Ramriah a taka rama chen a tul : Engtin nge ni zel ang?

Mizoram leh Assam ramri buaina avanga July ni 26-a State pahnih Police-te inkah hnua thil thlen zui dan chu sawi zui ngai lovin kan hre vek a. Tun ṭum chu buaina leh a kaihhnawih hrang hranga thil thleng thei nia lang leh; kan ngaihpawimawh tur nia langte sawi tum thung teh ang.

Bultanna :

Kan hre vek a, July ni 26-a inkahna thlen hnua Assam Sorkar thil tih duh dan chu a tenawm hle a nih kha. Thiam an chan theihna tur leh khawvel hmuha Mizoram lam lan mawi loh theihna tur a nih phawt chuan, an hruaitu lu ber thlengin dawt sawi an hreh lo tih a lang chiang a. Thu phuahchawp hmangin mi puhchhiat an hreh loh tih chu an Sorkar thuchhuah hrang hrangah a chiang hle bawk. Kan tih hmasak pawh ni lo, an cho chhuah liau liau avanga nunna 7 ngawt an chan hnuah Assam Sorkar chu nasa takin a inham puar a, Mizoram ramri-ah sipai tha chi 4,000 rual dah an nih tur thu Assam Chief Minister, Himanta Biswa Sarma-a'n a sawi leh Council of Ministers ṭhukhawmin Police Armed Battalion thar din an remtih lam chu sawi zui thui lo mai ang.

A mak ka ti :

A tuartu zawk ni chunga remna zawnga Assam Minister pahnih Mizorama an lo zin kha thil mak angreng tak a ni a. Kha inkahnaah khan Mizoram hi a tuartu ni ta zawk ila, chuti chung chuan kan Minister te Assam lamah remna zawngin zuk kal ta thung se, Mizo mipuite ngaihdan tur leh kan bengchhen tur zia ka ngaihtuahin hetianga hma an la duh hi mak ka ti a ni. Anni chu a tuartu zawk ni chungin khatiang khan an rawn inphah hniam mai a, Mizoram palaite nen an inkawm zawha thuthar lakhawmtute zawhna a chhannaah pawh Assam Border Protection and Development Minister, Atul Bora chuan, inremna a awm theih nan bul an ṭan tawh avangin thil kal tawh chu theihnghilh ṭha a tih thu a sawi leh mai bawk a. Mizoram mipuite'n kan tawrh theih nan kawngpui dang a, a theih ang anga mi hrektu an ni zawk chunga khatiang taka an inphahhniam thei khan; kha inbiakna phenah khan thil inthup eng nge awm ang tih min ngaihtuahtir hial.

Ngaihdan pakahatah chuan Assam sorkar hian inrem taka awm a, hmasawnna lam kawng zawh an duh ni-ah a ngaih theih a (chu chu a rinawm lutuk si lo!). A dang lehah chuan thiam taka mi vehthlem leh chhaih kual chunga min tihkual vel an tum ni paw'n a ngaih theih ang. A chhan chu inremna zawnga Mizoramah hial an rawn kal chung khan Lailapur leh a chhehvela kawng dan chu tihtawp a ni lo a, an haw hnuah pawh tihtawp mai a nih loh piah lamah Inrinni zanah an police-te venhimna hnuaia Mizoram lam pan lirthei ṭhenkhat; Lailapur-a kutthlak a ni khan kha inbiakna kha remna zawnga inbiakna tak tak nge Political Propaganda mai mai ni zawk ang tih min ngaihtuahtir a ni!

Kawng dan sawi takah chuan Mizote hi thil ti ve hluai, hre rei lem lo kan ni a. Kan hriat theih ve chinah ringawt pawh ramriah hian ṭum tam tak kan buai tawh a, buai apiangin kawng dan thawm hriat tur a awm ziah bawk a. Petrol leh Diesel khuahkhirh nghal ngai khawpin harsatna kan tawk ziah tih hre reng chunga vawiin thlenga buaina thlen changa mamawh châwk luhna tur kawng dang kan la nei ṭha tawk lo cheu hi chu a ngaihmawhawm ngawt asin.

