A ZAHTHLAK LUTUK DEUH LO MAW?

(Mahni thil tih ni miah loa hming­ṭhatna lak tum ve tlat, lo insawi luh tum ve tlatte hi kan pipute khan engtin nge an sawi ṭhin le? Hetiang mi hi in hre tawh ngai em?)

CSR - Corporate Social Respon­sibility hi kan hre vekin a rinawm a, a tawi zawngin, company lian leh hausate mipui vantlang tana an luanchhuahna hi a ni. Khawvel ram hrang hrangah kalphung a inang kher lo a, India ramah chuan sumdawng company lian, kum khata sum che vel cheng vaibelchhe 1000 tling chin te, company hlutna cheng vbch. 500 chin te, kum khata cheng vbch. 5 hlep pha chinten an kum khat hlep aṭanga 2% mipui vantlang hmasawnna atana an pekchhuah ṭhin sawina a ni.

The Companies Act 2013 Section 135 chho velah chiang taka tarlan a ni a, an pek ṭhat dan a zirin sorkara an tax pek zat tur thlengin a nghawng ṭhin a ni awm e. Mizorama hnathawk company liante, Bank-ten ambulance, etc an pek ṭhinte pawh hi an company hlep aṭanga danin a phut anga an pek ṭhin a ni. Eg. SBI-in Lunglei Civil Hospital tana crore 1 an pek, mitthi dahna in sak nana hman tur te, company ṭhenkhatin YMA hnena ambulance an pek ṭhin te, etc.

Zahthlak ta chu...
Kan Politician ṭhenkhat, hmingṭhat duh thang huam lutukte chuan Company leh Bank ṭhenkhat hnenah an nihna hmachhuanin CSR hi an dil/ phut chhuak ta ṭhin a. CSR hi sumdawn nana hman rem miah lo mah se, Minister/ MLA te meuhin an dil chuan in hman ṭangkai tawn theihna remchang tak a nih avangin an lo pe ve mai ṭhin a ni awm e.

Thlalaka a chung zawk hi Mizoram Rural Bank-in CSR hmanga Serkawn Branch YMA hnena Ambulance an pek a ni. Mak tak maiin an MLA Dr. Vanlalṭanpuia hming ziah lan tel a ni. MLA hming ziah lan tel kher hi a pawimawh ta em em mai a nih chu! (a hmalakna avanga hmuh pawh ni se, a hming ziah lan tel ve kher lai hi a cheap ngawih ngawih ta a ni).

MRB hotu lianho, vai officer lian hoten engtin tak ngai ang maw... an nuih a za ru viau maithei. Mizoram Youth Commission (MYC) sum hi eng Bank-ah nge an dah tihte hi a enzui tlak viau maithei e.

Thlalaka a hnuai zawka mi ve thung hi Khawzawl district, Tuichang Constituency chhunga Sialhawk PHC a mi tur leh Khawhai PHC a mi tur, NEZONE GROUP leh Vikas Associates-te Ambulance pek a ni a. Hetah phei hi chuan a petu tak tak company-te hming tarlang miah lovin, an bialtu MLA, Dy. CM Pu Tawnluia 'donate' angin an kal tir hmak mai nia! (Donated by : Tawnluia, MLA, Tuichang AC tih a inziah kuau hi!). Heng company pahnih hotute hi an nuih a za ru ngawt ang a, kan Dy. CM an hmuh dan pawh a sang lo ngawt ang.

MLA/ Minister hian khaw pakhat tan Ambulance pe se, motor hawntu an khaw VCP-in ama leisak angin sawi hmiah hmiah mai se, a petuah a ma hmingte lo ziak vel se... engtin tak ngai ang i maw! Sum tam tak aiin hmingṭhat hi thlan zawk tur a ni a (Thufingte 22:1) tihte hi kan la fuh over chho lutuk ta nge mawni le?

Lehlamah chuan, Tuichang bial khaw pahniha Ambulance petu tak tak zawk NEZONE leh Vikas Associates-te hi pipe siamchhuaktu company ve ve an lo ni hlauh mai a, a petu lem lema ṭang ta Dy. CM Pu Tawnluia lah PHE Minister a lo ni ve leh chiah bawk si nen, a khawi lam ve ve tan pawh malsawmna dawn kawp theihna lai a lo awm thei riau dawn a lo ni!

Amaherawhchu, an Ambulance pek erawh MLA donate anga ziah a nih tak daih avangin an company CSR atana pawm theih a ni dawn ta lo a ni.

'Pathian leh kan ram tan' kan tih ṭhin kha, 'Ni ni ni, ka tan, ka tan' kan ti chho tawh zawk dawn a ni awm e.

Aizawl khawpuia kan MLA-te hi chuan in bial mipui, Aizawl mipuite hi chu khitiang em em khi chuan min ngai mawl ve lo hram ang che u. Thingtlang lamin an lawm viau a ni thei; keini erawh chuan kan hrethiam ve kar a nia...

Puia Vanchiau