A tak ni lo zawk leh Mizote
Amah Thanpuii Pa article ropui kha a hunlaiin an helh hle niin an sawi a, kha article ropui 'Kan Mizoa' tih kha kaih thawh leh a ṭul. Kha article khan tunlaia kan Mizoa tho hi a lo ziak chhuak tawh a, Mizote hi a tak ni lo zawk kan buaipui tlat avang hian a tak tak kan buaipui a hun tawh a ni.
Thanpuii Pa khan, "Inpawihfak haw hle si a, fak der ngaina em em, mahni thiam channa turah chuan dawt pawisa miah lo. Taksa, rilru leh thlarauva hausa inti hle si a, a eng a kima pachhe ngawih ngawih zawk kan ni. Tichuan a suak vek kan ni a, hmaithinghawng kan vuah ṭheuh a ni," a lo ti daih tawh a ni.
Tun hnaiah Olympic kan enin he thu hi ka hre chhuak zawk mai. Kan nula Lalremsiami Hmar a tel ve a, medal la phak lo mah se a la ve phak teuh hle tih kan hmu ṭheuh awm e. Chutihlai chuan boxing lamah chuan junior world champion te pawh kan lo nei reng tawh a, mahse Olympic leh anni world champion na lam kha a kawng a lo dang deuh a.
World champion kan neih tawhte kha an lawmman a beitham avangin pawisa an pek belh nual niin kan lo ral hriat a. World champion nih ai khan Olympic bronze medal tal la phak turin professional aṭanga inhnuk hniamin amatuer boxing lamah rawn lut se Mizo hnam hi a chawimawi zawk awm sia, tihte rilru chuan a thlir a ni.
Football hi kan sawi uar si a, football power house an tih ṭawngkam te Mizoram hian kan hmang kan hmang tawh. Media lam hlei hlei hian an sawi uar a; mahse Olympic aṭanga teh dawn chuan kan football pawh hi a lem lem mai a lo ni, tih turin India hi kan lo la hniam si a, a tak tak Hockey zawkte hi lo uar ila chu mipa Hockey team lamah khan bronze medal la phak pawh kan thawh ve theih a rinawm ta zawk a ni.
Vairengte buaina lam hrut leh ila. Ramri buainaa symbol anga kan neih 'Pitar Huaisen' kha a huaisenna sawi bo tum miah lovin a nihna tak han sawi ta thung ila, Pitar kal lohna turah a kal ni maiin a sawi ve theih tlat. Chu bakah chuan silai hlauva a bihrukna lamah mei a zu a ni leh mai a, huaisen tak anga han ziaha a hnam puma fak turin eng nge maw a tih le? Kha aia huaisenna symbol atan hman tur kha a awm lo em ni le?
Kan Pitar kha kan sawisel ni lovin a tak ram bawk kha kan subject a nih vangin sawi ngam a ngai.
Ramriah hian 1875 ramri hi kan sawi ve ziah a, a tak ramah chuan Vairengte daiah silai nen kan inkulh pawhin min nek min nek a, a tak ramah 1875 ramri hi sawi chi pawh a ni ta love.
A thawm ring deuh, a tak tereuhte hi kan ni ang tih a hlauhawm. Thanpuii Pa essay-a a suak vek kan ni tih hi a taka kan tih dik tawh lohna turin a tak ram hi i belchiang ang u, Mizote kan harh a ngai. Thanpuii Pa kha philosopher dik tak a lo ni reng alawm le.
Zodinpuia