Zu leh ruihhlo vanga thi

Mizoram chhung aṭanga nitin chanchinbu sem chhuah hnem ber Vanglaini, January 10, 2018 chhuaka Mizoram Excise & Narcotics Department-in zu leh ruihhlo avanga thi zat a chhinchhiah dan kha ka lo chhiar ve a. Kum 1984 - 2018 (January 9, 2018) thleng khan ruihhlo leh zu avanga thi mi 1468 an awm a, mipa 1305 leh hmeichhia 163 an ni. Heng zinga mi 1167 chu ruihhlo hman sual vanga thi an ni. Zu avanga thi mi 301 an awm bawk.

Pu Lal Thanhawla kaihhruai Congress sorkar kum 1984 - 1986 ah khan ruihhlo avanga thi mi 2 an awm a. Kum 1986-ah Pu Lal Thanhawla’n a Chief Minister nihna Lal ṭhutthleng a kian a, interim sorkar a lo piang a, hemi kum hian ruihhlo avanga thi record hmuh tur a awm lo.

Tichuan, Mizoram State sorkar hmasa ber Pu Laldenga kaihhruai MNF sorkar thar kum 1987 - 1998-ah a lo ding ta a, hemi chhung hian ruihhlo avangin mi 8 an thi. Kum 1989 - 1998-ah Pu Lal Thanhawla kaihhruai sorkar lo ding ve lehin, kum 10 chhungin mi 326 ruihhlo avangin an thi.

Kum 1999 - 2008-ah chuan Pu Zoramthanga kaihhruai MNF-in sorkarna a rawn siam ve leh ta a, kum 10 chhungin ruihhlo avanga thi mi 805 an awm. Chawhrualin kum tin mi 80 zet thi ziah ang an ni a, zu leh ruihhlo hmansual avanga thi tam ber record a tling hial awm e.

Congress Sorkar kal lai mek, kum 2009 - 2018 hian ruihhlo vangin mi 327 an thi tawh a, chawhrualin kum tin mi 33 thi ang vel a ni. Han belhkhawm la, MNF sorkar kum 12 kal ta chhung khan ruihhlo vangin mi 813 lai an thi a, chawhrualin kum khatah mi 68 thi ang an ni. Congress sorkar chhung kum 22-ah thung chuan mi 655 an thi hman a, chawhrualin kum tin mi 30 vel thi ziah ang a ni thung.

Mizoram sorkarin MLTP Act a hma lai kum 1999-2008 MNF sorkar hun chhung khan ruihhlo vangin mi 805 zet an thi hman a. Tichuan, Congress-in kum 2009-2018 sorkarna a rawn siam ve leh mek a, MLTP Act chu siam ṭhain MLPC Act hmangin zu a zuar a. Hemi inkar kum chhung hian ruihhlo avanga thi mi 327 chauh an awm.

Mizoram Excise & Narcotic Department chhinchhiah dan hi a dik thawkhat turah ngai ila. Heta ṭanga zawhna lo piang ta chu, “Engatinge MNF sorkar hun chhunga ‘Total Prohibition’ ni bawk si, heti tak mai a zu leh ruihhlo avanga thi an tam? Engatinge Congress sorkar apianga ruihhlo avanga thi an tlem duai ṭhin?” tih hi a ni.

Mizoram Sorkarin zu a zawrh avanga heti tak maia zu leh ruihhlo avanga thi an lo tlem leh zu rui buaina siam, motor accident, ruk ruk, dawr leh in rawk etc. awm ta mang lo leh Police crime record nasa tak maia a tla hniam hi a lawmawm a ni.

Tuna Congress sorkar hlawhtlinna bul ber pakhat pawh NGO te nena thawh hona ṭha an neih vang ni berin a lang.

J.M. Vura, Saron Veng, Aizawl