CONG, ZPM, MNF TE THLIRNA TLANG KHAT AṬANGIN

Vairengte daia inkahna tih lovah chuan thukhat vaw thei hauh lo an nih kan hria a. Heng party lian pathum hi thlirna tlang khat aṭanga thlir ka duh ve tlat a ni.

CONGRESS -
An tih ṭhat lam :-

Hman deuh ata tawh, Congress party hi politics thiamah leh publicity, public relation thiamah mi tam takin an ngai. Party dangin an tluk lo, tih an ni ṭhin. An sorkar laiin, an ṭhatna tur lam hawi zawngin issue an siam thiam a, puhmawh leh dem an kai theihna turah issue an divert thiam viau.

Tin, MPCC hian thu­puangtu ‘spokesperson’ an nei bik hian thil a ti sakhat a. Chanchinbumi te leh mi thil thlirzau deuhten an party aṭanga hriat tur pawimawh zawh mai tur an dah hian thil tih vel a samkhaiin a awlsam tir bawk. An media lamah mi hawiharh, mi thiam doctorate degree nei ngat te an dah hian zah a ti kai ve a ni. An thupuan chhuahte pawh document base a nih fo avang leh, sorkar tawh an nihna aṭangin pawm a hahdam ṭhin.

An tih ṭhat loh lam:-

Kum 2018 MLA inthlan­puia an tlak hnu hian an sorkar laia an hotu lian te an reh zui ngawih ngawih a, chu chuan ngaihtuahna thui tak mi a neih tir tlat. Sorkar thar hnuaia mipui rilru dam lohna leh vui leh vaina a lo awmin, hrilh­fiah sak kawngah te, sorkar benharh kawngah te an hunlaia concern minister te an ngawi tlat ṭhin hi a fuh lo.

Finance, Health leh zirna, tui leh Power & Electricity etc. chungchangah te an ngawi tlat ṭhin hi a mak a. Kawng (road communication) chungchangah phei chuan MNF sorkar hi chawimawina an papek a, nopui an dawm tir emaw tih mai tur a ni. An publicity/ media Department ten Press Conference nei zing viau mah se, hei hian an dinhmun a chawi sâng zo chiah ṭhin lovin a lang.

ZPM -
An tih ṭhat lam :-

Party lian pathum zingah an phur rih berin a hriat a. VC leh Local Council, District Council ah te che chhe hle mah se, Aizawl Municipal Council-ah an che ṭha thawkhat a. Pu Lalduhoma Serchhip Bye-election a thlantlin a nih leh hnu phei chuan an boruak a sâng hle tih hi phat rual a ni lo. Covid-19 vangin Mizoram dung leh vangah campaign emaw, vahvel theih a ni lo a, theih nise zawng, Pu Lalduhoma kha Bye Election result puan hnuah Mizoram chhim leh hmar, chhak leh thlang han suar tluan vaih se, an tawhkhirhzia tur kha rinphakbak a ni mai thei.

An publicity/ media lam pawh an ti ṭha thawkhat. Mipui ngaihven zawng leh ngaimawh awm ang ang an thlang thiam.

Chumi hmanga sorkar an dêk ṭhin hi a fuh. An MLA, an pavalai felfai deuh te’n tunlai khawvel thiamna changkang tawhah, hawi an ti harh ṭha e. Thil an zir peihna te’n an thu hawlam leh kallam a ti awihawm bik a, chu chu anmahni chhung­kuaa intihnun tawn nana pawimawh tak a nih a rinawm.

An tih fuh loh lam:-
Heng social media, a bikin –Facebook leh WhatsApp-ah te pawl dang nen thu inchuh an neihin, midangte aia chet hleihluak an ching deuh em aw, tihna tur a tam. Sorkarna la chelh lo an nih avangin ‘theory’ te a ‘practicable’ kher lo thei tih kawngah puhmawh an nih phah fo a, chu chuan an chîm san tur ang a thlenpui lo foin a hriat.
Chutih rual vek chuan, an thusawi fact & figure nen tarlang chiam ṭhin mah se, awih zawh an har fona chhan pakhat a awm – sorkar kal tawhte ngainêp tak nia ngaihtheih tur leh, chutianga thuchhuah leh sawi an ching fo ṭhin hi mipui ngaihzawn an hlawh loh phah theihna a ni a, nuihsan an tawhna a ni zawk mah ang. Tin, nunphung leh chetzia lama felfai lutuk bik ang maia insawi an ching pawh hi, mi nuih tizatu mai a ni thei.

MNF -
An tih fuh lam :-
Congress sorkar sum hnutchhiah hmanga kawngpui siamṭhat hna an thawk chiam mai kha a fuh a. Anmahni puala budget puitling an neih ve, an hmang ṭan dawn chauh va Covid-19-in a tibuai zui a. Nimahsela, Covid-19 chu a bikin, Health Minister phei chuan a chet ṭhatpui viau lawi a. Sum lamah sorkar pachhe mah se, mipuiin hriatthiamna an nei. Covid-19 lamah engkim ngaihtuahna leh thiltih a luangkhawm a. Sample test kawngah te, khawl (RAgT, TrueNAT, RT-PCR) neih kawngah pawh state dang nena khaikhinin a che chhe lam an ni hran lo. Mipui ni tin mamawh, Buhfai an chekkhâwl ṭha a. Eirawngbawlna Gas lakluh kawngah pawh an che ṭha. Assam ramri nena buaina hmun ruk (6) velah a tlawm zawk nia ngaihtheih an nih fona karah, July ni 26, 2021-a Mizoram Police te chet dan chuan sorkar dinhmun a chawisang hle tih hi phat rual a ni lo.

An tih fuh loh lam :-
Mizoram Chief Minister-in Covid-19 veite enkawlna hmunpui ZMC (covid-19 dedicated centre) vawiin thlenga a la tlawh hauh lo hi mipui mak tih a tling! Covid-19 vangin mipui leh anmahni party worker te dawr theih lohva an inkharkhip tlat laiin, duhthalin Minister ten anmahni department hnuaia hna (contract works) awmte chu an campaigner leh an duhsak zawngte an pe mar reng tho niin a sawi a. Chu chuan pawn lam aiin chhunglam indona a chawhchhuah palh a hlauhawm hle.

Sorkarna changtu, a fawng vuantu an ni tawh a. Sorkar official function/programme pawimawhte chu mipui hnena puangzartu Directorate of Information & Public Relation a awm reng laiin, MNF party hian sorkar tihtur tihkhalha thuchhuah siam hlauh an ching a! DIPR hi an ringtawk lo ni hialin a ngaih theih. Opposition leh NGO ten sorkar dik lohna nia an hriat an auchhuahpui pawhin, chhanlet ngaihna hre lova an ngawih ralpui a tam tawh hle. Pu te kaihza venna kawnga an pachhiatna hi an tihfuh lohah chhiar hmaih chi a ni lo vang. Tin, Congress leh ZPM te ang lo takin, MNF hian party thuchhuak an nei sawngnawi thei lek lek.

Lallawmzuala