Tlawng lei part pawimawh an rubo maw?
Vanduaithlak takin Lei chim thu kan hre leh ṭhin a, a pawi teh e. Tlawng lei Sihhmui kai hi ṭum thum (3) a chim tawh a, a chim chhan ṭum 2 chu a part pawimawh misualin an ruk bo vang a ni tih chu kan ram hruaitute leh engineer te sawi dan a ni.
Kawngpui pawimawh em em lei part ruk a nih thu an sawi apiang hian a hnaivai khua a awm nih ve takah chuan ka lo zak ru veng veng ṭhin. Lei part an ruk chhan nia an sawi chu thirchhe hralh atan thirchhe zawng ṭhin an ru an ti ni ta berin ka hria a, a lo ni tak tak a nih phei chuan thil zahthlak tawp a tling a ni.
Kan mithiamte leh ram hruaitute meuh sawi a ni a, kei laisen lungmawl in a lo awihloh ngawt chuan awmzia a nei pha chuang hlei lovang a. Amaherawhchu, lei part rukbo a ni tih an sawi apianga mak ka lo tih em em chu lei kilhna te hi hmanraw bik leh thiamna nei bik tan lo chuan phawi mai mai theih a ni em?
Lei rit em em chelh zo tura a leng tawk chiah a kilh luh lei rihna in a uai beh tlat phawi harsat turzia chu a kal remchang chuan lei-ah khuan chawlin han enchhin ve mah teh u.
Tuboh leh chheni nen pawh bei ila pachang hi hlawhchham tur kan tam mai lo’ng maw? Lei a chim hmasak khan a ṭhiat velah kan tlangvalte an inhlawh ve hlawm a, a kilhna chhut phawi harsatzia leh a hahthlakzia an hrilhfak a ni. He kawng lunzia kan hre vek a, lei part ru tur meuh chuan zan rehah lo chuan chet ngamna chi a ni lo ang. Chutianga harsa leh khirh si chu kg ah Rs. 10 emaw leka hralh turin tu hian nge maw lo ru peih/ thei bik ang le?
Nge ni a, lei part-ah hian thil hlu leh man to tak a hralh theih te hi alo awm reng zawk? Chuti nise kan ramah thir lei hei zat a awm a, enga tinge Tlawng lei Sihhmui kai ami chauh hi ruk bo a nih bik le? Lei hman lai part pawh ru duh khawp chuan Tlawng lei Buichali kai ami hluihlawn tak te khu ruk zawh duak awm tak a ni.
Tlawng lei chim chhan hi a part pawimawh ruk bo ṭhen vang a ni tak tak em? 'Sipai bang ka bo map mai' an tih ang maiin ka lo buai ru ve em em a ni.
LR Sailo, Lengpui