HUAU HUAU SUM TAMA CHANTIR Chapchar Kut & Anthurium Festivaltete hi aw!

He thuziakin sawr bing atana a thlan chu thil pahnih a ni a. Mizorama thil huaihawt lian tham tak, tarlan duh bik an awm a. Pakhatna chu, Tourism Department lam hmalakna azarah tun hnai kum 2006 aṭang khan Reiek Tourist Resort-a tih ṭan, Anthurium Festival hi a ni. Kum 2016 thleng khan khel lovin kum tin buatsaih a ni ṭhin a. Tun hnaiah erawh chuan chatlak deuhin tih ṭhin a ni a. Kum 2019 October 4 & 5 a an zawh tak phei kha chu kum 2 hnua chhunzawm leh a ni. 

Anthurium pangpar

Anthurium pangpar kan ramin a nei mawi em em a, he festival chhunga an pholanho en mai pawhin khawvel zau zawka pho chhuah atan pawha chhuanawm an ni. Tin, huaihawt danah pawh ‘tualchhung thil’ ang deuha tih niin a boruak hlap (hype) a lian lua lo a, chuti chungin a chhuan tlak hle a ni. Pangpar ngaina apiangin mawi tia an thlir ṭhin chu Anthurium hi a ni. Mithiam, Pu F. Lalnunmawia leh Nuchhungi Khawlhring te research paper-a tarlan angin anthurium pangpar mawi leh dangdai tak hi kan ram leilung leh sik leh sa ngeih em em mai a ni. 

Ram danga zawrh leh hralh atana ṭha eltiang, sum maktaduai tam lakluh theihna a ni. Mizoram Horticulture Department-ten Technology Mission for integrated development of Horticulture in North East thlazar hnuaia kum 2002 vel aṭanga an hmalakna azara rawn vul chho a ni. Sum tam tham tak pawh an vawm lut a ni. 

Tichuan, he programme hnuaiah hian anthurium chingtu in ziaklut 275 ten anthurium 5,50,000 chingin anthurium par 27,50,000 aṭanga 33,00,000 lai kum khat chhungin an thar thei a. He research paper-in a tarlan danin kum 2008 a an report dan phei chuan cheng nuai 53 chuang an lei chhuak a. Kum 2008-09 chhunga an lei chhuah pawh cheng nuai 97 dawn lai an lei chhuak a, heng zingah hian export pawh cheng nuai 14 hu lai a ni awm e. Kan ram sik leh sa leh ram leilung hi pangparin a ngeih em em a, kan vannei leh pek kher mai. Mizoram hi ‘floriculture powerhouse’ ni mai thei dinhmunah a ding reng a, kan beih deuh a inhlangkai thei kan ni. 

Tuna kan kalphungah hi chuan mipui thleng meuh lo, mitlemin an pumbilh a ang deuh. Mimal ram zau tak tak nei, dah awl tam em em te hi anthurium chingtu lianpui pui an ni thei. Mimal ram nei lian lutuk lo inbawk khawm pawhin ‘society for cluster cultivation’ tiin an ram an pawt khawm thei bawk a ni. 

Chapchar Kut

A pahnihna Chapchar Kut hi lo thlir ve leh ila. Sawi tam ngai lovin kan hre vek mai a, Chapchar Kut hi hmasang aṭanga kan pi leh pute Kut pawimawh leh lian tham tak, a thawm pawh lian tak a ni sa hrim hrim a. Kum 1450-1700 AD vel daih tawh a hmanlai Mizo History a lo lang Kawlni Lal te rawn chin chhuah ni awm tak a ni a. Famchang tawh, Pu R.L. Thanzawna’n sapṭawnga Chapchar Kut chanchin a ziak hi khawvel deng chhuak atan pawha itawm khawpa ziak ṭha leh mawi a ni a. Chapchar Kut hian Mizote nunphungah hmun a lo chang lian hle mai a. Hmasang aṭanga khel lova an lo lawm ṭhin chu hun lokal zelah ni 6 chhung teh meuh lawmna hlimawm tak an nei ṭhin a lo ni a.

