ZOFATE BENGHARHTU (WAKEUP CALL) HI... (Ramri buai - zalenna dar rimawi!?)

Ni 26.7.2001 a Vairengte dai thil thleng, inkahna leh roadblock te khan Mizo mipui zawng zawng chu hruikhat vuanin lungrualna ramah min vawrhkai ta dawrh a ni ber mai. Kan ram dinhmun dik tak leh hmathlir dan thiam tur a min bengharhtu (wakeup call) a ni chiang ta ngei a. Tichuan tun ṭum ramri buai zet hi chuan ram mipui ngaihdan tlanglawn point hnih a her chhuahpui chiang hle a tih theih. Chungte chu - 1. Ramri chin hriat chian leh humhim tlat ṭulna leh 2. Economic independence (ei leh bar intodelh) ṭulna.

Heng thil pahnih hi rula raw neiha ngawihbopui chi a nih loh avangin tun hun aṭang hian buaipuia beih nghal chi an ni tak meuh mai. Amaerawhchu, kan Bible-in “Beih hmain ngun taka ral rel a ṭha, rem i hriat poh leh i chak zawk ang” (Thufingte 24:6) a tih anga ralrel leh remruat uluk hmasak a pawimawh hle mai.

1. RAMRI CHUNGCHANG: Kan ramri chin chu venhim kan duh tlangin mahni zawnah ṭheuh ṭhahnem pawh kan ngai tlang hle. Chutih rualin khawi chin chiah hi nge kan ramri tih leh engtinnge kan vawnhim ngheh theih ang tih lai ber te chu kan hriat chian hmasak a ṭul hrih tlat mai. Entirnan Inner Line Forest Reserve Area 509 sq. mile Lushai Hill chhunga mi an tih ṭhin te, BEFR 1875 in ramri chin a lo siamte chu khawi chin nge tih leh engtinnge kan neih/ hauh theih ang tih te, Inner Line Reserve Forest Area, Assam sawrkarin notification a lo chhuah ṭhin (kum 1971/ 72, etc) te chu khawilai tak te nge tih te kan hriat chian hmasak a ṭul. Khawilai ram chin nge kan hauh/humhalh kan duh/ tum tihte kan hriat hmasak a ṭul niin a lang.

Vanneihthlak tak maiin tunah hian Boundary Committee chu ni 22.7.2021 aṭang khan kan nei ta hlauh mai a. He committee, Political party zawng zawng leh NGO zawng zawng aiawhte leh hetiang lama mithiamte telna hian lungrual tak leh uluk takin kan ram chinte uluk leh ṭhahnemngai taka chhuichhuakin hma an lak nghal char char a beisei theih ta. Tin, anni committee remruatna te chu mipui hian lungrual taka kan bawhzui a pawimawh dawn ta a ni.

Keimahni ang thoa ramri buai nei ve reng Nagaland, Meghalaya leh Arunachal te pawh hian tunlai hian an buaipui ve hle ang tih hria ila - Union Home Minister hian satellite google hmanga Northeast State te ramri siamfel thuai a tum a ni a. Mizoram hian Pathian thuin ‘hnamte ramri Pathianin a khamsak ṭheuh’ thu (Deuteronomy 32:8, Tirhkohte Thiltih 17:26) a sawi ang hian kan ramri dik tak kan neih nghal theih nan kan ramri committee te tan pawh ṭawngṭai ṭhin a pawimawh hle dawn a ni.

2. ECONOMIC INDEPENDENCE: Tun ṭumah pawh kan ṭhenawm state a mi ṭhenkhatin Vairengte thlanga kawngpui min block sak a, min rep char an tumna hian economic independence ṭulzia leh kan mamawhzia min hriat chhuah tir chiang zual hle mai. Hma kan lak theihna tur kawng hrang hrang tam tak awm thei zinga a ṭhen tarlang ila.

a) Eitur mamawh buh (rice) leh thlaihnah leh rah te chu kan ramah hian an thar thei deuh vek tih kan hria. Chu bakah phai vai te hian Mizorama hralh tur thlai leh ei tur dangah te kan hrisel nana pawi thei thil hlauhawm te pawh an telh duh zel tih a ni a, keimahni tharchhuah ngeia inchawm kan tum uar a ṭul a. Tun kum (August, September, etc) ah te pawh hian thlasik thlai te kan chin uar a hun hle. Thlai hnephnawl mai bakah sa eitur mamawh - vawk, bawng, kel, sangha, chakai, etc. te pawh kan mamawh tawk tharchhuah/vulh thei tura ṭan lak kan ṭul e, thil har a ni miah lo a nia.

