PWD Minister ban chhan tur zawk chu
Tuirini lei chim vangin eptu lamin PWD Minister bang tura an tihna hi ka lo chhiar ve a, TV lama sawihona pawh kha ka lo thlir ve a, a banna chhan tur ka hre lo. PWD Minister ban chhan tur thil dang erawh ka hre zawk a ni.
PWD Minister a nih vangin hmun pakhata lei siam hi a tlawh a ṭul lem lova, a bialtu MLA-in a tlawh kha a ṭha tawk em emah ka ngai. PWD Minister khan tlawh se a chim loh phah dawn lova “Minister-in a tlawh hnuah a chim,” an ti leh mai dawn a ni. Tin, kha lei chim kha engineering failure dik tak a nih vangin political head hmer tel tum ṭalh hi chu fapate rukruk avanga pa ber tan ina khung tum ang deuh a ni a, a fapate sualnaah mawhphurtu a nihna awm tho mah se bang tur chu a ni lo.
PWD Minister ban chhan tur zawk chu Sairang leh Aizawl inkar kawngpui a siam ṭha thei lo zawk hi a ni. He kawng hi Aizawl luhka kawng pawimawh tak a ni a, motor lian zawng zawngin Aizawl an luh dawna an paltlang a ni a, tuna mi anga fur kan nghah chuan kan buai leh dawn chiang khawp mai.
Rangvamual lei min kumkhua khu an siam ṭha ta deuh a, an thian fai thawkhat tawh a, a bula kawngpui chhe em em mai, lirthei kalh theih ṭawk ṭawka an la dah reng mai khi PWD Minister hian a hmu ve lo em ni? Hei hi chu lei dawh ang a ni tawh lova, amah pawhin Airport a pan ṭuma a kal tlang ziahna kawng pawimawh tak a ni a, siam ṭhat tir teh se. Helai kawng siam ngai lai phei hi chu sum tam tak senna tur pawh a ni lo a, metre 100 vel lek a ni a, Mizorama kan khualzin zawng zawngin an kaltlang a ni bawk si, siam a ngai.
He kawng pawimawhna leh kawng chhiat dan leh a pawimawh si zia te hi ngaihtuahna fim hmanga ngaihtuahtu tan chuan siam loha chhe taka tun anga dah reng hi chu thil atthlak leh pawi tak a ni a, mipuite min zahlohna kawng khat a ni bawk a, hnam dang min rawn tlawhtu zawng zawngin an paltlang bawk thin avangin state pum ang pawha mualphona tling hial a ni.
Hunthar lei tlahniam mawlh mai hi ama bial chhung a ni nghe nghe a. “Nakinah a tawlh leh dawn tho” ti niawm taka kal theih ṭawk ṭawka dah hi chu Minister tan phal chi a ni lo. Fur a thlen leh chuan tui a tling luau ang a, kan buaina hi a nasa dawn.
PWD Minister hian a chinchang a hriat loh lei chimah mawh a phur lo a nih pawhin a paltlang fo ṭhin, metre 100 vel leka thui hmun hnih, Aizawl luhka, motor lian bakah mikhual pawimawh zawng zawngin an kaltlang theih hi a siam ṭha thei lo a nih chuan - “Bang rawh se” tih hi ka ngaihdan a ni e.
Malsawmdawngliana