Ration khul sak versus Electric Bill Discount

Tun hnaia kan rama thil thleng langsar tak chu Electric Bill sang tak mai leh mipui phunna hi a ni. Tun hnaia kan Politician-te intihhmuh langsar tak pakhat chu mi­retheite ration buhfai khulhsak a ni. Thil pahnih hi chhut vang vang ta la, sorkar hi a la hlawk zawk tih chiang takin i hmu thei dawn a ni.

India rama lock­down rei ber an tih fiamthu hi thuziak pakhatah chuan Mizoram hi khawvela lockdown rei ber zawk a ni an ti; ni 100 chuang Aizawl khawpuia nitin ei bar zawng chawpa chhuak ṭhinte hna­thawk thei lovin hri­pui vangin an awm a ni.

He ta sawi chian ngai tak chu ni 100 an inhlawh theih loh chhan hi sorkar sual vang a ni lova, political party thiam loh a ni lova, Covid-19 vang liau liau a ni hna an thawh theih loh ni. He mi chhunzawm hian thil pakhat a awm nghal a, chu hnathawk thei lote chu sorkarin a khaw­ngaih em em chuan puih theih dan a nei a, chu chu Chief Ministers Relief Fund (mipuiin mahni remchan ang an theh khawm a ni) aṭanga pawisa tlem tlem pe lovin Electric Bill leh tui Bill tih tlem sak hi a ni ta a ni.

Tui Bill hi chuan mi zawng zawng a nghawng chiah lo; a chhan chu tui bill chawi lo chhungkua an awm a, tui khawlna nei ṭha te, tuikhur bula chengte pawh an awm bakah tui bill hi chu a pawisa hrawm a na vak lova ni.

Electric Bill chu chhungkua zawng zawngin an chawi a, mahni in luahnaa Metre Box nei lote pawhin a in luah manah Electric Bill ang hu hi an cut tho avangin chhungkaw tinin Electric Bill an pe ti ila kan sawi sual tam pui lovang. Mizoram sorkar hian ni 100 chuang hnathawk thei lote a khawngaih tak tak a nih chuan veng tinah sorkar hnathawk ve lo, sumdawng lian ni lo chin hi Electric Bill Discount sak se a ṭha ang.

Chuti zawnga tih chu an tum lova, kan MLA/ Minister te intihhmuh mek chu "Ration Buhfai khulhsak" a ni. Hei hi chu a tlem tham bakah a man pawh a to lova, Electric Bill sang tak hmangin mipui an rawk a, mirethei tea hming ṭhat hlawhin Ration Buhfai an khul sak tiin an puh mai tur che u asin. Electric Bill hi ennawn ngei a ṭha zawk a ni.

Lalmalsawma (Sawmtea)