OIL PALM
Kan CM-in Oil Palm lam hawi a tweet-na social media-ah a lar hle, tinge hetia a tih leh thut a tiin tukinah zawhna ka dawng a. Kei mi ve mai mai, Sawrkara nihna nei reng reng lo leh Political Party a in hmang bawk si lo hian chhanna dang ka nei lo. Central sawrkar hawi lam a nih vang a ni mai.
State rethei nih hrehawmna pakhat chu Union Ministry hawi lam lamah thlek a ngai tlat. Sum sawi chhuak turin Ministry ruahman sa mila chet ve zel hi mahni manifesto leh flagship programme a innghat pum hlum ngam lo tan chuan a lo ṭul leh ṭhin.
Oil Palm kan chin nasatzia te kan hria a, hausakpui loh pawhin sum a thawh chhuah nasat tur thu kan infah nasa bawk a kan uar hle mai. Tlangramah awihah kan han bei sa teh a, rah hralh tlak mang loh tharin Sawrkarin agreement a sign pui company-ten a chhia thlengin an lei lo thei si lo, hralh zawh rualin huan neitute ram kawr remchangah an han bun rui mai a. An hlawk bikin ka ring lo. 1 Kg kha Rs 2 ten kan han hralh a, a rah ṭha miau hek lo le.
Hei hi Mizoram puma kan dinhmun chu a ni lo. Hmun ṭhenkhatah chuan an thar ṭha ve a, sum lakluh nan an hmang nasa a, harsatna awm chin hi chu tlangram hmun rem lo zual laia huan neite an ni.
Amaherawhchu, kan ram hi hmun rem a tlem zawk miau mai si a, kum 3/4 kal ta aṭang khan an ti rem a, an hal tlu dur dur chu a ni ber e.
Kan han tharthawh leh poh dawn chu a ni a (tinge kan tharthawh loh ang kan state hotupa in a vei leh tlat tawh). Eng ruahmanna nge ni kan neih dawn ni, kan arkhawthimdai tawh lo chek ang a! State mipuite tan sum lakluhna ṭha tak a nih ngei beisei ang.
He thu ka han thaikawi chhan bulpui berah lut ta ila. Kan ram hruaitute hian inthlan hma hian Manifesto hi an nei ṭha ṭhin lutuk. Ruahmanna lah an nei ropui ṭhin.
Sawrkar inthlak chiah hian beisei hi a sang ṭhin a, NE state dangte thlirin hnungah kawlek kan thai bik tawh lo ang kan ti ṭhin. Mahse le, Sawrkar ber chuan a sir kualah min then pui a "Manifesto te chu kan in ziah ṭhat siak mai mai alawm" an ti mawh hek lo.
Inthlan hmaa state sawrkar Flagship Programme tura duan sa pawh kan hel kan hel a, thil dang puitling chuang chiah lo tur ṭhat hmel fe fe kan sawi tlawr leh dur dur ṭhin.
Hetianga kan kalphungah hian eng Political Party pawh hi puh bik tur pawh hriat a har. Rorellai tan erawh in ngaihbel a awl deuh mai thei, lo inngaihbel se lo haw mahse kan state sawrkar kalphung leh Political Party te kal dan sawi kan ni a. An tel ve vek mai e.
Min hruai thlen tumna goal nghet ren rawn, Union Ministry pawhin kan tih tak takzia hriaa min puih an chak ngawih ngawihna tur zawka kan Policy hlawhtlinpui lam aiin Central Sawrkara sum tamna lam um hian kan then kan then leh mai hmel e, kum 20 vel hi chu.
Muantea Zofa