b) State dang, vairam aṭanga kan lakluh deuh reng ṭhin item ṭhenkhat zikhlum, tomato, alu, bean, etc te hi khawtin hian mahni khaw rama a ṭha thei apiang ching uar tura infuih leh intihhmuh a pawimawh ta e. Sawrkar pawh hetiang lama mipuite ṭanpui a inhuam a ṭul. Mahni chhungkaw malin kan theih tawk ṭheuh hi a pawimawh rualin a huho- cooperative movement a thawh hian a hlawkin ram leh hnam chhanna kawngro a su thui thei tih kan hriat a ṭha ang.

c) Thenawm ram leh State te (Tripura, Manipur, Burma, Bangladesh) nen inkalpawhna kawngpui siam lama hmalak vat vat a pawimawh hle bawk. Sawrkar bakah mipui lam NGO thlengin kan ṭanrual a ṭul tak meuh niin a lang ta. Economic Independence tih hian nitin khawsakna mamawh zawng zawng ram chhunga tharchhuah vek theih loh chu a nei thei ram te nena kan neih theih hmanga insumdawntawn a ṭul ṭhin a, chuvangin Border trade lamah hian ṭhenawm ram state pakhat (Assam nen chauh) kaltlanga sumdawn tawnna neih that loh/him lohzia kan chiang tlang ta hle a. Chuvangin, ṭhenawm ram leh state te nena inkalpawhna ṭha neia insumdawn tawnna lam kan beihngawrh a ṭul ta a ni.

Tunah hian kan sawrkar (Commerce dept) hian Bangladesh nena indawrna pawh an peihfel deuh ṭep tawh (Covid vanga muang ta hret chauh) niin an sawi. Burma nen pawh keimahni lam chu an thawk nasa tawh hle, Burma sawrkarna buai vang sawn insumdawntawn harsa hrih deuh a nih chauh hmel e. Tripura te chu kan Supply Minister-in a buaipui zarah oil leh gas te kan thiarlut thei a, Tripura nena kan inkalpawhna kawngpui hi sawrkar hian a bei ngawrh hle niin a lang a.

Manipur lam kal pawhna pawh ṭhahnemngaia buaipuitu an awm tih hriat te hi a lawmawm. Engpawh nise heng kan ram dep state/ ramte nena inkalpawhna te leh indawrtawn dan ṭha siam vat vat hi a pawimawh tak meuh a ni.

d) Import/ Export items atana Mizoramin kan mamawh ṭhenkhat alu, dailuah, oils, etc te an awm a. Burma leh Bangladeh te nen a insumdawn tawnna remchang kan sawrkarin a buaipui mek hi chak zawk leh ṭhahnemngai taka beihngawrh a hun hle. Import/export licence neih/ issue theihna te ruahman vat a ṭul hle mai.

Karimganj (district khawpui) ah pawh import/ export licence hmanga thawk an awm thei a, Aizawl, Lunglei leh Champhai aṭang te a import/ export licence nei a Burma leh Bangladesh te dawr dan kawng kan ruahman thuai a ṭul ta a ni lawm ni?

Rilṭam chunga raldo chu chak lo zawk nih a awl em avangin Economic Independendence neih chu ramri buaina chungchanga inbeihna atan a pawimawhzia mipui pawhin kan hre ta a. Kan CM Pu Zoramthangan “Ramri chinfel dan thuruk” a tih zing ami pawh he Economic Independendence hi a ni mai thei a nia!? Engpawh nise, ‘Lungrualna hi ram leh hnam tan himna kulhpui ber a lo ni e’ tih thu hi Mizoram mipui hian kan chhawrdik a ṭul ta tak meuh a ni.

Ni 22.7.2021 a Boundary Commi­ttee, Political Party zawng zawng aiawh leh NGO liante aiawh zawng zawng tel vekna din a ni kha Mizoram tana ṭangkai hle tur, ‘Mellung’ pawimawh leh ram mipuiin beiseina kan nei thui hle a ni. Economic Independen­dence neih tumna atan pawh hian Economic Coordination/Committee emaw Board emaw, pawl hrang hrang(Concerned Organiation/ Dept) telna siam ni se a hlawk hle maithei a ni.

Tuna SEDP Board awm mekte pawh a ṭul anga chhawr ṭangkai an ni thei ang a, chutin mitin, pawltin leh khawtin ten, kan theihtawk ṭheuhin ram tan zalen takin kan thawkho ang a, economic independence chu kan sualchhuak ve thuai mai thei a ni. ‘Thir chu a lin laiin deng rawh’ tih a ni si a.

H. Lalhmachhuana Zobawm In