Hruaitu tehna dik lo kan mualphopui a ni lo maw?

Mizoram leh Assam ramri buai hi thil hrang hrangin ṭhat lohna awm karah hian kan harh phahna tam tak a awm niin a lang. Chumi zingah chuan kan MLA (ram hruaitu) kan thlan danah kan ngaihtuahna kan thlak phah dawn a nih hmel a, hei chauh pawh hi kan zir chhuah theih chuan kan hlawk ka ti a ni.

Kan MLA inthlan dawna kan tehna zam kha a fuh loh avangin kan mualphova in hriatna lian tak kan nei a, inthlan lo awm leh turah chuan ram hruaitu nih tling kan teh thiam tawh a beiseiawm tlat a ni.

Min ṭan ve ngai lo tia kan phun luih luih ṭhin laiin National media-te chuan Mizoram politician te chu insawifiahna hun remchang an rawn pe a, mahse insawifiah thei pawh kan lo nei mang lova chha chu a ni!

Kan Lok Sabha MP a English thiam ber pawhin zawhna a chhang hleithei lova, Vaiho in hleih nei taka zawhna an zawh vang a nih rualin kan hruaituten min chhan hleithei lo hmuh kha chuan ṭan a na duh khaw mai.

Kan Minister pa­khat phei chu a audio a fiah loh vangin an sawi a hre ṭha thei lo a nih loh phei chuan an rawn ti mualpho a ni ta ber a, a hnuah Minister dang an rawn kawm te pawh insawi fiah awm fu fuin lang ve bawk mahse an insawi fel zo mang lova, kan ram tana hming ṭhatna khawp thu an sawi chhuak thei lo.

Khawhar in kal taima, pawisa ngah leh bial tana mi inphal, biangbiak nuam leh kawm nuam, kohhran leh khawtlanga inhmang, zuk leh hmuam bakah zu leh ruihtheiha fihlim tihte a tehna atan kan zam duat duat a. National media-in chutiang an lo hre ve si lova, min kawm tam poh leh mualpho kan tam chu a ni ta der mai.

Kan hotute tehna dik loh vangin kan mualpho a, chuvangin ram hruaitu tur chuan state dang leh ram mithmuhah pawh min chhan thei tur smart tak i zawng hram ang u khai.

Lalmuanpuia