2023 a hnai tawh khawp mai

"Kan ti nek neka Krismas kan thleng leh dawn ta" kan ti ang chiahin kan ti nek neka Inthlan Kum kan hnaih leh ta kuar mai. A phurawm ka tihna leh a huphurhawm ka tihna hi a inchen tawk vel a ni.

Inthlan dawn hi chuan boruak danglam hi a awm ve ṭhin avangin a phurawm ve hrim hrim chuan ka hria a, mahse politics avanga ṭhenawm inngur, politician dawt sawi, dawt intiamna tih te hian inthlan hi min huphurh tir tlat a ni. Boruak chhia hi a ninawm.

Keimah anga hrethiam ve lo, a vei ve si hi mi tam tak in awm ngei ang a, kan ram inthlang tur 2023 hian eng nge a her chhuah pui tak ang le?

Congress hi Mizorama sorkarna nei rei ber an ni tawh a, Congress hi chu kan hmelhriat chiang tawh hle a ni.

An ṭhatna tam tak a awm a, an chhiatna pawh tam tak a awm. Mipui tu pawh hian Congress hi vote leh zel tur an nih leh nih lovah chuan duhthlanna hi kan siam thiam tawh ang.

Mimala sual te, mimala fel te, mimala ṭha te, mimala ṭha lote hi party tinah an awm vek a, Congress hian mifel leh ṭha tak tak an nei tih kan hmu a, a party anga kan ram min hruai thlen dan kan hmuh bawk avangin vote nawn leh nawn loh chu kan ngaihtuah zui thiam tawh ngei ang.

MNF hi tuna kan sorkar hrawn mek hi an nih bakah tun hnai deuh bikah chuan kum 1998 aṭanga kum 2008 thlenga Mizorama roreltute kha an ni. MNF hi chu in hrilh ngai lovin tuna an sorkarna kalpui dan aṭang hian kan hre chiang hle a ni.

He party-ah hian mi thiam tak tak leh a ngaihna hre tak tak hruaitu an awm nual a, midik kan tih ang chi te pawh an awm ve a ni. Chutiang ni lo lam mi dik lo te, mi pamham te, thutiama ding lo te, thudik ni lo sawi ṭhinte pawh an awm bawk tih chu kan hmu bawk a ni.

Tichuan, MNF ah hian ṭhatna kan hmuh tam zawk chuan vote nawn leh theih an ni a, an ṭha lova kan hriat chuan Congress kan paih ang bawkin mipuiin kan paih ve leh thei bawk. Kan duh chuan kan thlang nawn leh thei a ni.

ZPM, BJP leh a tesep dangte hi chu an la sorkar ve loh avangin tun ṭumah chuan kan sawi tel dawn lo a ni.

Lalmalsawma, Dinthar