City Bus (Upa te seat tur dah)

Hman deuh lawk aṭang khan 'City Bus-ah sikul naupangin mi dang (aia upa, tar leh nunau chak vak lo zawkte) ṭhutna ken an hreh' tih thu a ri fo a. An luhna sikul hming thlenga sawi lah a tam. Mi ṭhanhnemngaite mit a kham thu hriat tur a awm fo.

Hengte avang hian ṭul loah kan hnam inchhuanna 'Tlawm­ngaihna' thu a hliau phah fo a. Sikul naupangte lah nilenga khuahkhirhna hnuaia awm; an in thlen hmaa an ṭhiante nena âm taka hun an hman duh hun lai lo ni bawk nen, inkhap leh inzilh reng chi a ni bik si lo! Sawi fo a nih lohna turin; a tute tan pawha zangkhaina tur hmangchang hriat lam hi kan mamawh a, ngaihtuahna sen a ngai zawk a ni.

Andaman and Nicobar Islands-a kan awm lai khan ka ṭhiante nen bus-ah kan chuang a. Kan rama bus ang tho a ni. Kan han lut kha ṭhutna awl hmasa saah khan kan inhnawh tel tel a. Chutia duh duhna hmuna ṭhut ve ngawtna chi kha a lo ni awzawng lo! A hma lam kawngkhar hnaih ber kha pitar putarte tan an lo hauh lawk sa diam a. (Tar chak lo tan chhuk leh lawn samkhaina tak pawh a ni) conductor-in min han hrilhfiah chu kan hnar a lian ru hlawm khawp asin. A ding leh vei lamah khan mipa leh hmeichhia an lo ṭhu hrang bawk - hei chu kan ramah a ṭul kher lo ang.

Kha bus-ah khan conductor khan a hna thawh tur a thawk ṭha hle a. Pawisa chauh a khawn lo a, ṭhutna rem fel leh mi chiauau kha a hneh em em a ni.

Keini pawhin sikul naupangte dem ngai lo hian conductor-te hian min enin min siksawi ta zawk ṭhin se la. A ṭulna avang zawkin passenger-te pawhin um e-sak vek ila. Harsatna leh nawmsam lohna te kan nei a nih chuan min hrethiam tho ang a. Hei hian tar leh upa zawkte, nunau chhangchhe deuh te, thui tak chuang turte thlengin nasa takin a chhawk thei dawn a ni. Tin, dem bik leh tih bik awm loin lungrual takin kan chuang ho thei bawk ang.

ACBOA lama kan hotute pawh hian kan conductor-te leh driver-te tan hian a khat tawkin mi thiam leh hawi zau deuh rawih sak/ koh sak ṭhin se la. Mipui rawngbawl sak dan (hospitality) leh an tana pawimawh thei tur zirtirna neihpui an nih fo chuan mi tin tan hlawkna a ni zel ang.

Kan sawi ta sa sa. Tennis court aṭanga Zodin stand inkarah hian traffic a jam emaw, jam lo emaw con­ductor-te hian min chhuk­san daih zel tawh lo se, a va thlamuan thlak ṭhin dawn em! Passenger-te'n buaipui ngaiin harsatna kan tawk thut thei a; tin, bus pawh a chhe thut thei. Passenger-te kan hawihai lutuk palh ang tih a hlauhawm.

'Pu Conductor, i conduct-na bus-ah chuan i thu ber a, mawh­phurna i laknaah chuan thuneihna pawh la tel zel rawh khai.’

Sangtea Daifêm Val, Renthlei