Non formal education kan ngaihthah thei lo

Vanglaini daily February ni 10, 2020 chhuakah C. Lalengkima’n zirna uar kuma Non Formal Education pawimawhna a rawn sawi kha a dik hle mai. Zirna uar a, hna sang leh zahawm IAS leh a dangahte tling thei tura zirlaite fuih ṭhin hi thil ṭha tak a nih rualin academic line leh hna zawnna (career oriented) ngawr ngawr lam ni lo - zonun ze mawi chhawm nung a khua leh tui ṭha ni tura inzirtirna te, zuk leh hmuam, ruihlo laka fihlim tura inzirtirna te pawh hi kan uar deuh deuh a ṭul. 

Kum 2016 khan Aizawl DC, Pu Kannan Gopinathan-a hmalaknain Aizawl district huam chhunga Upper Primary School zirlaite zingah zuk leh hmuam, zu leh ruihhlo laka fihlim a pawimawhzia inzirtirna project HIMNA MADAT kalpui a ni a. He project hian zirlai naupangte zingah a ṭha zawnga nghawng nei chho mekin, a hnuah district dangah pawh kalpui a ni ve ta nghe nghe a ni. 

Online technology addiction

Information Technology (IT) lama hmasawnnain a ken tel, social media leh online games-in ṭhalaite a run mek a. Zirlai tam takin an zirlai tihchhiat phah khawpin social media leh online apps an khawih nasa a ni. Facebook, Youtube leh Instant messaging apps (e.g. Whatsapp) ah ṭhalaiten rual u zawkte zahna chang an hre tawh lo va, mi dang rilru hliam theih post leh comment hmuh tur a tam hle. 

Nikum 2019 October ni 28 a Zonet leh Vanglaini ṭang kawpin social media chungchanga workshop an buatsaihah social media-in society-ah nghawng a neih dan sawiho a ni. Prof. HK Laldikpuii’n a sawi angin online tools hrang hrangte hi a ṭhatna sawi tur awm ve ṭhin bawk mah se a ṭhatlohnain nghawng a neih ril zawk tlat zel avangin a hman dan ṭha zawk in kawhhmuh hi thil ṭul tak a ni. 

Social media nghawng ṭha lo tak pakhat chu hmel inhmu ngeia inkawmhona (face to face conversation) a titlem hi a ni. Hmai chhana inkawmhonaah chuan mitmeng leh hmel aṭangin midang ngaihtuahna (emotions/ feelings) kan va hriathhiampui thei a, hei hian inlaichinna ṭha zawk a siam ṭhin niin mithiamte chuan an sawi.  Online-ah erawh chuan hmel inhmuh a nih tawh loh avangin duh duh sawi theiah inngai-in midangte rilru tina thei tur zawnga post leh comment kan pawisa ta ṭhin lo a ni. 

‘Reclaiming Conversation: The power of talk in a digital age’ tih lekhabu ziaktu, American sociologist, Sherry Turkle chuan, America a middle school pakhat Holbrooke school naupangte mizia leh hawiher a zirchiannaah zirlaiten an class room-ah IT tools an hman nasat avangin hmaichhana inkawmhona a tlem a. Zirlai naupangte zingah midang dinhmuna va inchantir theihna (empathy) a tla hniam a, upa zawk leh pawl sang zawkten a naupang zawk leh chak lo zawkte chhaih nawmnah leh rilru tihnat an hreh lo tih a lo sawi tawh a ni. 

Zirlaiten lekha an chhiar tlem tial tial a, social media bawia tang an tam em em bawk. All India level exam - NEET, IIT JEE leh a dangteah kan ranking a san theih tak loh te pawh hi chhan hrang hrang zingah online applications-in zirlaite a chim buai nasat vang a ni ve thei ang. Chuvangin, zirna uar kumah hian ṭhalaiten ṭangkai zawk leh hrisel zawka IT leh online tools hrang hrang hman dan an thiam theih nan zirnain leh kohhranah hetiang lam hawi inzirtirna uar chhoh zel a ṭul. 

Integrity education

Khawvel huapa eiruk leh hlemhletna (corruption) dotu pawl, Transparency International (TI) in kum tin a tihchhuah ṭhin, Corruption Perception Index (CPI) a India dinhmun hi a chhuanawm lo hle. Nikum 2019 khan India CPI score chu a hma kum aia tlahniamin, ram 180 zingah 80 rank a hauh phah hram. Asia ram ṭhenkhat, South Korea (39) leh Malaysia (51) te chuan corruption dona lamah ṭan an lak nasat avangin a hma kum aiin an ranking pawh a han sang dawrh mai. 

Nikum, August thla tawp khan Seoul-ah International Anti-Corruption Academy (IACA) buatsaihin Regional Summer Academy (RSA): South and South East Asia neih a ni a. RSA-ah hian anti-corruption expert-ten topic hrang hrangah zirtirna pe in ram dang anti-corruption agency-ten corruption leh thil dik lo (unethical practice) an dona kawngah a venna (prevention) lama ṭan an lak dan han hriat chuan rualawh a na duh hle. 

Ṭhenawm ram- Maldives, Bhutan, Cambodia leh Malaysia-ah chuan Anti-Corruption Commission-ten Prevention and Education Department hran neiin, zirna in leh college-ah awareness campaign neih ṭhin a ni a, integrity leh anti-corruption lam hawi zirlai te pawh curriculum-ah telh a ni. Hei hian eiruk leh hlemhletna ṭhat lohzia naupangte rilruah a tuh ngheh a, an puitlin thlenga an chhawm chhoh an beisei a ni. 

Chhimbial Chhantu buatsaihin October ni 31, 2019 khan Lunglei-ah “Corruption Risks & Prevention” tih thupui hmangin seminar neih a ni a. Mizoramah hian a hran­pain survey neih la ni chiah lo mah se corruption leh unethical practice a hluar tih chu seminar a kalkhawmte ngaihdan a ni. Eng ang pawhin dan leh hrai nei ṭha mah ila, zirlai, nakin lawka sawrkar fawng chelhtu turte rilruah eiruk leh hlemhletna ṭhat lohzia hi chi anga kan tuh loh chuan corruption kan titlem tak tak thei ngai lo vang. 

A hnam anga kan lo hrisel zawk theih nan te, zirna kawngah kan dinhmun a san zawk theihna tur te, khawtlang nuam, dikna in hmun a channa ram kan siam theihna turin zuk leh hmuam, zu leh ruihhlo laka fihlim a, online tools hmang thiam tur leh thil dik lo (unethical practice) lak ata fihlim turin kan tleirawl leh ṭhalaite hi tun aia nasaa fuih an ṭul. Chumi tur chuan academic line a zirna mai bakah Non-Formal education lam hi tun aiin kan ngaih pawimawh chhoh deuh deuh a ngai a ni.