HRINGNUN HI - 8
Zan khat chu Police Station-a kal turin ka ṭhianpa phone call ka dawng a, kan kal chhan tak lam aiin Police Station-a ka thil hmuh chuan ka thinlung a luah tlat mai pek a, chu chu ka sawi tum ber zawk chu a ni.
Police Officer nen kan titi lai chuan piah deuhah hian pa pakhat hi plastic chair-ah
ṭhuin vawt a tih hmel hle mai a, a track jacket hak lai ban aṭang chuan a ban la chhuakin a kuangkuah a, a khup a tawm bawk a, rem lo tak chuan chair-ah a ṭhu a, a muthlu deuh diar diar bawk a. Chutia ka thlir reng lai chuan chair aṭanga chhukin cement chhuatah chuan ṭhuin bang ngheng chuan mut a han tum leh ta zawk a, chutia danglam deuh taka a awm avang chuan a bula Police duty chu a chanchin hetiang hian ka han zawt chiang ta a ni:
Sawlaia mi saw in mi man em ni?
Ni lo e, ti sawn a rawn riak ve fo ṭhin a, khawlaia riah ai chuan hetia a riah mai hi atan pawh ṭha kan ti zawk a, kan riahtir ve fo mai.
E he, ti nge chhungte a nei lo em ni? A chhungten an rawn ngaihven lo em ni?
Chhungte chu nei e, (an veng hming a sawi a) chutah chuan an awm a, kan zawng chhuak tawh a, kan hrilh pawhin an rawn ngaihven chuang lo.
Khaih aw! Enge maw a chhan ni ang le? A nih leh amah hi a sual em?
Sual lo e, thil sual a tih ṭhin pawh kan hre lo, he ti hian a duh hun hunah a rawn kal a, ei tur awm ang ang hi kan pe ve mai a, a rawn tlangnel tawh khawp mai.
Hetiang hi Police duty nen chuan kan inbiak dan tlangpui chu a ni a, ka hmuh lai reng chuan lock up chhungah chuan mutbu pein riah tir turin an luh pui ta a.
Ka ngaihtuahnaa riak reng zawk chu - Eng vanga a chhungte hian rawn ngaihsak lo nge an nih ang, tih chu a ni. Amah chu mi pangngai a pha lutuk lo tih chu a chiang reng a, midang tel lo chuan ei tur a nei lo ang tih pawh ka ring thiam nghal mai tho a. Hetiang ni chung si hian eng vanga a chhungte hian rawn ngaihsak lo nge an nih ang?
A lehlam zawngin ka ngaihtuah leh a, a chhungte hian rawn ngaihtuah miah lo sela, hmun dangah riakin emaw khawlaiah vak vak sela mi kut palh ilo a tuar thei bawk si a, atan chuan hetia police station-a riah hi a ṭha thlawt a ni. Nimahsela he ti hian a riak reng thei bik awm si lo a, riak reng thei ta pawh lo ni se la ei tur an pe reng thei ang em?
Aizawl khawpuiah hian hetiang chi midang awm ve theih avangin engtia enkawl tur nge ni ang? A kianga mite chuan ṭha takin enkawlin awmpui ṭhin mahsela buaithlakna chin a awm ngei dawn tih a hriat nghal tho si. Kan Kristian ramah hian hnathawh tur a va tam sawtin Krista hnung kan zuina ṭheuhah hian pawl ang leh mimal ang pawh hian awm mai mai hman a va ni lo em tiin keimah ngei pawh chu chona lian tak min pe zawk a.
Mahmuaka Chhakchhuak