NUN OVERTAKE
"Tin, a hma lam kalte leh a hnung lama rawn zuitute chuan Hosana Lalpa hminga lo kal chu fakin awm rawh se. Ram lo thleng tur kan Pa Davida ram chu chawimawiin awm rawh se. Chungnung berah khian Hosana," tiin lung rual takin an au a nih kha!
He khawvel hi intlansiakna ram a nih vang nge? Hma hruaitu nih tum reng rengin kan hmanhlel a, a hmasa ber dawttuah kan lungawi lova, No.1 lovah hi chuan kan lungawi thei mawlh lo; amaherawh chu No.1 hma chiah hian No.0 a awm tih erawh kan ngaihtuah ngai lo thung a nih hi maw? Hma hruaitu nih nuam kan tiin thiam pawh kan thiam narawh e. Mahse, hnung zuitu nih erawh kan thiam lo hle thung si. Hma hruaitu nih kan tum luatna lamah hian kan chesualin ‘Hero to Zero’ ah kan tla thla thei reng a ni. Hruaitu ṭha tak ni tur chuan zuitu ṭha tak kan nih tel a ngai.
Target fuh turin kan ‘target’ kan kal pelh emaw ‘overtake’ palh hlauh a nih chuan kan mission a fail thei tlat. Chuvang chuan kan target lam pan a, ding tak emaw a ṭha thei ang bera ‘target’ fuh tumin kan pan tur a ni.
Aizawl khawpui kawng chep ve takah hian a thei ber emaw in ti a, midang hmakhalh tum reng renga damlai hringnun chhiartute hian ‘Silent City’ hi an ti bengcheng. Midang hma a tlan thiam em em ho hian midang hnunga tlan an zir ve a ngai. ṬKP, KṬP, PYD etc. member active leh rau tak takte hian ‘traffic/ road manner’ hi Kristiannaah hian a tel ve tih hi kan hriat tel a ngai. Nge Biak In bakah kristianna hi kan chhawm peih lo zawk?
Kan U Dika chuan "Smart awmzia chu a zoṭawng tluang pangngai chuan politeness a ni" a ti mauh mai a dik viau-in ka hria a, a dik lo tiin tuman kan hnial ngam lo zawng a nih ber mai hi! Hmel chang ti ṭha vur ringawt a, fuke bal hle si te hi an ṭawp reuh ka ti. Chutiang chiah chuan bike, scooty ṭha pui pui a ‘controller’ hmel fai veng vawng te pawh hi midang hnunga tlan thiam lo leh tlan tum lo hrim hrim an awm leh ṭhin. An smart dan hi a veikhawr ru riauin ka hria. ‘Traffic jam’ an inhnawh tih tawh nak laia petrol/ diesel la tura kan in ‘line’ ṭhup lai a, mahni puala ‘line’ lo siam ve leh ringawt zel te; traffic jam a kan intlar ṭhap laia hmahmawh fal bik riau leh inthlahrunna nei map lova lo double/ triple lane ṭhin te hian sim rawh se! Tihpalh thil thu-a kham panga nawr liam tlak an ni.
Nun ‘over take’ traffic emaw fic-lo emaw jam a awm tawh hrim hrim chuan Nun Overtake nuam tih zawng tak a ni. A rem leh rem loh lam an ngaihtuah lo an rilru-ah 100%-in overtak a lang tawp, an chem kalna lam zawng tak a ni. Kawng hi a chanveah bung hmawk se an overtak em em dawn a ni tih reng an ngaihtuah lo. A bik takin KMT Duke, sport/ racing bike an ti emaw ni ho hian an bawp an han tikual kua ang heng hawng a, ring tur arh chungin mi zawng zawng hmaah tlan an tum nge? Vai vuak bak hlau tlan ang maiin hmanhmawh bak lengin an lo lim puat puat ṭhin zu nia. An hmanhmawh nge nuam an ti zawk? An hmanhmawh a nih chuan hma taka kal mai se, a nih loh leh nuam an ti ve hrim hrim a nih chuan Mamit leh Champhai road-ahte va tlan se ti nia.
Kristiannaah pawh hian kan zui Lal Isua hi kan lo overtake palh hlauh ang e. Kan hmawnhmawh luatah hian Lal Isua tlan pelin kawng dang kan lo zawh reng lo maw? Lal Isua zui tur chuan a hnunga kal i zir teh ang u. Mi hmaa kalin an hnung a zui theih loh!
Pate Lyno