A tak ram :

Tun buainaah hian Mizoram chu kan che ṭha rih zawk angin a sawi theih a, eng thil nge thleng zel dawn tih chu hunin a hril turah ngai ila. Khati zat nunna an chan laia thi kan awm ve lote kha thil lawmawm tak a ni a, hliam na deuh 2ṭ1 nei ve bawk mah ila kan che ṭha thawkhat tiin a sawi theih ang chu. Chu mai ni lo vin, a tuartu ni zawk chunga remna zawnga Assam palaite Mizorama an lo zin lehzelte kha kawng leh lama ngaihtuah chuan a ropui ve hranpa hrim hrim bawk. Tun dinhmun leh thil kal mek chu duhtawk ta ila, a tak takah chuan kan kal zel dan turah eng ruahmanna nge kan neih tih chu a pawimawh zawk tak chu a ni. Hun kal tawh hrang hrang aṭanga thlirin khatia Assam Police-ten Mizoram Police Duty Post hnehchhuh an tum avanga State pahnih Police-te inkahna thleng ta kha chu; an rawn cho chhuah liau liau a nih avangin thil mak lutuk a ni hran lo va, kan inkah miau tawh avangin buaina a thleng zui dawn tih chu thil chiangsa a ni. Chu buaina aṭang chuan engtin nge kan tal chhuah ang a, mipuite'n harsatna an tawh loh nan engtin nge hma kan lak zui ang tih chu a pawimawh lai ber a ni ta a ni. Ei leh bar leh ni tin mamawh zualpui chu Tripura lam aṭangin tlem tlem kan chawlut thei a, zia tak a awm a. Damdawi leh hri leng kaihhnawih mamawh hrang hrang chu kan tlachham ṭan titih der a, Sorkar pawh a mangang viau niin a lang a. Chu harsatna tak chu sorkarin engtin nge a hmachhawn dawn tih chu thil pawimawh a ni ta a ni.

Inpuahchahna :

Ei leh bar thuah chuan lo duhtawk ta ila, a bulpui ber ramri buaina chungchanga kan inpuahchahna mawlh hi a ni. Assam sorkar lamin ramri buaina chu inbiakna hmanga chinfel theih an beisei thu an sawi chungin Supreme Court lama zualko an tum nia sawi a awm bawk a. Assam lam hian hmanraw chi tin reng hman pawh an hreh loh avangin buaina hi eng hunah pawh thleng thei reng a ni a. Mipui kan intam hleih ang bawkin Police kan neih zat pawh a inthlauh avangin ramri venhim kawngah ṭan lak thar a ngai hle tih a lang a. Ramria kan Police-te duty-na hmun chu rikrum thila phuahchawp nawk nawk a nih hlawm avangin rei a daih dawn lo va, engtia rei nge an awm dawn hriat a nih bawk si loh avangin thuam ṭhat a, an duty-na hmun panna kawng thlenga tihchangtlung a ṭha awm e. Zonet-in Chief Secretary, Pu Lalnunmawia Chuango a kawmnaah khan Mizoram ṭanchhan tur lehkha pawimawh dahṭhat nachang an hriat tawk loh thu a sawi a, ngaihtuah a tithui ngei mai. Hetih rual hian Sorkar hmasa lam hun aṭang tawhin ramria Mizoram ṭanchhan tur lehkha pawimawh hrang hrang chu a theih ang anga dapkhawm a ni a, an duh ang lehkha pawimawh an lakhawm zo ṭep tawh tih sawi a ni a, an hlawhtling zel pawh beisei ila. Engpawh chu ni se, hmasawnna hmanga inbeihna a ni emaw, ralthuam hmanga inbeihna a ni emaw, Court lama inbeihna a ni emaw hnehna chang tur chuan inbuatsaihna ṭha a pawimawh hle dawn a ni.

Tlipna :

A khaikhawmnaah chuan ramria Mizo mipui ṭanrualna hi a hlu hle a. A bikin Political Party hrang hrangten Politics-a an ngaihdan leh duh dan inang lote dahṭhaa Sorkar hmalakna ṭha taka an thlawpte kha hriat a nuam a. Inkahna thlen hnuah National Media lamin hleih nei taka thu an chhuah hnuah kan ṭanrual tlat avanga khawvelin thudik zawk a hre chho mekte hi a lawmawm a. Social medi-a kan ṭhalaite hmalakna phei kha chuan Assam Chief Minister lu a tihai hial a nih kha. Eng le khaw le, kan ti ta sa sa, tun ṭum na na na chu a tawp thlengin kan ṭanrualna lantir zel tum ila, Vairengte mipuite huaisenna zahve tal kan pu thei lo a nih pawhin, kan dawihzepna leh kan phunchiarna hmanga an kawng sah kuaksa tiphuitu ni lo turin inveng ṭheuh teh ang u khai.

Samuel Lalruatsanga