CHIEF MINISTER AWHAWM

A chhe lam sawi ai chuan a ṭha lam sawi hian chona min pe a, entawn peih tan entawn tur min hnutchhiah miau si a, sawiah sawi luat a awm lo ang chu maw...

Arvind Kejriwal: Kan sawi ṭhin, Delhi AAP sorkar chuan, electric leh tui, a dawng tlemte hnenah an free kha thil awihawm lo deuh kha a ni a, mahse an kalpui thei tlat. Hmeichhe bus chuan man an la free zui. Chhiah a pung chuang si lo, budget lah deficit chu sawi loh, a surplus hial zawk. Metro train pawh hmeichhiate tân concession an pe bawk. Sawrkar sikul lah a ṭha tawlh tawlh a.

An Lt. Governor hmangin theih­tawpin Pu Modi ten an block chung pawhin chaw ngeih ten an nawr a, hmasawnna a lang ut bik mai.

2021-2022 Delhi budget an finance minister Mani Sisodia-in a pharh khan, an budget hmasa aia 6% a pungin, an budget aṭanga 24% chu zirna tih hmansawn nan a ni. An budget hi ram hmangaih budget tiin an vuah hial. Health department-ah 14% an dah a, hei hian hmeichhe pual bika Mohala Clinic dinna tur eng emaw zat a tel nghal. Naupangte hnena zirna ṭha pek hi ram hmangaihna a ni tiin, zirtirtute Cambridge leh Harvard-ah te training neiin an tir a.

Vajirpur-a kawng chhawng an siam chu, vaibelchhe 315 project ruahman a nih laiin, vaibelchhe 250 in an zo fel thei a ni.

Delhi kawtthler hmun 7000 thim an ti eng a, Delhi boruak bawlhhlawh (air pollution) sanna pawh, air quality index chawh rualin 155 a ni ṭhin a, 115 ah an ti hniam thei tawh. An la lungawi lo, pollution siamtu hi a thla biin a danglam theih avangin, a chhan hre turin Washington University lam lam rawnin, an khawl hmangin zirchianna an neihtir mek.

Gujarat Chief Minister-in ama mimal hman atan cheng vaibelchhe 191 in thlawhna a lei laiin, Delhi CM Arvind Kejriwal chuan Delhi hmeichhiaten kum khat chhunga a thlawna bus an chuan theih nan, cheng vaibelchhe 140 vel a sente chu chhuangin, CM chuanna tur thlawhna lei ai chuan ropui zawkah a ngai.

Naveen Patnaik: Chief Minister-ah chuan Naveen Patnaik (Odisha) pawh hi inti lar lem lovah chuan a lo che ṭha khawp mai. Orissa CM kum 20 chuang a ni tawh a, a zawna vawi 5 thlan tlin an ni tawh.

Whiskey a in ṭhin tih mipui hriatah a sawi mai a, a corrupt lova, pro-poor policy rawn nei chhoin, officers ho a control tlat bawk a, India ram state a corruption hluarna pawl kha, officer ho chu, hmasawnna agent-ah a chhuah thei a, amah hi mi hau leh ti khur khur chi a ni ve tlat.

Jyoti Basu: Mi ṭha hi chu mipui pawhin an thlang nawn awn awn mai. West Bengal Chief Minister Jyoti Basu kha 1977-2000 chhung, kum 23 chhung ngawt CM a ni thei.

Kum 2006 khan West Bengal Singgur District chhunga lo neihna hmun, chhung­kaw 1000 dawn laiin eizawnna atana an hman chu CPIM chuan chhuh­sakin TATA Motors Company hnenah factory din nan a pe a, kha kha mipui laka an tlaktlum tak lohna a ni ta awm e.

An Didi chu: Chutih laiin Mamata Banerjee chuan an thil tih chu duh lovin, ni 26 ngawt chaw ngeiin a nawr a, a zawna term nga lai Lok Sabha MP ni tawh leh Railway Minister pawh lo ni tawh chet dan hi a pui riap riap asin.

West Bengal CM a nih veleh Singgur District a lo neitute ram chu a zatve lai an pe let leh nghal. He Didi hian Pu Modi pawh a hlau lo khawp mai.

Nitish Kumar: India ram state hmuhsitawm ni ṭhin, Bihar state siam danglamtu hi, a kawng siam pui lutuk, ka mit ngeia ka hmuhpui a ni ve bawk. An mipuiten nou inches (9 inches) an tih ṭhin chu, an kawng siam chu cement-a an chhun hnuah alkatra-in an luan chhah leh thlap vang a nia.

Kut hnathawktute puala a hah ṭhinzia leh an Agriculture product tam takzia kha hun dangah kan lo sawi tawh tho bawk a, thual nawn tawh lo mai ang.

Heng mite bakah hian tu chanchin nge kan sawi leh ang? Tripura Chief Minister hlui, Nripen Chakrabory kum 1978-1988 chhung, a zawna Chief Minister a nih hnu khan, Chief Minister bangla aṭanga a chhuah khan... Car man tlawm leh bungraw tlemte bak a chhuahpui lo. In ṭha pawh an nei bawk lo, tih thute kha sawi zel dawn ila, hunin min daih dawn si lo.

An awhawm alawm: Dik tak chuan an ram ṭhan nana ngaihtuahna nasa tak hmangho hi, an chanchin kan hriat tam poh leh, an chanchin chhiar zawngte hian, hmul thi hi a ding ur ur thei hial asin.

Kan ram ṭhan dan hi han thlir vel ila, lungawina tur leh chhuan tur a vang em em a ni. Heti khawpa ram ṭha leh ruah tui tlak ṭhatna kan nei chung hian, Covid 19 hri leng karah, thlaiah chuan kan intodelh ve tawh a nih dawn hi, kan ti ve sap sap a. Hma chu kan sawn hret a ni ang, chhuan tlak erawh a la awm lo. Cachar thlai a lo la lut tlat.

Buh leh bala intodelh tum siin, budget 3% chauh kan dah si chuan, a va thawk na awm lo ve kan ti a ni.

Kan insawi tui lutuk dawn, kan thu tawp nan, kan ram hruaitute chanchin ngaihnawm sawi ve tur a lo awm maithei, mahse a la langsar ve lo a nih hmel a ni.

Lalrinliana Colney