Serchhip inthlan thlir let thuakna
Mizorama by-election awm tawh zawng zawng zinga ngaihven hlawh ber chu Serchhip biala inthlan ṭhatna kha a ni a, Pu Lalduhoma hneh taka thlan tlin a ni tih kan la theihnghilh lovang.
Kha inthlan kha Covid-19 boruakin a rawn chhilh zui avang leh amah Pu Duhoma ngei pawh mipui hmaa inlanna a la neih theih loh (public meeting ang chi) bawk avangin MLA tlin pawh an la lawm lo hialin a rinawm. Chuvangin, tlemin tlai deuh tawh mahse kha inthlan leh kum 2023 inthlan inkaihhnawih dan leh party hrang hrang dinhmun kha a tawi zawngin kan thlir kir ve leh dawn a ni.
Inthlanah khan vote 2950 in Pu Duhoma kha a tling a, amah hnaih bertu chu MNF Vice President Pu Vanlalzawma a ni. Pu Zawma hi MNF zingah chuan mi hming ṭha leh pa sawisel kai lo tak a ni a, MNF in official candidate-a kum 2018 inthlana an hman Pu C Lalramzauva kha a din ngei a rinawm laiin MNF chuan Pu Zawma kha an rawn vawrh chhuak ta daih a, kha kha tlin an duhzia ti langtu a ni. MNF President Pu Zoramthanga phei chuan MNF-a Pu Zawma pawimawhzia a sawi khan 'hna semtu' a nih thute kha a sawi a, chutiang taka mi pawimawh an vawrh chhuak a, Chief Minister leh Minister leh MLA rualin an campaign pui luai luai chung pawhin MNF candidate Pu Zawma khan Pu Duhoma kha a khan lo hle a. Pu Duhoma'n vote 8,269 a hmuh laiin Pu Zawma chuan vote 5,319 a hmu phak chauva, a polling booth hrang hrangah khan ZPM kha an sang deuh vek mai a, kha thil kha mak danglam tak a ni.
MNF khan Pu Zawma ni lo midang phei chu vawrh chhuak ta se Pu Zawma aia vote hmu sang tur hi an nei lo hial mai thei. Serchhip bialin Pu Duhoma an lo duh nghet hle tia kan sawi theih rualin Serchhip bial chuan MNF chu an hnawl chiang hle tihna a ni tel bawk a, ruling lai an nih bakah kum thum dawn ruling bial nihna chance a la awm chungin an hnawl fithla hneh hle a ni.
Mahni sorkar lai pawha tling zo lova MNF an han tla tawp mai khan politics-ah chuan zawhna tam tak a zawt nghal a, engvangin nge MNF an tlak? ZPM an len vang hrim hrim nge MNF an nin vang? Pu Duhoma an ban chhan lainat vang liau liau em ni le? Pu Duhoma mimal weight rih vang zawk a ni em? MNF ninna aiin ZPM duhna a len zawk vang? MNF-in Pu Duhoma an hek kha mipuiin an pawm lova, MNF an huat phah a ni em?
Zawhna chhan sen loh a nih bakah mahni ṭan lam party milin heng zawhnate hi a chhan theih a, chu bakah a hma lawka Mizorama hneh taka tling thei Congress party te an rawn hniam ta em em leh tuna Congress in MLA an nei tlem ta lutuk pawh hian zawhna a la hring tho a ni. Politics-ah chuan tlu hlen a awm thei lova, lal hlen pawh a awm thei lova, MNF leh Congress bawk hi an in lal chhawk ṭhin a ni.
Pu Duhoma hi chu ZNP a nih lai pawhin a la sorkar ve ngai lova, ZPM a nih hnu hian an duh thar thut anga an sorkar tir dawn nge MNF leh Congress duh lohna awm lo awm ta lutuk hian ZPM hi anmahni ṭawngkama "Enchhin" turin an vawrh chhuak tawh dawn le?
"The answer is blowing in the wind" an tih hi a dik rualin Serchhip bial by election hian 2023 hlim thla a rawn chhawp chhuak tawh tihna a ni zawk lo maw? I pawm zawng a nih leh nih loh rawn thai ve ta che u.
H. Lalthanliana