Mizote leh Kristianna

Communist ramah te, Hindu leh Muslim ho ramah te chuan Kristian nih hi a nuam mang lo, hmun ṭhenkhatah phei chuan lu chhum, ban chhum inhuam a ngai hial a ni. Keini ramah chuan a nuam khawp a, hetih vang hi nge ni dawn kan kristian dan hi ṭhenkhat chu a dal hle niin a hriat. Kristianna hi Mizoten kan changkan phah hle a, India ramah Kristian erawh kan la tlem hle thung. 

Mizote chu kan kristian ṭha a, Chawlh­ni phei chuan dawr zawng zawng a inkhar a, kan khawlai pawh a reh ruih ṭhin. Inkhawm dar a ri chuah chuah a, Biak in kan pan dul dul ṭhin. Mizote hetiang tak hian kan lo kristian ṭha a, mah se biakin kan pel a, dawt kan sawi leh mai ṭhin. Pawisa hmuh theihna a nih dawn phawt chuan tih hreh te hi kan nei mang lo tlat. 

Missionary-te pawh kan tir chhuak nasa a, kohhran 

ṭhenkhat phei chuan za chuang an chawm a ni. Heng zawng zawng han thlir hian Zoram kristiante chu kan ṭha hle a, ramdang miten min fak ṭhinnate pawh hi a tak tak a ni ngei ang. Bible zirna school, college-te pawh kan nei nual, hengah te hian kum tin zir chhuak an awm reng a ni. Pastor tur te pawh kohhranin a duh ang zan duhthlan tur a nei thei tawh a ni.

Kan Pathian thu ngaihthlak ṭhin leh sawi ṭhin te hian kan rilru tak tak a khawih lem lo. Zirbingna lo nei tawh mi pakhat chuan - Sapho khan kan culture tel lovin, anmahni tih dan zul zuiin min zirtir ṭhin a, chu chu ṭha ve viau mah se kan thinlung a fan thei tak tak lo, a ti. 

Sap culture zul zuiin thu kan dawng a, kan Mizo zia kha a tel ve mang loh avangin a tla na thei tak tak lo a ni, a ti hial a ni. Ṭhenkhat chuan kan hnam la naupan vangah te pawh an puh a, eng pawh nise, ṭawngṭai leh Bible chhiar kan thlahdah ṭhin vang a nih ka ring deuh. 

Kan pi pute hun lai, kristian kan nih hma, hnam rinawm leh taima kan nih ṭhinzia te, tun hnuah erawh hnam dangte chawmhlawm, kum chanve ei tak ngial pawh buh leh bal thar chhuak zo lo, kut tling lova pawisa thawh chhuah pawh pawi ti lo hi mi tam tak kan lo awm ta tlat mai. 

Kristian kan lo nih takna chuan min tichhe zo ta em ni, ni ang le? Kan rilru sukthlek (moral) te hi han bihchiang ta hlawm ila, a hring a hranin ruk kan ru lo lem na a, kan kar a hla vak chuangin a lang lo. Kan Kristianna chu han dem ta viau ila eng eng kan an ang aw? Nia, a chin fel dan tur tak tak hi awm thei pawhin a lang lo. 

Bible-ah chuan “...buh lem leh buh tak chu lo ṭo za hrih mai mai rawh se,” tih kan hmu ang. Ram dangah pawh an lo ni ve tho a nih hmel. 

Chuvang chuan, Mizote zingah pawh kristian ṭha tak tak leh ti ve mai mai kan tam a ni ngei ang. Mizote hi thil engkimah tih tak takna rilru pu 

ṭheuh thei turin ṭan ila sauh sauh ang u.