Hetiang deuh hi an hman ṭhin dan chu a ni awm e: 

Ni ruk awh 

Chapchar Kut aṭangin ni khat

A tawi zawngin sawi ila, ni khat aṭanga ni ruk chhung hi vawk talh, ran talh leh zupui chen a zai leh lama hun hman a ni tlangpui a. Zupui hi rual u deuhte chauhin an kil a, naupang leh 

ṭhalai tan intihhlimna zai leh lam, zu sem, ei tur siam leh sem te tam fe a awm tho a. Ni rukna - ‘Eipuar Awm Ni’ - an eiin an in nasa tawh bawk a, ‘awm hle hle ni’ a ni hawt awm e. 

Amaherawhchu, kum 1894 vela kan rama Kristian missionary te an lo chuan chhuah chinah erawh chuan thil a danglam ṭan ta a. Missionary te leh Kristiana inpe tharte thlir danin Chachar Kut lawma zu in bung bung leh an lo tih ṭhin dante kha ramhuai be mite tihdan a ngaiin leh zu in kha kristian nun nen a inhne rem ta lo a, zawi zawiin a mit deuh duk ta ni awm a ni. 

Hetiang a ni chung hian pi leh pu hun 

aṭanga lo chin chu chuti maia hmehmit a harsa a ni ang e. Chapchar Kut lawm duhna a nung leh ṭhin a. Tin, kum 1952 a Mizo District Council a lo awm khan Chapchar Kut lawmna ni aṭang ‘chawlh puan’ an remti chho ta a. Tunlaia a huhova lawmna programme hlawm khat neih ṭan hi chu kum 1960 vel aṭang khan a ni awm e. Chapchar Kut Lawmna programme siam turin Committee te an din a, chuta hranghlui puipate chu: Pu Hrangaia (Convener), Pu B. Poonte, Pu Sangliana, Pu Sainghinga, Pu R.Buchhawna, Pu R.Zuala, Pu Tawnluia, Pi Meli and Pi Hmingliani te an ni. Chutiang chuan kum 1961, 1962, 1963 leh 1964 khan huhovin Chapchar Kut chu mumal nei takin Lammual-ah an lawm ṭhin a. Mahse, kum 1964 a an lawm ṭum kha chuan tute emaw ten sap zu an rawn keng lut ru chiam a, chu chu an ruihpui a, an buai deuh nuak nuak ta a ni awm e. Hei hi Kohhran lamin an lo hriatin ‘demna’ thu a lo chhuak ta a. Kum 1965 a lawmna phei chu Kohhran mite chuan an fate tel an khuahkhirh ta a ni. 

Rambuaiin a rawn nang a, thil a tih vak theih ta lo nen kum 1972 thleng khan a reh ta a. Mahse, kum 1972 chuan Chapchar Kut chu DIPR & T huaihawtin an rawn tharthawh leh ta a. Hei pawh hi Kohhran hruaitute chuan an phurpui chiam lo. Mahse, rambuai boruak rit tak hrikthlak nan hla leh lam nena Chapchar Kut han lawm leh chu mipuiten an thlahlel em em tih erawh chu a chiang a ni awm e. 

Kum 1974 aṭangin Art & Culture Department ding thar chuan Chapchar Kut lawmna chu a rawn thur nung leh ṭan ta a. Chuta ṭang chuan sawrkar leh NGO te hmalaknain tuna kan kalphung hi kan zui chho ta niin a lang. Heng 

aṭang hian Mizote thinlungah hian Chapchar Kut hi a thi thei lo a, kan chhunzawm zel hi ‘loh theih loh’ thil ang deuh a ni ta a ni. Chutichuan, Mizote thinlunga nghet taka zung kaih tlat Chapchar Kut chu kan lawm chho reng dawn a nih hmel. Chutiang a nih si chuan Kohhran lam te nena in tuah rem siin eng tiangin nge puipunna remchang la a sum tam tak her chhuah nana hmang ṭangkai turin keini hian engtin nge he Kut hi kan chhawr ṭangkai ve theih ang tih hi kan inzawh a ngai ta a ni. 

Mi ram chuan hlawhtlinna kawngpui an zawh

 Awle, tunah chuan a festival lai tak leh Chapchar Kut hi sum hai luhna bupui (business package) lian taka siam a theih tia hre mai ni lovin Mizoten kan hlen ngei hi tih makmawh a ni. Thil tam tak zeh telna hmun a awm loh avangin mi ramin hlawhlting taka an lo kal pui mek pahnih chauh hi lo thlir ila. Nagaland hian Hornbill Festival hi kum tin December ni 1 aṭang ni 10 chhung pui tham takin kum 2000 aṭang khan Tourism 

ṭhanduan nan leh tih hausak nan hlawhtling zetin an hauhawt ṭhin a. An hnam lam leh zai leh thil chi hrang hrang an pho chhuak ṭhin.

