INDONA CHU LALPA INDONA A NI A, HNEHNA CHU LALPA TA A NI

Vairengte daia Assam Police leh Mizoram Police inkah ni-a Vairengte nula mangang ṭawngṭai tura mipui min au kha ka theihnghilh thei lo. Ka tu leh fate nen kan in aukhawm a, kan ṭawngṭai nghal char char a ni.

Lalpa i van sipaite han tir la kan sipaite hma han hruai tir rawh kan ti a, kan lo au nasa ve mai a, a te ber thlengin theihtawp kan lo chhuah ve a ni. Chutih laia min thlamuantu chu he thu hi a ni, Jeremia ṭah hla 3:57 na-ah chuan, 'Nang ka auh niah khan i lo hnai a' hlau suh i tia ava mawi em thla a muang sawng sawng mai. Hnehna Lalpan a chang ta, Lalpa ropui ber rawh se, Lalpa kan lawm e.

Sam 105:12-15 thu hi lo chhiar ve rawh, ama mite chu tuma hnehchhiah a phal lo, ka hriak thiha te chu tawk suh ula, ka zawlneite pawi reng reng khawih suh u, a ti a nih kha. Lalpa hriak thih mi tam tak awmna Mizoram hi min chhan dawn tih hi i ring ang u, Lalpan mi tam a mamawh lo, an lama ṭang aiin kan lama ṭang A chak zawk a ni.

Kum 1875 khan British Sawrkar kaltlangin Lalpan Zofate tan he ram hi min pek a ni, a humhim tur pawhin amah Lalpa hi tihtak zetin i au ang u. Hnam tin a siam a, an awmna tur ramri te a khamsak a, tih Bible-a kan hmuh kha. Chu mai pawh tawk loin hnam dang chak zawkte min chim ral phal loin ILP te min lo siamsak diam a nih hi. Hetiang khawpa ama mite a hauh chung hian hlau leh khurin kan la awm reng dawn em ni? hlau leh khur chung chuan Lalpan indona-a kal a phal loh kha. An tam em mai heng hi kan rut tel dawn em ni ti ho te, inremsiama lungawi tum ho kha chu lo insum hram ula, ṭhalai huaisenho leh force indo thiam huaisente ṭanhmun lo kian ula, tih hi kan ngen a che u.

Tu leh fate u, kan ram tan hian Lalpa hnenah lo ṭawngṭai zel rawh u, kei pawh kum 2007 aṭang khan ka la ṭawngṭai reng a ni. Chakna ni loin thiltihtheihna pawh ni loin ka thlarau zawkin le a tih kha, keini tan chuan Lalpa chakna chauh rinchhan hi kan chakna tur a ni. Delhi rilru tituiral theitu, Assam hotute tituiral theitu kan Pathian hi a rintlak a ni.

Chak tak leh huai takin awm phawt mai rawh a tih kha. Hetah hian khawvel ralthuam a sawi lo a, amah rin mai hi a ni zawk tih i hria ang u. Kum 1875 ramri hi amah kan Pathian min pek a ni a, amah bawkin min hum sak ang i ring tlat ang u, sawi tur a tam a, tawk rih se.

Lalrothangi, Saron Veng w/o Ch. Chhunga (L)