang chu.

Coop lama mituite tan chuan hma thlir tam tak a awm a, tuna central scheme Vardhan pawh hi kut hnathawktute lam chawikanna tur project a ni a, hlawhtling ngei se a duhawm. Cooperative Society hrang hrang hmang hian kan ram economy hi siam ṭha/ siam thar ang u khai. A tiha tih zêlnaah hmasawnna chu a awm.

A remchan leh hun dang­ah pawimawh tak tak ho kan la sawi leh dawn nia. Cooperative vul zél rawh se.

Laldingliana Ralte Saron Veng, Aizawl