KRISTIAN POLITICIAN

Marka 10:45 “Mihring Fapa meuh pawh rawng­bawlsaka awm turin a lo kal lova, rawng­bawl tur leh mi tam tak tlan nana a nun pe zawk turin alo kal a ni si.”

Mizoramin inthlan (elec­tion) kan hma chhawn dawn apiang hian kan politician te hi kan khawngaihna leh kan vote dilin kan hnenah an lo kal ṭhin tih chu a hre chiang bertute kan ni ang. Kan vote kan pek chuan ram leh hnam siam ṭha tura hnathawh kawr hak tir kan nih tur thu leh theihtawp chhuaha kan ram leh hnam tana rawngbawl a, hna thawk a, ke pen turin nasa takin media kal tlang te, ṭawngka leh Pathian thu behchhanin an intiam a ni tih hi mipuite hian vawi tam tak ‘experience’ kan nei tawh a nih hi.

Chuti anga kan ram leh hnam lo kaihruaitu Politician hi Kristian, Kohhran Upa leh Kohhran a nihna pawimawh tak tak chelhtute an ni. Chuti anga mi chu kum 1972 aṭanga chhiar tanin kum 2013 thleng khan vawi 7 kan thlang tawh a, kan ram hian hmangaihtu tak tak ram hruaitu/ Party/ MLA/ Chief Minister a nei tawh em tih zawhna hi chhan har tak leh inhnial theih tak a ni ang a. Chutih rual erawh chuan kan ram hruaitu lo ni tawhte-ah hian Lal Isua’n Marka 10:45-a a sawi ang mi hruaitu leh ram hmangaihtu erawh hi chu kan la nei lo tih chiang takin a hriat.

Chanchin Ṭha Marka ziak bung 10:45- ah hian Lal Isua’n a lo kal chhan leh he khawvel tana a tih tur chu ching takin A zirtirte hnenah a hrilh a ni tih kan hria a. A zirtirte zinga ropui ber leh hmasa ber nih duhtu chuan mi zawng zawng chhiahhlawhah awm a huamin a awm tur a ni tih a hrilh. Chuvangin, Lal Isua ngei pawh hian khawvela a lo kalin ropuina te, chawimawina leh nawmsakna lam um hman loin chhandamna chauh buaipuiin a thawk mawlh mawlh a ni tih Bible-ah kan hmu.

India ram State dang te aia hmasawn zawk leh changkang zawk nih hi kan duh tak tak a nih chuan Lal Isua sawi angin kan Politician, kan ram hruaitute hi mi zawng zawng chhiahhlawhah an awm ngam a ngai a ni. Hei hi a tak taka nunpui ngam leh Lal pui ngam hruaitu kan neih hma chuan kan ram hian engtikah mah a hmasaber, hmasawn ber leh changkang ber nihna kan hauh ngai lo ang a, kan hruaitute erawh India ram Politician hausa ber berte an ni reng thung ang.

Kum 46 (1972 - 2018) chhunga kan ram hruaitute leh kan party thlan tlin ṭhinte aṭang hian kan ram hian hmasawnna a nei lo hauh lo a, chutih rual erawh chuan kan ram aiin anmahni hi an hausa zawk deuh zel tih erawh chu thil chiang tak a ni. Heng kan hruaitute hi Kristian, Bible pawh chhiar fo ṭhin an nih ngei a rinawm a, mahse kan Bible chang tarlan sawi ang hruaitu kan nei thei lo tlat hi tu mawh nge ni ang? A thlangtu mipuite thiam loh nge kan thlan tlinte?

Inthlanpui kan hmachhawn leh dawn a, Kristian Politician, ram leh hnam hmangaih tak tak tu hi i thlang tling ang u. Mipuite hian kan ram hruaitu turte chunga kan rilru put hmang hi kan thlak a hun takzet tawh. Lalna leh thuneihna an chan veleh a kan ram leh hnam hmangaih hmasa lova mahni leh party te ti hmasawn hmasa ṭhin hruaitu ringawt thlang chhuak tawh lo tura fin hi kan tihtur, kan mawhphurhna leh kan hlen chhuah tur chu a ni. Se bo hnua se kawngkhar fo hi pumpelh ila, se kawngkhar hi a bo hma in kan siam ṭha thei tih hriat a hun ta hle!

Kan chhiahhlawh tak taka awm thei tur, kan ram leh hnam damna tur a che chhuak duh, mi ṭha leh dik, Kristian Politician hi thlang turin nang leh kei hian mawhphurhna kan nei. Party politician chu hei leh chen hi kan ram kan lo hruaitir tawh a, kan dinhmun kan hria. Tuna hun ṭha kan neih lai hian eng party mi pawh nise Mizoram hmangaih tak taktu, Kristian politician hi thlang turin kan ngaihtuahna sengin vote i thlak ang aw.

Rinfela Zadeng