Mizo Zaipawl leh Billy Graham (March ni 2, 2018 a vui tur Evangelist ropui Billy Graham-a thlah nan)

March 28, 1978 (Thawhlehni) tlai dar 3 daih tawh kha a ni a - Mizo Zaipawl (Mizo Choir) USA leh Canada ram fangten Billy Graham’ Evangelistic Association (BGEA) hmunpui (Headquarters) Minneapolis, Minnesota a mi kan tlawh chu! He hmun kan tlawh tur hi kan phur tlang hle a, hmuh thuai thuai nghakhlel tak kan ni hlawm! A hmun han thlen chuan insit a na kher mai, kan te chem chemin kan in hria! Mahse thawktute an in ngaitlawmin an hawihhawm a, kan tlangnel ta phian a. BGEA Headquarters office kan tlawh lai hian mi 300 vel thawktu an awm a, khawl (electronic) lam an hmang ṭangkai hle tawh a ni. Kan tlawh ni hian Billy Grahama chu office-ah hian a awm ve lova, a chenna in lamah awmin a ṭul anga inbe pawpin ani kaihhruaina hnuaiah engkim thawh a ni tih thu min hrilh.

Billy Grahama’n nitin a lehkha a hmuh hi a tam hle a ni ang, zawhna leh thildang dang a chhan tur a tam lutuk a uluk taka a ni chhiar hman zia zang a ni lo. A chhiartu in a chhiar khan ‘point’ pawimawh lai ‘marker’ in a chhinchhiah a, chu mi lai chu Billy Grahama’n a en a, a ṭul angin a chhang ta ṭhin a ni.

Mizo Zaipawl leh BGEA thawktute hi an office ‘Chapel’ ah tlai dar 3 ah kan inkhawm ho a, chu hun hlu tak chu hetiang hian kan hmang. Kan leader Rev. Vanlalnghaka (chutih laia Tv. Vanlalnghaka’n) thu tlem a sawi a. Hei hi Zaipawl zai, Solo, Trio etc. in a zui ta a hetiangin - Mizo Zaipawlin ṭum khat dinnaah hla pathum kan sa phawt a -

(1) I was in the darkness once
(Pu Vanmawia phuah).
(2) Jesus gave his life.
(3) Tunah a thar hmangaihna eng nuamah (Mizo lengkhawm zaiin khuangte nen ngat kan sa a).

Hemi hnu hian Lalsangzuali Sailo-in a ma style dik tak leh thinlung takin “I saw Jesus when I prayed last night” tih an thlawh a, a ngaihnawm teh asin! Ṭum hnih/ din vawihnihna atan Zaipawl in hla pahnih dang kan sa leh a -

(1) He loves with an everlasting love
(Lalsangzuali Sailo phuah).
(2) When I survey the wondrous cross
(Hla tha chul theilo kan tih mai).

Hei hi muang fan raih maia Trio/ Female Voice in ‘My Wonderful Lord’ tih sakin a rawn chhilh a. Zaipawl in programme a hla hnuhnung atan - khawvelin hla ropui bera a ngaih ‘Hallelujah Chorus’ kan sa leh bawk. BGEA staff te nena kan inkhawm hi kan zinna a min hruaitu ber Dr. G.W. Doxsee-a’n ṭawngṭaiin a khar a, kan kham lo tlang khawp mai.

BGEA staff ho hian kan programme min hlutsak thiam hle a, kan tlangnelin anniho nen a han inkhawm chu kham awm lo tak a ni. Khawvel pum huapa rawngbawl ṭhin zinga kan zai ve mai chu a lawmawm hran ve khawp mai - Pathian remruatna mak kan hmuh leh chan ho a ni.

An pawl hian Mizo Zaipawl member-te hi Bible min pe ṭheuh a, kan vannei takzet. “Day by Day with Billy Graham” tih lehkhabu BGEA office kan tlawh aṭang hian ka nei nawlh a (hei hi ka lei nge min present tih ka chiang ta lo). He lehkhabu hi fianrial (quiet-time) a hman chi Billy Grahama sermon aṭanga lak, kum khat chhunga nitin daih tura siam a ni. (Compiled and Edited by Joan Winmill Brown). 1978 aṭangin quiet-time ka neih ṭhinah ka hmang ngar ngar a, kumtharah ka let leh mai ṭhin a, ka ṭangkaipui teh asin! Mahse ka khal chhe ta tlat a, mak takin a hun takah a thlakna amah Billy Graham-a buatsaih - a signature chuanna ngei kumin kum tir khan ‘Hope for Each Day’ tih ka lei leh a, ka hmang ṭangkai leh dawn khawp mai.

BGEA office kan tlawh hnu lawk aṭangin anmahni chhuah ‘Decision Magazine’ ka la ve a, chhiar manhla ka ti khawp mahse US Dollar a pek a ngaih hnuah ka ti tawp a. Vanneihthlak takin anmahni chhuah tho, ‘Decision magazine news-letter’ laktawi ‘Decision Points’ - A news letter of Billy Graham Evangelistic Association (BGEA) India chu Shillong, Meghalaya (an office) aṭangin ka dawng leh a, ka ṭangkaipui khawp mai.

Han sawi zel takah chuan February 17 - 19, 2012 a ‘Celebration of Peace with Will Graham’ tih programme, Vaivakawn Field a Mizoramin kan hman ṭum khan Reception Committee-ah kan awm ve avangin Will Grahama (Billy Grahama tupa) Speaker ber kha Mizo Zaipawl member ami - Thangpuii (TP) leh midangte nen kan lo buaipui ve leh viau bawk. Lengpui Airport a lo hmuakin - Vaivakawn Field thlenga kan kal dun zelnaah BGEA rawngbawlna, a pu Billy Grahama rawngbawl zel dan, BGEA a zaithiam George Beverly Shea (Isua neih ka duh zawk tih hla thiam taka sa lartu), Cliff Barrows etc. te chanchin ka zawt a, kan phul hlut mai kawng tluanin. Mizo Zaipawl te leh BGEA kan intawn dan hi Pathian remruat dan mak tak chu a ni ve chiang hle!

Mizo Zaipawl leh BGEA chungchang kan sawia a puipa ber chu kan leader Rev. Vanlalnghaka a ni kan ti lo thei lovang. A ni hi Mizo zingah chuan BGEA/ Billy Grahama rawngbawlna - India ram leh khawvel hmun dang danga tel (involve) tam ber a ni ngei ang. Hemi chungchang sawi tur a ngah ngei ang!

Awle, a sei lutuk hma in duhtawk tawh mai ang. Mizo Zaipawl member-in BGEA Headquarters kan tlawh a chuta thawktute nena an Chapel a kan inkhawm ho a fellowship kan nei kha eng dang vang ni lovin Pathian vang a ni a. A hnu zelah an member-te nen a rawng kan bawl ho leh zauh ṭhin leh an ‘material’ dang hmanga kan inzawm thei hi kan vannei takzet a ni. BGEA hi Billy Grahama awm loh hnu pawh hian hmalam pan zel turin Mizo Zaipawl in duhsakna sang ber kan hlan e.

Prof. Lianzela