Khu lam sorkar leh helam sorkar

Tun hnaiah pa fing tak tak anga ngaih zingah, "Central lama an sorkar miau avangin BJP hi zawm ve mai tur," tih leh, "BJP support thei tur party thlawp mai hi a finthlak, Central lamah an sorkar miau si," ti lam hawia titi leh thuziak hmuh tur a awm ta zauh zauh mai a.

Khu lam sorkar leh helam sorkar hi kan rin ang hehu hian an inzawm lova, khulam ho lam ṭang kan nih vangin state dang aiin min duhsak em em dawn lova, khulam mi he lama an sorkar loh avangin min duhsak loh phah lutuk dawn hek lo.

Khulama sorkar apiang duhsak tur ni ta se, Mizoram state tluka Congress (UPA) sorkarin an duhsak tur kha an awm chuang lo. Central lama Congress an Lal chhung khan he lamah Congress tho an lal a, ṭhenawm state aia min duhsakna sawi tur a vâng hle tih chu kan zavaiin kan hre vek a ni.

Khu lam ho khu Central sorkar an nih hi an chiang a, party mal enkawltu tur sorkar an ni lova, India pumpui enkawltu an nih an chian avangin Congress sorkarna state kha Central Congress sorkar khan min vulh lem lo tih chu kan chiang tlang a ni lom ni?

Central-a Congress an sorkar chhung khan ṭhenawm Tripura lama CPM sorkar chu hlamchhiah an ni ngai lova, Gujarat-a Narendra Modi hova BJP sorkar chu an duhsak loh phah lo tih kan hmu a ni, heng state pahnihte hmasawnna hi central lama an zawmpui an sorkar loh hunlai ve ve a ni.

BJP-in central lamah sorkarna an chan avanga BJP sorkarna state nih loh hlauhawm ang hiala ngaihna leh central lamin min duhsak loh hlauhna hi chu India ram inrelbawlna hriat loh vang a ni. Central tu pawh sorkar se, state tinin an chanpual hi a awm sa a, chhuhsak theih kan ni lo. State sorkar a fin a, project a siam thiam a, hna thawh a tum chuan khu India sorkar khu a inhawng a, BJP leh BJP lo sorkarna state a thliar teh chiam dawn lo. Tunah pawh central-ah BJP an sorkar a, Mizoramah Congress an sorkar a, central lama Congress an sorkar lai nen state-ah nghawng a nei lem lova, a danglamna mipuiin kan hriat vak loh hi maw.

BJP leh BJP rimnam hi kan state atan kan duh lo a nih chuan khulama tlaktlum loh hlauh vanga 'hlauhtlawn vote' an ngai chuang lova, anni hi kan duh a nih chuan BJP an nih vanga vote hlauhawmna tur pawh a awmin a lang lo.

Ṭhenawm state politics avang te, central sorkar inthlak avang leh Vairam ril lam politics che vel hian Mizoramah nghawng a nei lem lo chu a nih hi, kan hun kal tawh thlir hian. Tunah hian ṭhenawm state leh central boruak thlira Mizorama sorkar tur lo sawi zawm tum an awm a, khulam sorkar leh helam sorkar a inzawm lo tih hi an hre tawk lo niin a lang.

Joseph Lalremruata