A hma fe aṭangin media hrang hrangah an lo market lawk a. A hranpain fakna (advertisement) pawh kum 1 chhung vel an lo bei lawk chiam ṭhin. 

India ram mai ni lo, khawvel hriat hlawh a ni ta a. He Festival chhim tur hian nuai tam tak an lut ruih ruih mai a. Hotel leh lodges thlenna tur fel takin ṭhahnem tawk tak an lo ruahman lawkte chu an book khat vek ṭhin. An hlawhtling thlawt a ni. Tunah chuan miin ‘Hornbill Festival’ tia an sawi rik tawh chuan khawia awm nge tih te, engtia kal tur nge tih an hre le lu tawh. Tourist nuai tam takin ni 10 chhunga an sum an thehthangna kha Nagaland chuan an rut heuh heuh mai a ni. 

A dawt lehah chuan Rajasthan State-a Ajmer bul lawka Pushkar hmuna Pushkar Mela (sanghawng sei Fair/ Kartik Mela an tih bawk) kum tin November thla ni 9-10 chhung an neih ṭhin hi khawvel pumin an hre tawh. Hetah hian kum tin tlawhtu mihring nuai 2 aṭang nuai 3 an tel ṭhin. Sabengtung an neih ve zawng tak sum hai luh nana hmang ṭangkaiin 50000 rual vel an chettirna, he Camel Fair rual hian intihhlimna thil chi hrang hrang, hmuhnawm leh hlimawm an telh ṭeuh mai. Tlawhtuten an cham chhunga an hun hnawh khahna tur an telh ṭeuh hi an tlawh zawngchhang em em chhan pawh a ni. 

Ni khata zo duak te chu ni se sum tam tak sengin ram dang aṭangin tourist ho an lo thlawk lut hauh lo ang. Chuvangin, sum luhna bupui siam dawn chuan senso manhla ‘value for money’ hi ngaihtuah tel a ngai. Zin mite hip turin publication mawi tak pawh kan siam a ni thei e, mahse, lokal turten an hun leh sum sen hen ‘value for money’ chu a awm em tih an zawt fo ṭhin. Chapchar Kut hi a chanchin lo hria a, lokal chak tak tan pawh an lokal loh fo chhan kan hria em? Chapchar Kut thawm te chu a ropui lutuk, mahse, zing dar 10 aṭanga tlai dar 5 programme vel chauh kha sum sing tel senna nen a inhen lo. Kan huau huau huaihawt hi mite hip khawp a nih a ngai ve. Pushkar Mela tepawh kum tinin an thlak kual a, mite ngaihven leh duhzawng te chhut telin intihhlimna leh hmuhnawm chhim tur (enter­tainment content) kha an thlak kual ve zel ṭhin. 

Chapchar Kut event lian zawk leh tlai thlak

Chapchar Kut kan huaihawt leh turte hi ni 7 vel tal awh turin ruahman ni ta se nikhata AR lammuala tlingtlak ngawt bak erawh a ṭul dawn. Veng hrang hrangah ni hran hrana thil hmuhnawm leh thlir manhla programme te hi awm ta se. 

Entir nan: 

•    Hnam lam chi hrang te, 

•    Fashion show te, 

•    Mizo native sports entirna te,

•    Music talent ropui tak, khawvela zahpuiawm lo kan neih pho chhuahna (musical events) te,

•    Mizo cuisine gala evening (ei siam lai hmuh theih, ei nghalna hmun thianghlim tak buatsaih tel) te,

•    Handicraft lama kut themthiamte che lai thlir theih (live) leh an siam chhuah hralhna te etc. awm bawk se. (a dang pawh a tam mai)

Brochure, leaflets, fliers, book mark te mawihnai taka siam, tlawhtute sem tur publica­tion mawihnai leh zahawm tak te awm ta se. A hma thla tam tak aṭangin publicity campaign hluar taka tih ni bawk se. Tlawhtute thlenna hotel leh lodges (home stay te hial pawh) te fai tha tak tam tawk ruahman ni se. Hotel leh sumdawngte aṭangin ‘Chapchar Kut offer’ te siamin media lamah darh chum chum mai se, boruak a va siam dawn tehlul em! Hetih kara zofaten sum kan lo seng luh fe theih chuan ram hmasawna mite kan ang ve dawn tihna a ni. 

