KAN CM HIAN PM HMU VE THUAI SE

Assam nen ram inchuh vangin kan buai a, nunna hial chan an awm phah hi a pawi hle mai. Heti chung pawh hian kan ram inchuh chu a la fel chuang lo va, boruak rit takin min la delhin ramriah Police tam tak a tawn tawnin an la inring ṭhup reng a ni.

Engemaw chen kawngpui dan chah a nih hnuah tunah chuan motor a tlang ṭha leh tawh a, Chief Secretary ve veten inbiakna neiin ramri inchuh laiah tu ve ve mahin hma lak rih loh an remti tlang tih chu kan thlen chin a nih kha. Nunna hial chan ngai khawpa ramri buai neih hi ram hruaitute tan chuan hnapui bera neih nghal char char a hun ta tak zet e, motor a tlang tak vang maia muanga awm na chi a ni tawh lo vang.

India mi ṭheuh ṭheuh hmelma ang maia kan inkap chiam mai kha a zialo a, kan inkah chhan kha chin fel ran a ṭul hle. Kan ram hruaitute hian mutmawh hnarmawhah nei se, thil kal sual a awma inkap leh mai thei dinhmunah kan la ding mek reng a nih hi.

Assam CM Himanta Biswas Sarma chu August ni 7 khan Prime Minister leh Home Minister ramri chung chang sawi pui turin Delhi a kal thu leh PM a hmuh thu kan hria. PM hnenah hian eng thute nge a sawi hriat vek ni lo mahse, ramri chungchanga a dinna kan hriat vek sa hi thiam tak leh uar takin a sawi ngei ang a, min zu hek nasa viau maithei! Ramria inkahnaah khan nunna chan zawk an nih avangte leh Pol.party thuhmuna awm an nih bawk avangin Assam CM thu sawite chuan PM pawh a hneh (convinced)hle ang tih a rin theih.

Mizoram aṭang erawh chuan Prime Minister hmu turin kan ram hruaitute vawiin thlengin an la kal ve lo a ni.

PM dawhkan­ah ngei, Assam Chief Minister ang hian kan CM hian ram inchuh avanga inkahna lo chhuah chhan dik tak leh ramri a Mizote dinna hi dawhkan khat kil ngei a zu hrilh ve vat a hun.Assam CM khan PM hnenah engtin tak nge min zu sawi tihte pawh a zuk hriat phah ngei bawk ang a. Kan dikna leh kan dinna hi PM zu hriattir te, a rang thei ang bera ramri min chin felpui tura zu biak a hun. Hmai­chhana thu pawimawh leh mamawh sawi hi lehkhaa inthawn ngawt ai chuan ngaih pawimawh a hlawh ṭhin a nia.

Thir chu a lin laiin deng rawh, tih ang khan ramri thuah hi chuan Central lam pawhin min ngaihthlak duh hun lai tak a nih hmel a, tun hi thu dik zu sawina hun ṭha tak pawh a ni ang. Khawvel mit hmuhah pawh tun ṭum inkahnaah khan thiam kan chang zawk ni te pawhin a lang a. Kan dikna hi kan ngawihpui reng a, kan ṭhenawmpa dik lo zawk, leikuai taka zualko an lo awm si chuan a thiam zawk hian thiam loh kan chang lel mai ang tih pawh a hlauhawm. Telephone leh lehkha thawn hmang ngawta thil (issue) pawimawh berte zinga mi, ramri thu a indawr hi a tawk zo lo, chumi pawimawhna hria chuan Assam CM pawh hian Central lam thu neitute dawr tur hian a thlawk thla vat niin a lang.

Vairengte thlang Aitlanga huan neitu chhungkaw 18 velte chuan hun rei tak an lo enkawl tawh an huan thlai chu Assam Police-in an tihchhiatsakin an ram an luahsak thu te, vawiin thlenga an huan an enkawl chhunzawm theih loh thute kan CM hnenah ziaka thlenin hma lakpui turin an ngen tih kan hmu a. Hetiang deuh bawk hian Buarchep lamah leh Mamit District khaw ṭhenkhatah pawh Assam lam aṭangin ramri-ah harsatna kan tawk mek. Hetianga harsatnate hi rang taka chin fel a nih loh chuan kan ram kan chan mai ang tih a hlauhawn hle e.

Chuvang chuan kan CM ngei hian Assam CM tih ang hian PM leh HM te hmuin zu sawipui ve se a duhawm mang e. Ramri chin fel hi thil awlsam tak a ni hauh lo vang, mahse chin fel duhna tak tak rilru puin kan ram hruaituten hma an lak thuai a ṭul tawh takzet a ni. Tuna Assam CM hi a chet vel dan aṭang hi chuan ramri chin fel a duh hle niin a lang. Meghalaya nena an ramri fel lo hmun 12 zinga hmun 6 chu inremsiamna hmanga tih fel an beisei mek thu leh CM ve vete inbiak thu pawh kan hria a. Chutiang deuh bawk chuan Arunachal Pradesh nen pawh an indawr mek. Keini nen chuan CS level-ah kan la indawr chauh a nih kha.

Ramri chin fel duh ve ve kan nih takzet chuan tun hi inbiakna hun ṭha a ni. Kan ram hruaitute hian nawr kal kher ngai lovin hma han la vat se la, mipuiin kan thlawp tlat tih inhre bawk se. An tifel thei lo a nih pawhin an thlen chin leh mutan chin ve ve tal hi chu hriat chian a hun tawh hle mai. Nunna hlu tak chan hial khawpa inkahna thleng khan ramri chin fel kawngah ram hruaitute hi beng harh lul teh se.

Rawtna:- Ramria kan inkah chhan te, kan huan ram Assam-in min tihchhiatsak leh luah luihsak te, ramri ching fel tura hma min lakpui turtea Prime Minister leh Home Ministerte dawr tur hian kan Chief Minister zahawm tak hi Delhi tlangah zu thlawk thla ve vat se tih ka rawt e.

Mipui pawhin inbiak thuai hi an nghakhlelin a lang a, a bik takin Vairengte leh ramria awm khaw mipuite phei chuan an nghakhlel leh zualin a rinawm e.

H.Lalchhuanliana