SIKUL TAN HUN HI
Kan sikul-ho pawhin kum tawp exam an hmachhawn mek a, hemi an zawh hi chuan kum tawp chawlh an hmang chho ve leh dawn chu a ni ta der mai. Tunah chuan kan kum tawp chawlh pawh March thlaah a ni ta hu mai a, rual u lam chu kan veikhawr duh khawp mai a!
Sikul kum thar April thla lamah an hmang ṭan ve leh dawn chu a ni a, kan naupangte pawh ṭha taka result nei turah ngai ila. Ka sawi duh ber chu sikul ṭan hun hi a ni. Hei kan enchhin rei ta fut a, mahse ram pum mai hian kan hmang thiam thei meuh lo a nih hmel. Khawpui lamah sikul ṭan hma sawiselna ri a ring a, thingtlang lam hlei hlei hian kan sawisel nasa!
Tun hma lama chhungkaw kima tukṭhuan kan han ei ho dar dar ang kha a awm thei ta lo a, sikul naupang nei chhungte chuan lu letin zingah eirawng an bawl a, chhungkaw tukṭhuan ei hmain an in ei tir a, puar fum fe hman lovin an chhuak ta mai ṭhin a. Heti reng reng hian kum a vei ṭhin a ni a, a luhai thlak hle mai.
Kan Mizo nihphungah chuan chaw ei lai hi chhungkaw kim lai, kawng engkima inzilhna hun leh rorelna hun a ni ṭhin.
Tunah zawng kha hun rangkachak kha kan nei thei ta meuh lo. Hetia chaw kawpuar mang lova an kal ṭhin vang hi a ni chek ang chu maw kan naupangte hi pum lam sawisel leh luhaia tluk thut thutte pawh a tam tak viau ni! Tin, kan naupangte hi ṭhang lai an ni a, chaw kaw puara ei ngei ngei tur an ni. Tih laiin sikul tlai hlau reng rengin an ei puar hman ngai bawk si lo. Tichuan, nilengin kaw ruak ang reng takin an awm ta ṭhin chu a ni a, an khawngaihthlak chu thukhat ni se an ṭhan chhohna zel turah pawh an ngihtuahawm duh khawp mai a!
Sikul ṭan hma rawt a nih tirh khan thingtlang khaw tinah pawh nu leh pate ngaihdan lak a ni a, a hun pangngaia ṭan duh kha a let mai aia sangin an tam daih zawk a, mahse khati chung khan dictator takin kan sorkar khan an ṭan hma pui ta kha a ni a. Tun thleng pawhin ṭan tlai leh duh zawk hi an la tam fet zawk awm e. Chuvangin, tun sikul kum thar turah hi chuan han tan tlai pui leh tawh se a ṭha hle ang.
Tin, fail awm tawh lohna tih leh in hrem awm tawh lohna tih hi sawi leh ila. Naupang rilruah ‘ka fail dawn chuang lo,’ ti a, zir ṭha peih lo an tam phah a, an zirlai hneh hauh lote pawh an pass ve leh mai ṭhin si a, hei hian naupang a tichhiain a lang tlat. Unit Test neih nikhuate hian an fail a nih pawhin sorkar sikul engemaw zat hi chuan Remedial Class leh Remedial Exam pawh hi an buatsaih ngai mang lo niin a lang a. ‘An Unit test pum puiah an ti ṭha alawm,’ tiin an pass tir leh mai ṭhin.
Chutiang bawkin ‘min hrem dawn chuang lo’ tih hi a awm leh a. Head ṭhenkhat phei chuan an staff zinga miin naupang a lo vuak emaw, a lo ben emaw pawhin naupang nu leh pate hnenah ngaihdam an dil tir ṭhin! Hetiang hian kan naupangte chu engtin mah kan siam ṭha lo ang.
Chuvangin, kan sorkar pawh hian central thu zawm fai vek lo hian kan hnam nun nena inmil turin her rem thiam se.
Patrick Z, Chhigchhip