Sum hmuam hnem Anthurium Festival

Chutiang bawkin, Anthurium Festival hi kan ramin a let tam fe a ‘sumchang’ huau huau atana siam a itawmzia lam hi lo hawi leh thung ila. ‘Anthurium Festival’ te hi engtinnge kan kalpui zel dawn? Kan ram economy siam nana ṭangkai tak cheng vaibelchhe tel seng luh theihna thil a nih miau avangin he thil pahnih hi engtiangin nge hlimawm tho si, tun aia nasaa kan rama sum luan luhtir a nih theih nan kan cheibawl ang tih hi kan dap a, kan ngaihtuahna chawh thawh a hun. 

‘Anthurium festival’ pawh hian thil ken tel tur a nei. Pakhatnaah chuan tun aia anthurium pangpar a let sang chuang lai kan thar a ṭul. A dawtah a zawrh chhuahna lam- ram chhung leh ram pawn market chu awmsa tih hre mah ila, thil kalhmang fel tak ruahmanna neia kalpui a ngaih avangin tun aia zei zawka kan kalpui a ngai. 

A ṭul chuan ‘mithiam, professional’ rawih hial pawh a hun a thleng mek a ni. 

Kan ramah hian anthurium Export House nih theihna kawng lianpui a inzalh ruah a ni. Business lam hawi tan chutiang tihna remchang lo dawh rem sak ni ngei bawk se. Sum tam tak senga lokalten an sum sen kha manhla an tih a ngai. 

Anthurium Festival-ah chuan entertainment packages tam fe awm turin mi leh sa talents ṭha kan ngah. He hunin a ken tel mek tho flower show te, fashion show te, musical show te hi glamour events (huau huau phurawm) changkang bawk si, ni hran luah ṭheuhin dah atan an va duhawm em! Chumi sirah chuan (hei hi a pawimawh) - Business meeting tihna tur conference room leh meeting room changkang tak te awm se, ‘buy & sell meeting kiosk’ te awm se. Trade Agreement emaw Memorandum of Understanding te hial pawh siam nghal thei khawpin lo inruahman ve ila. Reiek thlenga kal velna tur, innghahna tlak lirthei te a awm tih te thlenga kan puanzar tel a ngai. 

Export-Import House lian pui pui sum ngah tak takte hi he Festival hmang tur hian lo chhuak suau suau se, Mizorama sum lengvak an rawn tipung chiam dawn a ni. Chuvangin, Anthurium Festival hi ‘huau huau’ sumchang chhenfakawm zet a ni ngei ngei dawn a ni. 

Tun huna kan kalpui tawh chinah chuan kan marketing leh publicity te hi a beitham hle a, promotion material lo lang ve chhun pawh marketing strategy tel lo, a pachhe hne hne hle. Kan tum ber pakhat ni si, Tourism hi a promote-na chau em em rih a ni. Tin, Chapchar Kut lawmna kan NGO ten an huaihawt hi chuan sum luanluhtirna lam hi a hawi lova, a theih pawh a theih kher lo ang. Tuna rawtna rawn tarchhuah ang chi thlentir tur chuan kan kalphung kan her danglam deuh erawh a ngai ngei ang. 

Pushkar Mela leh Hornbill Festival atana an ‘fakna thangthawm’ ho hian media hi a al hneh em em mai a.  An publicity tih dan pawh mithiam kuthnu a ni vek. Heng zawng zawng hi kan tih ve theih loh an ni hauh lo. Kan ban phak maia thil tam tak rah ṭha seng tur awm si, kan lak si loh hi an ni. Chhuanlam kan nei lo a, Mizoten zak kaua thiltih kan la ngah tawk lo deuh tihna a ni zawk. Kan insan mar hunah chuan event lian tak, ‘huau huau sum chang thei’ kal tlangin sum luang lut hi ruh hlawih hlawih tham kan hmu thei a ni. Kan tih theih vek si kan tih lem loh te hi midang tihsak kan nghak dawn em ni? Ṭhangtharte chona a ni e.