Ka pa zu hi sim ve tawh la!

Nunna pawhin a tlin rei loh tur zu kan buaipui a, kan in a kan rui a, kan phuna kan áng a, ninawm khawpin kan phun chiar tel a, kan han chapo em em ringawt leh ta nghal a.

Sawi mawi chawpa ruih hi changkanna a ni lo va, changkang tura ruih phet lo tum ve hi a tunlai lo va, a màwl thlak letling zawk hial ta ve ang. Rui lo hai lo te-a awm hi a tunlai a, a changkang êm êm a ni.

Kan ṭhenawm Bi­har-ah chuan zu hi kan ram tan a ṭha lo ve tiin, an titawp a. Keini ramah chuan Sawrkar rorelna sàng Assembly House-ah meuh zu ṭhatzia an auchhuahpui a, kan sakhaw rawng­bàwltute, pulpit tlàng bu zawl luahluma beramte ei tur chaw pe tute an sel ngam a, zu zawrh chu an tihmakmawhah an la ngai ta zel a. Hei hi chu mipuite an mahni thlangtling tute hmai zah lohna tawp khawk a ni.

Hmanni-a MNF President ina zirlai pàwl hruaitute a lawm luhni-a a thu­sawi pakhat, "Zoram­thanga'n vaibelchhia a hmuam an ti a, Lal Thanhawla erawhin zu a hmuam...!" a tih khan thu tam tak a sawiin alang. Zu hi chu sawi mawi lam chi ni lovin, harh thar lehna Gospel camping-a lut kher lo pawha harha khap chi thil hi a ni zawk si a...

CKTP kumpuan film pakhat, 'Doctor Fanu' tiha a changtunu, a ṭhiantena zu in tura an tur sek ṭum a, "In sawrkar dàn hnuaiah chuan lo va rui vel mai mai teh u" a tih khan thu tam tak a sawi bawk awm e. Àt i duh chuan zu in rawh tih a ni si a.

Tuk khat ka zing lèng chu, in pakhata naupang ṭap thawm hi ka hria a, ka ding khaw muanga naupang pakhat kum 14 mi vel ina "...'A pa' zu intawh suh, a nuam lo e, a nu i hau ziah leh nghal a...!" tiin a pa alo kamkhat a, ka khawngaih thla a la riau va. Pa, nih duh si a, fate tana pa nih awhawm lo, pa tlo lo kan tam si dan tur lamin ka mitthlaa ka mit sulh a, nupui neia fate tana pa ni zawng zawng te hian 'zu' leh 'ruihhlo' dang avangte hian kan nupui fanaute ti thla bar zawnga chet lak hi a va fuh loin fate tan a va him lo em.

Naupang ninhlei rualina 'a pa, zu in tawh suh!' tih ngai chhung­kua kan kawmthlang leh kawmchhak te ṭheuhah hian an va tam dawn rua em?!

Minung damlai ni a, nupui fanau nei a, pa ni zawng zawngte u, khawthlang pa pakhat ina, "Màwlna laka dawhtheihna tawp nei lo hi zuin min pèk theih chhun chu a ni" ti-a alo sawi hi hre rengin, zu hi àtpui lovin i finkhalh zawk teh ang u. No khat in hi hriselna nise, no hnih in chu phursurhna, no thum in chu zahna, no li na chu àtna a ni si.

LH.Hauheng, Nghilhloh Rùn