Mizoram hmasawnna kailawn (Kohhran leh politics)

Mizoram chhunga Kohhran puithiamte leh rawngbawltute kan ram tluchhe mai thei dinhmuna a ding tung ding leh tur hian an mawhphurhnaah ngaiin an rawn penchhuah a ngai ta.

Evangelist, rawngbawltu, upa, reverend, pastor ni mek leh chawl tawhte hian politics huang chhunga rawngbawl hi an telvena tur ni lova ngaia an kawmserh avang hian Zoram tluchhe mek tung ding tura hmalatu tam tak hi politics-a Koham, hlawkpui leh hausak tumte hian ram an tihchhiat mek laia ‘lo thlir liam maitu’ an ni reng dawn em ni? Mizoram hi a tlukchhiat chuan Reverend, Pastor, Upa, Evangelist, Missionary tu leh fa te tiamin kan tuar tlang vek ngei ang. Chhuan lokal zelte tana ‘ram nuam leh tihtlak’ kan siam loh chuan Cachari leh Tripuri hnam iangin ‘inti kristian taka ral riai riai’ hi kan la hmabak tur a la ni mai lo’ng maw?

Mizoram chhungah Party based sorkar a din ṭhin avangin roreltu kan thlan tlinte leh party chhunga thiltitheite ngaih pawimawh hmasa ber chu, sum leh pai, hausakna leh induhsakna ‘kei leh ka chhungte’ a lal hmasaber a, party-mi leh sa in an dawt a, a pathum nan an VIP mipuite’n a hnung kan dawl ṭhin. Politics hi eizawnna leh hausakna awlsam atan mi tam takin kan hman avangin ‘rorelna dik hlamchhiah a nih avangin hmasawnna in a tuar thung’ tih hi kan pawm ngam a ngai.

Politics hmangsual a ham­ṭhatna atan hman a ni hi George Bernard Shaw chuan, ‘Politics is the last resort of the scoundrels’ (Politics hi mi hlemhlete bukhuarna a ni) a tih hian a sawi chiang khawp mai. Mi hausa ngaihsan leh pawisa duh luat ‘culture’ ah Mizote hi kan lut mek a, hemi ‘culture’ hian Mizoram hi a run mek a ni. Social ladder - Kailawnah mihausa leh awm thei zawkten ‘mi hmuh tura han inpho chhuah leh lansarh’ kan tumna lamah Kohhran chhung thlengin kan seng lut ta a ni lo maw? Dik tawk lova pawisa lalutte thawhlawm lah ‘target’ khum nan a mamawh avang a ni ang chu Kohhran huang chhunga hlemhletna lam hawi ‘sermon’ hriat tur a van ta a, vantlangah ‘moral corruption’ paipawn chunga nung leh hnathawk kan tam tual tual ni ber hian alang.

‘Milem be suh’ tih hi ‘pawisa biakna culture’ a kan lut tan a sawinaah ngai ila, ‘The love of money Is the root of all evils’ tih hi a la dik dawn chauh a nih hmel. Rorelna dik siam tur leh ‘hmsawnna kailawn’ thar siam tur hian politics huang chhungah hmahruaitu leh a khalhngiltu ni turin puithiam, rawngbawltu, kristiante hian mawhphurhna kan nei a ni tih hriain kan penchhuak tur a ni dawn lawm ni.

Biblical political leaders thih huama ‘ram hruaitu’ tlem han tarlang ila: Nova, Abraham, Mosia, Joshua, Zawlnei Samuela, Davida, Deborah (female Judge), Gideon, Baptistu Johana, Peter, Apostle Paul, Apostle Johana. Bible zirtirna zuizuiin ‘Lal Isua kha Politics thilah a inrawlh em? Rev. Dr Eric Barreto chuan ‘Jesus was political, His preaching was political, His ministry was political; Jesus directly challenged the political and religious powers of his day’ a tih hian rorelna dik tawk lo, politics lamah emaw sakhuana lamah emaw chuan Lal Isua chu a inrawlh nghal ṭhin, tih chu a hmuh dan a ni. Martin Luther King, Jr pawh khan ‘Pastors must play critical role in politics,’ a ti a ni. David Lane, founding Director of American Renewal Project phei chuan a la duhthawh deuh zawk, ‘mi fel nuai khat - pastor-te leh an ṭhiante, Kohhran mi leh sa leh an family member-te chu community organization, local administration-ah te thusa tam zawk tur leh Politics a nihna chuh tam turin a fuih bakah Pastor sang khat rual phei chuan City Council, Board, State Legislature-ah te member ni turin a fuih a ni.

A Thupui ken ber chu: ‘It is necessary for spiritual men and women to bring wisdom and righteousness to every area of society,’ tih a ni. Enge ni Sakhuana chu: ‘Life is religion, Religion is the activities that are connected with the worship of God,’ tih hian a tichiang viau.

Tun hnua puithiam political leader tlem han tarlang ila: Arnie Fletcher (Baptist)- Governor of Kentuckey; Jean Bertrand Aristide (Roman Catholics)- President of Haiti; James A.Garfield (Diciples Christ) – Congressman, 20th Presidentof America; Meron Cistea (Eastern Orthodox Church) - PM, Romania; Canaan Banana (Methodist) - PM, Zimbabwe; Maralo Crivella (Penticostal) Senator, Brazil; William H.Hudnut III (Presbyterian) - Mayor of Indianapolis. Chuvangin, kan puithiam, rawngbawltute rawn ṭhangharhin ‘movement for political awakening for the safeguard of Zo-patriotic, cultural and religious integrity’ meichher han chhem alh seng chuan kan political leh social system chhe mek hi kan siam ṭha thei ngei ang.

Chuti lova kan puithiam, rawngbawltute hian anmahni awmna ṭheuh Kohhran (deno­mination) a an nihna ngai pawimawh leh ngaihlu zawka an kut an kuangkuah tlat chuan hnam boral tur leh thi mai thei dinhmunah kan la in hnuk lut ngei ang. Hemi pumpelh tur hian ‘Kohhran hruaitute rawn pen chhuakin a hmatawngah an awm a ngai ta a ni.

CJ Zova Zobawm