Hawrawppuia ‘Ṭ’ hman vek a hun tawh em?
Mizo ṭawng hi ṭ/Ṭ tel lo chuan a kim lo tih chu kan hre vek àwm e. Amaherawhchu, tun hma aṭangin thu ziaha hawrawppuiah chuan T hnuaia chhut kher loh pawhin a ṭawngkau chheh hman dan
aṭangin Ṭ a ni tih Zofa zawng zawngte'n kan hriat ṭheuh avangin hawrawp puiah chuan Ṭ hnuaia chhun han (dot) dah kher a ngai lo, tiin kan lo zirtir a. Hei vang hi a ni ang e, AMC bawlhhlawh paih lirthei bangah pawh ṬAWIH sawi nana TAWIH an hman hi.
Ama'rawhchu, hun a danglam a, tun hma ang a ni tawh lova, tunlai chuan lehkhabu te, chanchinbu te bakah thu ziah hrim hrim hi a tam tawh a, a la pung zel dawn ni pawhin a lang. Mizo ni ngei si, chhan hrang hrang avanga Zoṭawng thiam ṭha lo kan lo pung zel a, chubakah Zo hnahthlak ni lo, Zoṭawng hmang/ chhiar lo thei lo te nen kan lo cheng ho zel a, chuvang chuan a hun leh hmun a zirin hawrawppuiah Ṭ hman a ngai lo tih ngaih dan chu kalsan a hun ta a ni maithei.
Mizo Academy of Letters (MAL)-in I&PR Auditorium-a Mizo ṭawng chungchanga inrawn khawmna kan neih ṭum khan MLC Mizo Ṭawng Ziah Dàn chhut leh hunah chuan Ṭ/ ṭ hman dan chungchang hi sawi tel ve tawh ni se, tih tlukin ka sawi a. MLC-ah hian MAL member-te a ṭhahnem ber leh a kul a taia ṭang kan nih vanga sawi ka ni.
Hei, MLC Book No.1 chhut thumna chu a lo chhuak a, ziah lan a ni leh ta lo a ni. Ama'rawhchu, phek 20-naa ṭhen sawm chhawng tlar li-ah hian 'ṭhen sawm' sawi nan hawrawppui Ṭ dik tak hman vek a ni lawi a. Hei hian, tum loh tak pawhin hawrawppuiah pawh Ṭ i hmang vek tawh ang u, kan tihna ni ngeiah a ngaih theih!
Thil ziah nana hmanraw awlsam zawk leh thu ziah siam rem zung zung theihna computer leh mobile phone ilote a lo awm tawh avang hian thuziak hrim hrim mai hi a lo pung ta hle mai a, chuvangin ngaih sual palh theih turah chuan Ṭ/ ṭ i hmang hram hram ang u; hawrawp têah phei chuan (Vanneihtluanga times a lo awm ta bawk a), kan thu ziah/ chhut apiangah ṭ i telh zel ang u. Zoṭawng humhalhna chi khat atan, T/ ṭ hmanna tura T/t hmanna thuziah te hi a tua mah hian chhiar ṭha duh lo ila a ṭha ang!
Amaherawhchu, hawrawp pui zawng zawngah Ṭ hman vek a nih theih nana rawn sawi chu ka ni rih lo. Hawrawppui Ṭ hmanna hi sawi chian deuh a hun tawh e, tihna a ni ber ang chu. - Dr Jeff Tandy Vanlalngheta hlawndo, ... LLB, PHD, DLitt.
Dr J.T.Vanlalngheta