Tualchhung sorkar tichak tur i thlang ang u

MLA thlan a hnai tulh tulh a, tih laiin rilrua lian ber mai pakhat chu Tualchhung Sorkar, Village Council tia kan hriat lar thuam ṭhat hi a ni. Zoram pum District Coun­cil-a a awm lai aṭang daih tawha V/C hi nei tawh kan ni a, tun thlengin a ngaiin ala kal a nih hi. Dik tak chuan democracy innghahna bul thum chu tualchhung sorkar, V/C-te hi an ni hial a ni.

Ramin hma a sawnna tura a pawi­mawh hmasa ber chu mimal leh chhungkua a ni a, chumi khai khawmtu chu tual­chhung sorkar, kan V/C-te hi an ni. Tichuan ram chhung, tual chhung tin te, ie. khaw tin ten hma a sawn loh chuan ram hmasawnna chu a rualkhai thei lo a, a ke a bai ṭhin.

India ram hi demo­cracy ram lian ber a ni tiin an sawi ṭhin a. Kan chunga roreltu tur V/C kan thlang ṭhin a, kawng engkima kan rawn leh kan aiawhtute an ni. Khawtlang a chhiat a ṭhatah mawh an phur lian hle. Hetiang ni reng chung si hian state sorkar hian an kovah mawhphurhna a nghat tlem em em si a ni. Thuneihna pek tam lam chu sawi loh, an neih sa pawh lak ṭhen sak an ni zel emaw tih turin a kal a ni.

Hetianga an thu­neihna kan chhuh sak zel chuan mi ngawh­ngawl min siam sak tam duh viau awm e.

Tin, Development grant kan tih ang chi, tun hma lama tualchhung sorkarten an hai chhuah leh sorkar aṭanga an dawn ang chi te kha engmah dawn a awm tawh ngai bawk si lo. Chutih rualin tualchhung hma­sawnna tur thil ṭul leh pawimawhte chu a hre chiang ber an ni lawi si a. Chuti chung chuan engah mah han rawnna a awm lo a, sum han pek pawh a awm ngai ta hek lo.

An sum khawih ve chhun chu MGNREGA sum lo­kal, work agency an nih anga VLA, sor­kar mi leh sate lo thawhpui hi a ni mai awm e.

Hetiang taka kan aiawh tur, beng sika kan ngaihtuah a, kum nga chhung atana kan thlan chhuah ni si, engmah ti thei lova, hnung khirha awm mai mai hi chu a zah pawh a zahthlakin, an khawngaihthlak a lawm le!

Chuvangin, tun ṭum kan ram hruaitu tur, MLA kan thlan leh turah hi chuan keini thingtlang mite hi chuan Tualchhung sorkar, kan khaw chhung develpment sum engkim duang a, budget hran siam a, kan MLA-te leh kan Minister-te kal tlang kher ngai lova state sorkar aṭanga direct a kan hmuh ve thehna tur ngei ngaihtuah tur policy a nei MLA thlan chhuah i tum ang u.

Tuna kan kal ngai ang renga kan kal chuan kei ni, thingtlang khuate hi kan te telh telh ang a, kan MLA-te hian min ei fu vek mai ang tih a hlauhawm ta e. Heti zawng hian ngaihtuahna i seng teh ang u.

Patrick Z, Chhingchhip